Ուկրաինայում ՌԴ ռազմական գործողությունների 33-րդ օրվա վերջին մանրամասները

Ուկրաինայում Մոսկվայի ծավալած ռազմական գործողությունների 33 օրերի ընթացքում ռուսական ուժերը վերահսկողություն են հաստատել Ուկրաինայի արևելյան և հարավային մի շարք շրջանների նկատմամբ։

Մեծ Բրիտանիայի պաշտպանական գերատեսչությունն առկա իրավիճակն արտացոլող քարտեզ է հրապարակել. կարմիրով նշված են ռուսական ուժերի կողմից վերահսկվող տարածքները, դեղին գծանշումներով՝ այն տարածքները, որոնց շուրջ մարտեր են ընթանում, իսկ սլաքներով նշված են ռուսական ուժերի առաջխաղացման հնարավոր ուղղությունները։

The illegal and unprovoked invasion of Ukraine is continuing.

The map below is the latest Defence Intelligence update on the situation in Ukraine – 27 March 2022

Find out more about the UK government's response: https://t.co/uNspWvB93T

🇺🇦 #StandWithUkraine 🇺🇦 pic.twitter.com/XarFKE1njN

— Ministry of Defence 🇬🇧 (@DefenceHQ) March 27, 2022

Մեծ Բրիտանիայի պաշտպանության նախարարության վերջին տեղեկությունների համաձայն՝ անցած 24 ժամվա ընթացքում ռուսական ուժերի դիրքերում նշանակալի փոփոխություններ տեղի չեն ունեցել։ Ըստ գերատեսչության՝ Ռուսաստանն ամենազգալի առաջխաղացումն ունեցել է Ուկրաինայի հարավում՝ Մարիուպոլ քաղաքի շրջակայքում, որտեղ թեժ մարտերը շարունակվում են։

Latest Defence Intelligence update on the situation in Ukraine – 28 March 2022

Find out more about the UK government's response: https://t.co/7lfm6YBINs

🇺🇦 #StandWithUkraine 🇺🇦 pic.twitter.com/RlINL4mY0l

— Ministry of Defence 🇬🇧 (@DefenceHQ) March 28, 2022

Մարտեր են ընթանում նաև Կիևի շուրջ։ Այս մասին տեղեկություններ է հաղորդել Ուկրաինայի ԶՈՒ գլխավոր շտաբը։

«Ուկրաինայի ուժերը և Կիևի պաշտպանական ուժերը հետ են մղում թշնամում, որը փորձում է ճեղքել ուկրաինական պաշտպանությունը հյուսիսարևմտյան և արևելյան հատվածներից և վերահսկողություն հաստատել կարևոր ճանապարհների և բնակավայրերի վրա։ Հարավում ուկրաինական ուժերը կենտրոնացած են Կրիվոյ Ռոգ, Զապորոժյե և Նիկոլաև քաղաքների պաշտպանության կազմակերպման վրա», – հայտնել է Ուկրաինայի ԶՈՒ ԳՇ ներկայացուցիչը։

Իր հերթին Ռուսաստանի պաշտպանության նախարարությունը տեսանյութ է տարածել՝ հայտնելով, որ օդադեսանտային ուժերի ստորաբաժանումները երթ են իրականացրել Կիևի շրջանում՝ հաղթահարելով ջրային պատնեշը և հայտնաբերել ու ոչնչացրել են թշնամու անօդաչու թռչող սարքեր։

Ռուսաստանի պաշտպանության նախարարությունը նաև վերջին տեղեկություններն է հաղորդել ռազմական գործողությունների վերաբերյալ։

«Լուգանսկի Ժողովրդական Հանրապետության ստորաբաժանումները հարձակման ընթացքում հինգ կիլոմետր առաջ են գնացել՝ գրավելով Իվանովկա, Նովոսադովոյե բնակավայրերը և հասել Նովոլյուբլինո-Տերնի սահմանագիծ։ Մարտի 27-ի ընթացքում օպերատիվ-մարտավարական ավիացիան և հրթիռային ուժերը խոցել են Ուկրաինայի 36 ռազմական օբյեկտ», – հայտնել է ՌԴ ՊՆ պաշտոնական ներկայացուցիչ Իգոր Կոնաշենկովը։

Ռուսական պետական լրատվամիջոցները, վկայակոչելով Լուգանսկի և Դոնեցկի իշխանություններին, հաղորդում են, որ Ուկրաինայի զինված ուժերը հրետանային զենքերից և ականանետներից կրակ են արձակել Լուգանսկի բնակավայրերի ուղղությամբ, նաև Գրադ կայանքից հրթիռներ են արձակել Դոնեցկի բնակավայրերի ուղղությամբ։

Այս ընթացքում շարունակվում են բանակցությունները Ռուսաստանի և Ուկրաինայի միջև։ Երկու երկրների պատվիրակությունների հանդիպումները վերջին օրերին տեղի էին ունենում տեսակապի միջոցով։ Սակայն Ռուսաստանի և Թուրքիայի նախագահների միջև հեռախոսազրույցի ընթացքում ձեռք բերված պայմանավորվածությունների համաձայն՝ մարտի 28-30-ը պատվիրակությունները կհանդիպեն Ստամբուլում։

Ռուսական անկախ լրատվամիջոցների տված հարցազրույցի ժամանակ բանակցություններին անդրադառնալիս Ուկրաինայի նախագահ Վլադիմիր Զելենսկին հայտնել է, որ իր երկիրը պատրաստ է գնալ չեզոքության, չմիանալ որևէ դաշինքի և այդ հարցի շուրջ հանրաքվե անցկացնել։

«Ինչ վերաբերում է անվտանգության երաշխիքներին և չեզոքությանը, մեր պետության ոչ միջուկային կարգավիճակին, ապա մենք պատրաստ ենք դրան։ Դա առաջին սկզբունքային կետն էր Ռուսաստանի Դաշնության համար։ Անվտանգության երաշխիքների փաստաթուղթը պետք է ստորագրվի, վավերացվի երաշխավոր երկրների խորհրդարանների կողմից», – ասել է Վլադիմիր Զելենսկին։

Ուկրաինայի նախագահը նաև հայտնել է, որ հարկավոր է փոխհամաձայնության գալ․ ռուսական զորքերը պետք է վերադառնան այն դիրքեր, որտեղից ամեն ինչ սկսվել է, որից հետո կողմերը փորձեն լուծել Դոնբասի բարդ հարցը։