«Գյումրի» բժշկական կենտրոնում կբացվի քիմիաթերապիայի նոր բաժանմունք

2021-ի սկզբին «Գյումրի» բժշկական կենտրոնին միավորվեցին Գյումրիի ծննդատունն ու պաթոլոգաանատոմիական դիսպանսերը, իսկ հունիս ամսից՝ ուռուցքաբանական դիսպանսերը և ինֆեկցիոն հիվանդանոցը: Բժշկական կենտրոնում շուտով կգործի  քիմիաթերապիայի նոր առանձնացված բաժանմունքը, որը տեղակայված է լինելու կենտրոնի նկուղային հարկաբաժնում։ Առայժմ օնկոլոգիական հիվանդները քիմիաթերապիայի կուրսն անցնում են կենտրոնի թերապևտիկ բաժանմունքում։ Նոր տարածքում  առանձին հիվանդասենյակ էլ կհատկացվի շարժողական խնդիրներ ունեցող հիվանդներին։

Քիմիաթերապիայից բացի, «Գյումրի» բժշկական կենտրոնում են իրականացվում բոլոր օնկոլոգիական բնույթի վիրահատությունները: Նախկին ուռուցքաբանական դիսպանսերի միավորումից հետո բժշկական կենտրոնում են կատարվում նաև բարդ վիրահատությունները, որոնց համար հիվանդները ստիպված էին հասնել այլ կլինիկաներ։

Բարդ վիրահատություններ տեղում կատարելու հնարավորությունների արդյունքում ավելացել է կենտրոն օնկոլոգիական հիվանդների դիմելիությունը, դրանով պայմանավորված՝ պետպատվերով տրամադրվող  գումարների վերանայման անհրաժեշտություն է առաջացել:

«Որոշ վիրահատություններ ընդհանրապես չեն եղել, օրինակ՝ օնկոգինեկոլոգիական, որը մենք սկսել ենք անել, որոշ եզակի բնույթ կրող վիրահատություններ ևս անում ենք, մեր կենտրոնի վիրահատարանները բավարարում են։ Ասեմ, որ հիվանդների հոսքն ավելացել է։ Նախկին մեկ միլիոն 700 հազար նախատեսված պետպատվերից արդեն հասել ենք 17 միլիոնի։ Վերանայման խնդիր կա, պատրաստվում ենք էդ հարցերը քննարկենք»,- նշել է «Գյումրի» ԲԿ տնօրեն Արմեն Իսահակյանը։

Ուռուցքաբանական հիվանդների վիրահատություններն ու բուժումը, որպես այդպիսին, կատարվում է անվճար, բայց երբեմն, կախված հիվանդի վիճակից, բուժումն իրականացվում է համավճարի սկզբունքով, երբ խիստ հարկավոր դեղորայքը պետության հատկացրած դեղերի ցանկում ներառված չէ: Մասնագետների մտահոգությունը մնում է օնկոլոգիական հիվանդությունների երիտասարդացման տենդենցը։

Հիվանդանոց են դիմում հիմնականում հիվանդության երկրորդ փուլում, հաճախ բուժման արդյունավետությունը նվազում է, երբ հետազոտությունների արդյունքում ախտորոշվում է  հիվանդության արդեն բարդացված ՝չորրորդ ու վերջին աստիճանը, որի դեպքում անգամ վիրահատական ու քիմիաթերապևտիկ միջամտությունները լինում են հակացուցված: Կանանց ու տղամարդկանց մոտ մասնագետներն առանձնացնում են առավել շատ ախտորոշվող  ուռուցքային հիվանդությունները:

«Եթե նախորդ տարիներին բաժանմունքի ծանրաբեռնվածությունը 60 տարեկանից հետո էր, հիմա կարծես թե 40-50 տարեկաններն են ավելի շատ դիմում, բավականին հիվանդություններ երիտասարդացել են։ Տղամարդկանց մոտ առաջին տեղում թոքի և շագանակագեղձի քաղցկեղն է, կանանց մոտ՝ ձվարանների և կրծքի քաղցկեղը։ Որոշ հիվանդություններ էլ կարծես թե հետ են նահանջել, օրինակ՝ ստամոքսի քաղցկեղ վերջին տարիներին ավելի քիչ է ախտորոշվում»,- նշել է «Գյումրի» ԲԿ ուռուցքաբանական ծառայության պատասխանատու Խաչատուր Աբրահամյանը։

Քիմիաթերապիայի և վիրաբուժական բաժանմունքների ծառայությունները  բժշկական կենտրոնում կընդլայնվեն, միայն ճառագայթային բուժումն է, որ կենտրոնացված է Երևանյան կլինիկայում։ Նախկին ուռուցքաբանական դիսպանսերում ճառագայթային բաժանմունք գործում էր, բայց հին սարքով, որով բուժման արդյունավետությունը խիստ ցածր էր, այդ պատճառով էլ ճառագայթային բուժումը մարզում դադարեցվեց:

Բժշկական կենտրոնին միավորված բուժհաստատություններից ուռուցքաբանական դիսպանսերը միակն էր, որ իր տեղում չշարունակեց գործել, այժմ շենքը հանձնված է պետգույքի կառավարման կոմիտեի տնօրինմանը: