Գյումրիի «Բարեկամության» զբոսայգու հանգստի գոտիներից մի քանիսի շինարարությունը կավարտվի սեպտեմբերին

Գյումրիի «Բարեկամության» զբոսայգու վերակառուցման  լայնածավալ շինարարությունը մարտ ամսից վերսկսվել է։ 7 հեկտար տարածքում արդեն երկու ամիս է շինարարությունն ընթանում է ամբողջ ծավալով։ Հարթեցումից, ամբողջ տարածքը աղբի հսկայական շերտից մաքրելուց հետո տարվում են ներքին ենթակառուցվածքների անցկացման աշխատանքներ: Տարածքում կառուցում են ջրհորներ և պոմպակայան: Ամբողջ այգին կունենա  նոր ու ժամանակակից  տեխնոլոգիաներով հագեցած ոռոգման համակարգեր:

Հնարավորինս կպահպանվեն այգում եղած ծառատեսակները, շինարարության ավարտից հետո կտնկվեն նոր թփեր ու էկզոտիկ ծառեր: Այգին կունենա առանձնացված գոտիներ երեխաների, մեծահասակաների, արհեստով, արվեստով, այգեգործությամբ ու սպորտով զբաղվողների համար:

Հանգստի գոտիները կունենան տաղավարներ, խաղահրապարակներ, որոնք  իրար կմիանան հնի և նորի համադրությամբ՝ ճարտարապետական հետաքրքիր լուծումներով: Նորի հետ մեկտեղ կվերականգնեն այգու հին ու  հայտնի բեմահարթակը, ինչպես նաև  մուտքի կամարները:

«Գաղափարապես երբ նայում ենք, այգու անունը ընկերության այգի է նշանակում, և դուք տեսնում եք ինչ ենք պլանավորել, դրա մեջ   ընդգրկված է մեր ամենամեծ առավելությունը, որ մենք հայկական այգի ունենք, որի մեջ ընդգրկված է և՛ ռուսականը, և՛ ֆրանսիականը, և՛ ուկրաինականը, և՛ ամերիկականը։ Տարբեր ազգերի ու տարբեր երկրների փորձը մենք ներդրել ենք»,- նշում է «Զբոսաշրջության և  քաղաքաշինության » բարեգործական հիմնադրամի հիմնադիր Ռուբեն Վարդանյանը։

Գործարար Ռուբեն Վարդանյանը վստահ է, որ այգին մեկ տարի անց կդառնա գյումրեցիների ու քաղաքի հյուրերի համար ամենասիրելի վայրերից մեկը: Պատմական-ճարտարապետական ժառանգությամբ հարուստ քաղաք նաև այգին տեսնելու համար են զբոսաշրջիկներն այցելելու:

Այգին կունենա 10 հազար քառակուսի մետր ճեմուղի, մի մասը  պատված կլինի տրավերտինով, գլաքարերով ու անգամ սոճու փայտով: Նախատեսվում է այգու առաջին փուլի շինարարությունն ավարտել սեպտեմբերին։

Այս տարի շինարարությանը զուգահեռ այգում կտեղադրվեն ատրակցիոնները,  կարուսելները, որոնք Գյումրի են բերվել դեռ 2-3 տարի առաջ: Բարեկամության այգու շինարարությունը գործարարին Գյումրի հաճախ այցելելու առիթ է տալիս։ Իսկ Գյումրիի հետ կապը երիտասարդ տարիներից է ստեղծվել, զինվորական ծառայության երկու տարիներն այս քաղաքում են անցել։

«Մենք ունենք շատ ծրագրեր Գյումրիում և Արցախում, որոնք շատ կարևոր են, մենք ունենք  ընդհանուր ծրագրեր Դիլիջանում, Նոյեմբերիանում, Տաթևում, տարբեր մարզերում։ Այս կերպ փորձում ենք բալանսը պահել։ Գյումրին ինձ համար առանձնահատուկ նշանակություն ունի, ես իմ ծառայության մեկ ու կես տարիները անցկացրել եմ այստեղ»,-ասում է Ռուբեն Վարդանյանը։

Շինարարության նույն տեմպերը կպահպանվեն մինչև տարեվերջ։ Այս պահին  աշխատանքների ընթացքին խանգարողը միայն այգու տարածքով անցնող բարձր լարման հոսանքի մալուխներն են, որոնց  տեղափոխման հարցին ևս արագ լուծում կտրվի։ Ռուբեն Վարդանյանը նախատեսում է այս տարի «Վարպետներ» խորագրով փառատոնն անցկացնել «Բարեկամության» այգու հիմնանորոգված տարածքում։ Աշնանը  փառատոնը այգում կմեկտեղի տարբեր ազգերի վարպետ ստեղծագործողներին: