Գյումրիի Կարա-Մուրզայի անվան երաժշտական քոլեջում բացվեց անվանի ջութակահար, պրոֆեսոր Հմայակ Դուրգարյանի անվան լսարանը

Գյումրիի  Կարա-Մուրզայի անվան պետական երաժշտական քոլեջում բացվեց ՀՀ վաստակավոր արտիստ, «Մոսկվայի Վիրտոուզներ» կամերային նվագախմբի ջութակահար և դիրիժոր, պրոֆեսոր Հմայակ Դուրգարյանի անվան լսարան։ Միջոցառմանը ներկա են գտնվել  անվանի դիրիժորը, նրա ընտանիքի անդամներն ու նրա արվեստի երկրպագուները։

80-ամյա Հմայակ Դուրգարյանը մասնագիտական կրթությունը Կարա-Մուրզայի անվան երաժշտական ուսումնարանում է ստացել և սկսել իր երաժշտական գործունեությունը։ Դաշնակահար մայրը ցանկանում էր, որ որդին շարունակի  իր մասնագիտությամբ, բայց  ընդունելության քննությունները գերազանց հանձնելուց հետո նա որոշում է ընտրել  ջութակի բաժինը։

Նախնական երաժշտական կրթությունը հարազատ քաղաքում ստանալուց հետո ուսումը շարունակում է Երևանի պետական կոնսերվատորիայում։ Երիտասարդ տարիներից սկսում է համագործակցել հայտնի երաժիշտների հետ, որպես մենակատար հանդես է գալիս աշխարահռչակ նվագախմբերի հետ, ստանձնում «Մոսկվայի Վիրտոուզներ» կամերային նվագախմբի երկրորդ դիրիժորը և ջութակահարը լինելու պատասխանատվությունը։

Հմայակ Դուրգարյանի կյանքի ու կենսագրության ակնթարթները, հայտնի երաժիշտների հետ համագործակցության դրվագները լուսանկարներով ներկայացված են երաժշտական քոլեջի  այն լսարանում, որն անվանի պրոֆեսորի ծննդյան 80-ամյակի առիթով անվանակոչվեց  նրա  անունով։

1969 թվականից ապրելով ու ստեղծագործելով արտերկրում, Հմայակ Դուրգարյանը միշտ պահել է կապն իր ծննդավայրի ու հարազատ կրթօջախի հետ։ Աշխարհի բոլոր բեմահարթակներից հպարտորեն հնչեցնում իր քաղաքի անունը, հաճախակի  այցելում իր  մանկության հուշերի քաղաքը։

«Ես ամեն գալուց ասում եմ, որ Լենինականը իմ սիրտն է, որտեղից որ այն հանեն, ես արդեն այն չեմ լինի, դրա համար իմ գալը ինձ համար եթե չասեմ հպարտություն է, ապա ոնց որ թե ես նոր ծնվեցի, ամեն իմ գալը Գյումրի ինձ համար նոր ծնունդ է»,- ասում է անվանի ջութակահարը։

Անվանի երաժիշտ-վիրտոուզի երազանքն է Գյումրիում զարգացնել ջութակի կատարողական արվեստը, նոր սերնդին փոխանցել  իր վարպետոթյունը։ Դիրիժորը պարբերաբար առցանց վարպետության դասեր է անցկացնում երաժշտական քոլեջի ուսանողների և դասախոսների համար։

«Ա՛, իմ փափագն է, որ էնքան լավանա էս ուսումնարանը, որ հսկայական կոնկուրս լինի, որպեսզի էստեղ գան սովորելու։ Շատ եմ ուզում, ուղղակի երազում եմ դրա մասին, որ մակարդակը բարձրանա էն մակարդակին, որ բոլորը պատիվ զգան, որ սովորել են այս երաժշտական քոլեջում»,- նշում է անվանի վիրտոուզը։

Միջոցառման ավարտին Հմայակ Դուրգարյանը իր ստորագրությունը թողեց լսարանի նկարներից մեկի անկյունում։ Նախատեսվում է Գյումրիում անցկացնել Հմայակ Դուրգարյանի անվան ջութակահարների միջազգային մրցույթ-փառատոն, որի ժամանակ Գյումրի կայցելեն աշխարհի լավագույն երիտասարդ  երաժիշտ-կատարողները։