Ժիրայր Սեֆիլյանի փաստաբանը մանրամասներ է ներկայացնում դատավարության ընթացքից

«Ժիրայր Սեֆիլյանի գործով պաշտպանության կողմը բազմիցս և միշտ հետևողականորեն հայտարարել է, որ Ժիրայր Սեֆիլյանի նկատմամբ իրականացվում է քաղաքական հաշվեհարդար, քաղաքական հալածանք, դա եղել է պաշտպանության կողմի անփոփոխ և հետևողական դիրքորոշումը»,-այս մասին այսօր լրագրողների հետ հանդիպման ժամանակ նշել է փաստաբան Մուշեղ Շուշանյանը: Նրա խոսքով՝ ասուլիսին եկել էր խոսելու այն մասին, որ Սեֆիլյանի նկատմամբ իրականացվող քրեական հետապնդումը և ընթացող դատավարությունը քաղաքական տարրեր են իրենց մեջ պարունակում: 

«Մենք ուզում ենք կոնկրետ փաստերով ցույց տալ, թե ինչպես է կարվել Սեֆիլյանի նկատմամբ քրեական գործը: Ուրեմն տիկին Սյուզանը խոսեց Սմբատ Գալոյան անունով երիտասարդի մասին, ես ասեմ, որ նա առանցքային անձ է Ժիրայր Սեֆիլյանին առաջադրված մեղադրանքի մեջ, որովհետև նա այն անձն է, ով ցուցմունք է տվել նախաքննության ընթացքում և պնդել է, որ իբր ինքը հանդիսացել է Ժիրայր Սեֆիլյանի կողմից, այպես ասած, կազմավորված խմբերից մեկի անդամ, թեպետ ընդունել է, որ երբևէ Ժիրայր Սեֆիլյանին չի ճանաչել, անձամբ չի հանդիպել և իր ցուցմունքում նշել է, որ, իր տեղեկություններով, եղել են շուրջ 300 անձինք տարբեր խմբերի անդամակցած, որոնք պետք է ինչ-ինչ զինված գործողություններ իրականացնեին: Հիմա տիկին Սյուզանը բացահայտեց, որ 2016 թվականի դեկտեմբեր ամսին այդ անձը մոտեցել է իրեն և Ալեք Ենիգոմշյանին, ներկայացել է, որ կան 300 հոգի զինված մարդիկ, ովքեր պատրաստ են գործողություն իրականացնել, ուղղակի սպասում են հրահանգի: Մենք, ի սկզբանե, պնդել ենք, հայտարարել ենք, որ Սմբատ Գալոյանը գործուղղված գործակալ է և նրա ցուցմունքներն իրականության հետ որևէ աղերս ունենալ չեն կարող: Ես ընդամենը Սմբատ Գալոյանի մասով հավելեմ նաև, որ դատարանն այդպես էլ հրաժարվեց նրան հրավիրել դատարան և Ժիրայր Սեֆիլյանին ու նրա պաշտպաններին հնարավորություն տալ այդ անձին հարցեր ուղղելու»,-ասել է փաստաբանը: 

Նա պատմեց նաև, որ քրեական գործում առկա է զենքերի ցուցակ պարունակող մի փաստաթուղթ, ինչպես նաև առկա են կոնկրետ անձանց անուններ.

«Օրինակ՝ գրված է «Պավլեին տված զենքերը», ինչ-որ «Բադարա Կարենին» և այլն, «Ժանային թողածը»: Հիմա մեղադրանքի կողմը սա ներկայացնում է իբրև ապացույց: Ես մի քիչ շեղվեմ և հիշեցնեմ, որ Ժիրայր Սեֆիլյանին երեք մեղադրանք է առաջադրված, այսինքն՝ զանգվածային անկարգությունների նախապատրաստություն, հրազենի և ռազմամթերքի, այսպես ասած, ապօրինի շրջանառություն, ինչպես նաև ամենավերջում, երբ նախաքննության ավարտի մասին պետք է հայտարարվեր, հենց նույն օրը նաև նոր մեղադրանք ավելացվեց՝ շենքեր շինություններ գրավելու փորձ»,-նշել է Մուշեղ Շուշանյանը:

Ըստ նրա՝ այդ փաստաթուղթը մեղադրանքի կողմը դատախազները ներկայացնում են որպես ապացույց, որ զանգվածային անկարգությունների ժամանակ պետք է նաև հրազեն կիրառվեր:

«Քրեական հետապնդումը լիովին շինծու է և մեղադրանքի հիմքում ընկած են բացարձակապես կեղծ ապացույցներ: Ո՛չ Սմբատ Գալոյանն է տվել իրականությանը համապատասխանող արժանահավատ ցուցմունքներ, ո՛չ էլ, ասենք, մյուս ապացույցները, որոնք ընկած են մեղադրանքի հիմքում: Մասնավորապես, զանգվածային անկարգությունների նախապատրաստության մեղադրանքի հիմքում ընկած ապացույցների մասին ես ասեմ, որ Ժիրայր Սեֆիլյանի երկու հրապարակային ելույթներն են ընկած»,- հայտարարել է փաստաբանը: