Մարտունի համայնքի Աստղաձոր գյուղում կառուցվել և շահագործման է հանձնվել 15,9 մեգավատտ ընդհանուր հզորության արևային ֆոտովոլտային 3 կայան

Գեղարքունիքի մարզի Մարտունի համայնքի Աստղաձոր գյուղում վերջին երկու տարիների ընթացքում կառուցվել և արդեն շահագործման է հանձնվել 15,9 մեգավատտ ընդհանուր հզորության արևային ֆոտովոլտային 3 կայան։

Մայիսի 25-ին կայաններ են այցելել և իրականացված աշխատանքներին են ծանոթացել Գեղարքունիքի մարզպետ Կարեն Սարգսյանը և Մարտունի համայնքի ղեկավար Հովհաննես Հովեյանը։ Ինչպես ներկայացրել է արևային ֆոտովոլտային կայանների համահիմնադիր Արմեն Ղարիբյանը, «Ա-Ս Էներջի» ՍՊԸ-ին պատկանող արևային կայանի դրվածքային հզորությունը կազմում է 5050 կիլովատտ ժամ, որի կառուցման համար ներդրվել է 3 միլիոն 420 հազար ԱՄՆ դոլար։ Կայանը զբաղեցնում է 7 հեկտար հողատարածք։

Այն գտնվում է Աստղաձորի հյուսիսային հատվածում, Սևանա լիճը գոտևորող անտառի հարևանությամբ։

Նույն տարածքում է գտնվում նաև երկրորդ կայանը, որը պատկանում է «Բարի Արև» ՍՊԸ-ին։ Կայանի դրվածքային հզորությունը կազմում է 5600 կիլովատտ ժամ, որի կառուցման համար ներդրվել է 3 միլիոն 400 հազար ԱՄՆ դոլար։ Կայանը զբաղեցնում է 7,5 հեկտար հողատարածք։

Նշված երկու կայանների կառուցման լիցենզիան տրվել է 2018 թվականին, իսկ շինարարությունը մեկնարկել 2020 թվականին։ Համավարակի և Արցախյան վերջին պատերազմի պատճառով շինարարական աշխատանքները ժամանակավորապես դադարեցվել են, ինչի հետևանքով էլ կայաններն ընդհանուր ցանցին միացվել են 2021 թվականի նոյեմբերին։

Արևային ֆոտովոլտային երրորդ կայանը, որը պատկանում է «Պրոմ Սան» ՍՊԸ-ին և կրում է «Պրոմսինթեզ» անունը, գտնվում է Աստղաձորի հարավարևմտյան հատվածում և զբաղեցնում է 5,5 հեկտար հողատարածք։ Կայանի դրվածքային հզորությունը կազմում է 5250 կիլովատտ ժամ, որի կառուցման համար ներդրվել է 3 միլիոն 750 հազար ԱՄՆ դոլար։ Կայանի կառուցման լիցենզիան տրվել է 2018 թվականի նոյեմբերին, իսկ շինարարական աշխատանքները մեկնարկել են 2021 թվականի մարտից։ Կայանն ընդհանուր ցանցին կմիացվի առաջիկա օրերի ընթացքում։ Ի դեպ, այն Գեղարքունիքի մարզում առաջին արևային ֆոտովոլտային կայանն է, որը կառուցվել է արհեստական բանականությամբ և արևին հետևող համակարգով, ինչը մաքսիմալ արդյունավետ է դարձնում կայանի արտադրողականությունը։ Կայանները կառուցվել են «Բիբլուս» բանկի միջոցներով։

«Շինարարության ընթացքում բացվել է մինչև 40 ժամանակավոր, իսկ կայանների շահագործումից հետո՝ մինչև 15 հիմնական աշխատատեղ։ Բացի այդ, կայանների տարածքում տեղադրված վահանակների շնորհիվ առաջացած առատ բուսածածկույթը արոտավայր է ծառայում ոչխարի հոտերի համար։ Ասել է, թե արևային կայանների կառուցմամբ ոչ միայն չեն կրճատվում գյուղնշանակության հողերը կամ արոտավայրերը, այլ շարունակում են ավելի արդյունավետորեն ծառայել իրենց նպատակին։ Մենք Գեղարքունիքի մարզի այլընտրանքային էներգիայի արտադրության ոլորտում ներդրումային նոր ծրագրերի իրականացման նպատակ ունենք»,- նշել է կայանների համահիմնադիր Արմեն Ղարիբյանը։

Կայանների կառուցման և շահագործման մասին իր տպավորություններն է ներկայացրել Գեղարքունիքի մարզպետ Կարեն Սարգսյանը։

«Գեղարքունիքի մարզի այլընտրանքային էներգիայի արտադրության ոլորտը հարստացավ նոր խոշոր կայաններով, և նոր դրվածքային հզորության կայանների շահագործումը համոզում է մեզ, որ հեռանկարային համարվող այս ճյուղը առաջ է շարժվում բավականին հուսալի քայլերով՝ միաժամանակ ենթադրելով նոր խոշոր ներդրումներ ու տնտեսության զարգացում։ Կայանների հիմնադիրների հետ մենք քննարկեցինք համագործակցային մի շարք ծրագրեր, որոնք կարող են առաջիկայում դրվել գործողության մեջ և ապահովեն փոխշահավետ համագործակցություն»,- նշել է Գեղարքունիքի մարզպետ Կարեն Սարգսյանը։