Գյումրիի «Բարեկամության» այգու մանկական խաղահրապարակի  արտօբյեկտները նախագծում են գյումրեցի ուսանողները

Գյումրեցի ուսանողները նախագծում են վերակառուցվող «Բարեկամության» այգու մանկական խաղահրապարակի ատրակցիոններն ու արտօբյեկտները: Քաղաքաշինության և զբոսաշրջության» հիմնադրամի (TUF) հետ բուհերի մասնագիտական բաժիններում սովորող ուսանողների համագործակցությունը սկսվել է ստորագրված հուշագրով, որով հնարավորություն է ընձեռվել մասնագիտական ճարտարապետական հանձնաժողովին ներկայացնել այգու մանկական խաղահրապարակի ձևավորման ստեղծարար գաղափարներ:

Գեղարվեստի պետական ակադեմիայի Գյումրիի մասնաճյուղի «Դիզայն» մասնագիտությամբ սովորող ուսանողներին ամիսներ առաջ հանձնարարվել էր նախագծել «Բարեկամության» այգու մանկական խաղահրապարակի խաղասարքերը։ Առաջադրանքն ունեցել է հստակ պահանջներ՝ խաղասարքերը պետք է լինեն անվտանգ, գունեղ ու ապահովեն մանուկների ֆունկցիոնալ շարժունակությունը:

Երիտասարդների  ներկայացրած ինժեներական գաղափարները նախնական ուսումնասիրության են ենթարկվել,  ճարտարապետների հանձնաժողովն ընտրել է առավել հետաքրքիր ու իրատեսական մոդելները, որոնք հեղինակներն ավելի են կատարելագործել։

«Ստացել եմ մանկական խաղահրապարակի օբյեկտների նախագծման առաջադրանքներ, իմ պրոյեկտը վերաբերում է 3-4 տարեկան երեխաներին։ Փորձել եմ նախագծիս մեջ ավելի շատ գործողություն կիրառել, այսինքն՝ ստատիկ վիճակից փորձել եմ դուրս հանել  պրոյեկտը, որպեսզի երեխաներին ավելի հետաքրքիր լինի»,- իր նախագիծն է ներկայացնում Գեղարվեստի ակադեմիայի Գյումրիի մասնաճյուղի ուսանող Նարե Սահակյանը։

Խաղային ատրակցիոնների եռաչափ մոդելավորումների տարբերակներն են ներկայացրել նաև Հայաստանի Ազգային պոլիտեխնիկական համալսարանի ուսանողները: Մինչ այդ քաղաքաշինության և զբոսաշրջության հիմնադրամը ուսանողներին է ներկայացրել պահանջվող խաղասարքերի ու մանկական հանգստի գոտիների նախնական կոնցեպտները, որոնց տարբերակով էլ  ստեղծվել են ինժեներական  նախագծերը: Խաղասարքերից բացի, ուսանողները մոդելավորել են  հեքիաթային տնակներ, որոնք տեղադրվելու են այգու տարբեր հատվածներում և լինելու են բազմաֆունկցիոնալ:

«Մեր  ուսանողների նախագծած մանկական տնակները նման են  «Երեք խոզուկներ»  հեքիաթի տնակներին ՝ պետք է լինեն ծղոտից, քարից ու փայտից։ Ամրության համար տնակները կլիեն մետաղյա կոնստրուկցիաներով, անվտանգությունը կապահովենք ռետինե ներքնակների միջոցով։ Ունենք նաև տնակներ, որոնք ունեն սունկի տեսք, ֆունկցիոնալ են ու շատ գունեղ»,- ասում է ՀԱՊՀ արտաքին կապերի պատասխանատու Սոնա Հարությունյանը։

Տնակներից, խաղասարքերից բացի ուսանողները նախագծել են մանկական խաղահրապարակի լուսամփոփների ու դեկորատիվ ծառերի տարբերակներ, որոնք  կպատրաստվեն գունավոր ապակիներից, ֆոսֆորային լուսարձակներից և անգամ վերամշակված պլաստիկի թափոններից: Բոլոր ինժեներական նախագծերում և արտօբյեկտներում ուսանողներն օգտագործել են նաև հայկական ճարտարապետությանը բնորոշ էլեմենտներ, հայտնի հուշարձանների նույնօրինակ տարբերակներ:

«Ուսանողները ներկայացրել են շատ ֆանտաստիկ գաղափարներ, որոնցից մեկն էլ հայկական «Քարահունջի» տարբերակով  զբոսայգում կունենանք փոքր պատկեր, որտեղ որ ներսում պետք է լինեն  լուսավորված քարեր, որպեսզի հեռվից շատ ավելի վիզուալ գեղեցիկ պատկեր ստացվի։ Այսօրինակ շատ  հայկական ճարտարապետական էլեմենտներ են օգտագործել ուսանողներն իրենց գաղափարների մեջ և փորձել են  պահպանել ավանդական ճարտարապետական էլեմենտներ՝ տալով նրանց մոդեռնիստական նոր շունչ ու նոր մոտեցումներ»,- նշում է «Բարեկամության» զբոսայգու վերականգնման ծրագրի համակարգող Էմմա Բաղդասարյանը։

Գյումրիում մեծ նախագծին մասնակից դառնալը մեծ փորձ ու գիտելիքներ կփոխանցի  ծրագրում ներառված  բոլոր ուսանողներին, որոնք կներգրավվեն նաև իրենց ինժեներական նախագծերով  ստեղծված խաղասարքերի պատրաստման գործընթացին:

Այլ բուհերի ուսանողների համար ևս հիմանդրամը ընձեռում է բացառիկ հնարավորություն՝ մասնակցել այգու  հանգստի գոտիների ձևավորմանը: Ամռանը հետաքրքիր գաղափարներ ունեցող երիտասարդների համար կկազմակերպվի հատուկ կրթական դասընթաց, որի ընթացքում մասնագետների խորհուրդներով կստեղծվեն ինժեներական ինքնատիպ նախագծեր:

Մասնակիցների հետ աշխատելու է Միացյալ նահանգներից հրավիրված ճարտարապետ: Դասընթացների տեսական մասը կանցկացվի հեռավար, իսկ գործնականը կլինի Գյումրիում: Բուհերի ուսանողների և դասընթացի մասնակիցների ստեղծած ինժեներական  նախագծերի հիման վրա շուտով կսկսվեն խաղասարքերի պատրաստման աշխատանքները, որոնց մի մասը զբոսայգում կտեղադրվեն աշնանը: