Հենրիխ Մխիթարյանը ինձ համար եղել և մնում է ֆավորիտ․ Վահան Բիչախչյանը Գյումրիում պատանի ֆուտբոլիստներին պատմել է իր մարզական կարիերայի մասին

Այսօր Հայաստանի ազգային ագրարային համալսարանի Շիրակի գյուղատնտեսական քոլեջում հանդիպում էր կազմակերպվել Հայաստանի ֆուտբոլի հավաքականի և Լեհաստանի «Պոգոնի» կիսապաշտպան Վահան Բիչախչյանի հետ։ Վահանը քոլեջի մենեջմենթի բաժնում մի քանի տարի առաջ է սովորել։ Սպորտային կարիերան ու մասնագիտությունը խոստումնալից ֆուտբոլիստն այդպես էլ չի կարողացել համատեղել։ Կարճ ժամանակ անց  հրավեր է ստանում Սլովակիայի «Ժիլինա» ակումբից։ Ուսումը կիսատ թողնելով՝ մեկնում է Սլովակիա։ Տարիներ անց  հարազատ քոլեջում արդեն դիմավորում են կայացած ֆուտբոլիստի։

Հայաստանի հավաքականի և լեհական «Պոգոնի»  լավագույն ֆուտբոլիստի հետ հանդիպման եկած ուսանողներին ու պատանի ֆուտբոլիստներին հետաքրքրում էին, թե որոնք են այն կարևոր հատկանիշները, որոնց շնորհիվ հնարավոր է եղել սպորտում հաջողության հասնել։

Հարցուպատասխանի ավարտից հետո քոլեջը խորհրդանշական նվերներ հանձնեց ֆուտբոլիստին, նա էլ  իր ստորագրությամբ մարզական շապիկներ՝ ուսանողներին։ Վահանը մի քանի օրով է եկել հարազատ քաղաք, փորձում է հանդիպումների ու ջերմ զրույցների միջոցով հաղթահարել այն կարոտը, որը զգում է արտերկրում ապրելու ընթացքում։

Վահան Բիչախչյանը մոտ 3 տարի է՝ հանդես է գալիս Հայաստանի ֆուտբոլի  ազգային հավաքականի կազմում, պատասխանատվությամբ է մասնակցում հավաքականի բոլոր խաղերին։ Իսկ թե ինչու ազգային հավաքականին չի հաջողվում հաղթական գոլերով ոգևորել երկրպագուներին, երիտասարդ ֆուտբոլիստը կարծում է, որ դա սպորտային բախտից բացի, նաև ծանրաբեռնված գրաֆիկով հանդիպումների արդյունք է։

«Այդպիսի հավաքականների դեմ խաղալուց առաջ պետք է առավելագույնս պատրաստ լինել, որպեսզի կարողանաս հասնես ցանկալի արդյունքի, բայց այս անգամ ցանկալի արդյունքներ չգրանցվեցին թե՛ ուկրաինական, թե՛ շոտլանդական թիմերի հետ խաղերում։ Այստեղ մի քիչ նաև բախտի գործոնը կար, որն ավելի շատ հակառակորդի կողմից էր։ Պետք է շարժվենք առաջ, պատրաստվենք հաջորդ մրցաշարին, որ կարողանանք շտկել այն սխալները, որն արել ենք ու ավելի լավ պատրաստվենք հաջորդ խաղերին»,- ShantNews-ի հետ զրույցում ասել է Վահան Բիչախչյանը։

Հայաստանի հավաքականի հաղթանակները դեռ առջևում են, վստահեցնում է երիտասարդ ֆուտբոլիստը, որը լեհական «Պոգոն»-ի կազմում այս տարի իր ֆանտաստիկ գոլերի ու գոլային փոխանցումների շնորհիվ ճանաչվել է նաև մրցաշրջանի լավագույն ֆուտբոլիստ։

Վահանը բակային ֆուտբոլից է անցում կատարել պրոֆեսիոնալ ֆուտբոլին, մարզվել հոր՝ Վարդան Բիչախչյանի ղեկավարած «Շիրակ» ֆուտբոլային ակումբում։ Իր համար մշտապես ֆավորիտ է հանդիսացել Հենրիխ Մխիթարյանը։ Այսօր էլ Վահանին շատերը անվանում են երիտասարդ Հենրիխ։

«Միանշանակ շարունակում է ինձ համար Հենրիխը մնալ կուռք և՛ որպես ֆուտբոլիստ, և՛ թե որպես մարդ։ Միանշանակ, Հենրիխի անցած ճանապարհը, կարելի է ասել, մոտիվացնում է երիտասարդ շատ ֆուտբոլիստների և անձամբ ինձ, նրա օրինակով պիտի հասկանանք, որ  անհնարին ոչինչ չկա սպորտում և կյանքում»,- ասել է ՀՀ ֆուտբոլի ազգային հավաքականի կիսապաշտպանը։

Այժմ 22-ամյա ֆուտբոլիստն է շատերի համար համարվում ֆավորիտ, շատերն են ձգտում  իրենց խաղային տեխնիկայով ու փոխանցումներով կրկնօրինակել Վահան Բիչախչյանին։ Գյուղատնտեսական քոլեջի բակում գյումրեցի պատանի ֆուտբոլիստների հետ հանդիպմանը խորհուրդ տվեց գնալ նպատակների հետևից ու հնարավորինս շատ մարզվել։

Երկու օրից Վահանը կրկին կմեկնի Լեհաստան, կմիանա իր թիմի մարզումներին ու նախատեսված խաղերին։ Հայաստան այցը կլինի աշնանը, ֆուտբոլի ազգային հավաքականի նոր մրցաշրջանի խաղերին մասնակցելու համար։