Մշակութային ոլորտի օրակարգային հարցերը՝ քննարկման թեմա ԿԳՄՍ նախարարի տեղակալի հետ․ Արայիկ Խզմալյանը հանդիպել է Շիրակի մարզի մշակույթի և արվեստի կենտրոնների ներկայացուցիչների հետ

Մշակույթի ոլորտում ունենք խնդիրների մի մեծ կծիկ և աստիճանաբար պետք է փորձենք  քանդելով հարթենք բոլոր խնդիրները։ Շիրակի մարզի մշակույթի ու արվեստի ոլորտի ներկայացուցիչների հետ հանդիպման սկզբում նշել է ԿԳՄՍ նախարարի տեղակալ Արայիկ Խզմալյանը, ապա անդրադարձել է կառույցների հետ համագործակցությանը, որի արդյունքում են ի հայտ գալիս եղած խնդիրները։ Գյումրիում գործող պետական համույթների հետ աշխատանքը գնահատում է նախարարի տեղակալը։

 «Ուղղակի բացառիկ է, որ համայնքն ունի սիմֆոնիկ նվագախումբ, սա քաղաքակրթության չափանիշ է, սա մշակութային  միջավայր և հանրություն լինելու չափանիշ է, այսինքն՝ դասական արժեքների տարածման ամենաբարձր հարթակը։ Բայց ասել, որ ես բավարարված եմ մեր համագործակցությամբ Գյումրիի սիմֆոնիկ նվագախմբի հետ, ո՛չ, մենք այստեղ իսկապես շատ անելիք ունենք»,- նշել է ԿԳՄՍ նախարարի տեղակալը։

«Թույլ տվեք ես էլ ասեմ, որ մարզպետարանն էլ այդքան գոհունակություն չունի նախարարության հետևողականությունից, որովհետև սիմֆոնիկ նվագախումբն առ այսօր շենք չունի, որտեղ փորձերը կկարողանան իրականացնել, ավելին, Գյումրին չունի համերգասրահ»,- իր խոսքում նշել է Շիրակի մարզպետ Նազելի Բաղդասարյանը։

Արայիկ Խզմալյանն առաջարկել է պետական սիմֆոնիկ նվագախմբի շենքի հարցը դարձնել շահագրգիռ կողմերի մասնակցությամբ քննարկումների թեմա։ Շենքայինից բացի, նվագախումբն ունի նաև նոր երաժշտական գործիքներով համալրելու կարիք։

Նվագարաններով համալրման կարիք ունի նաև Գյումրիի ժողգործիքների պետական նվագախումբը։ Հատկապես հին ազգային նվագարանների հանդեպ հետաքրքրությունը նվազել է, նվագախումբն ունի կատարող  երաժիշտների սերնդափոխության լուրջ խնդիր։

«Մենք խնդիր ունենք թառ և քամանչա նվագարանների հետ կապված։ Եթե էս տեմպերով գնա, մոտ 5-10 տարի հետո մենք խնդրի առաջ կկանգնենք, որովհետև էս սերունդը չի հետաքրքրվում  նվագարաններով, հաճախելիությունը շատ քիչ է»,- ասել է Գյումրիի ժողգործիքների պետական նվագախմբի դիրիժոր Կարեն Մայիլյանը։

Ազգային նվագարաններ  դասավանդող  մասնագետների խնդիր  մարզի արվեստի դպրոցներում ևս կա, երաժիշտները  հրաժարվում են գյուղական համայնքներում  գործող  արվեստի դպրոցներում աշխատել։ Հանդիպմանը ներկա համայնքապետարանների մշակույթի բաժինների ներկայացուցիչներն էլ հետաքրքրվել են՝ արդյոք նախարարությունը ծրագրո՞ւմ է դեռ խորհրդային տարիներին կառուցված մշակույթի մեծ տներն ու դահլիճները վերակառուցել։  Նախարարի տեղակալը նշել է, որ այս դեպքում  պետք  է  հիմնավորել  կառույցի բովանդակային կիրառության անհրաժեշտությունը։

«Հին մշակույթի տների համատարած վերակառուցման ու նոր ուռճացված աշխատակազմեր ձևավորելու անհրաժեշտություն այս պահին դեռ չկա, փոխարենը պետք է ստեղծել այնպիսի միջավայր, որ հնարավորություն ունենանք հանրությանն ու զբոսաշրջիկներին ցուցադրել մեր  պատմական ժառանգությունն ու  գտածոները»,- շեշտել է նախարարի տեղակալը։

Նոր թանգարանների կամ  ժամանակակից լուծումներով  նոր հարթակների ստեղծման անհրաժեշտություն կա հանրապետության բոլոր մարզերում։ Պատմական-հնագիտական խոշոր ու եզակի ժառանգություն է պահպանում Շիրակի երկրագիտական թանգարանը, որն դեռ մշտական ցուցադրության տարածք չունի։ Թանգարանի շենքի հարցը քննարկվել է մարզպետարանում։

Կերպարվեստի ոլորտի ներկայացուցիչներն էլ Գյումրիում պատկերասրահ ունենալու անհրաժեշտությունն են շեշտել  և առաջարկել են առավել մեծ ուշադրություն դարձնել մարզերում ստեղծագործող նկարիչներին։ Խզմալյանը նաև հայտնել է, որ այս տարի մշակույթի ոլորտին հավելյալ 44 միլիարդ դրամ գումար է հատկացվել և մշակութային կառույցներին առաջարկել է նախարարություն դրամաշնորհային հայտեր ներկայացնել սահմանված ժամկետներում։