Հայաստանի ներքին իրավիճակն ազդում է արցախյան բանակցությունների վրա. Կազիմիրով

Վերջին շրջանում Հայաստանում կատարվող իրադարձությունները և ուժային կենտրոնների միջև հարաբերությունների սրումն ազդում է Արցախյան հակամարտության կարգավորման բանակցություններում Երևանի ազդեցության վրա։ Այս մասին իր հոդվածում գրել է ԵԱՀԿ Մինսկի խմբի ռուսական կողմի նախկին համանախագահ, 1992-1996 թվականներին Արցախյան կարգավորման հարցով ՌԴ նախագահի հատուկ ներկայացուցիչ Վլադիմիր Կազիմիրովը։

Նրա խոսքերով`Ադրբեջանում թեև կա փող, բայց կա դրա անհավասար բաշխում, ինչի պատճառով իշխող վերնախավը աղքատներին ստիպված է «կերակրել» հայրենասիրական ճառերով ու հայերին հաղթելու հայտարարություններով։ Սակայն նրանք էլ, ըստ Կազիմիրովի, հասկանում են, որ պատերազմը կործանարար կարող է լինել ոչ միայն երկրի, այլև հենց իրենց՝ իշխողների համար։ Այդ պատճառով էլ հաճախ դիմում են ոչ թե լայնամասշտաբ պատերազմի, այլ ուժի ցուցադրման կամ բանակցային գործընթացի խափանման գործողությունների։

Կազիմիրովի պնդմամբ`մինչև վերջերս հաստատուն էր Հայաստանի դիրքորոշումը՝ կարգավորման գործընթացից բացառել ռազմական լուծումը։ Սակայն Նիկոլ Փաշինյանի՝ իշխանության գալն իր հետ բերեց նորություն. Հայաստանի նոր իշխանությունը պահանջում է, որ բանակցային գործընթացին միանա նաև Ստեփանակերտը, ու վերականգնվի բանակցությունների եռակողմ ձևաչափը։

Կազիմիրովի խոսքով` սա տրամաբանական է, քանի որ ի սկզբանե հակամարտության կարգավորման գործընթացին առանձին մասնակցություն են ունեցել նաև Լեռնային Ղարաբաղի իշխանությունները։Նրանք են մասնակցել 1994-1995 թվականների հրադադարի հաստատման ու ամրապնդման մասին համաձայնագրերի ստորագրմանը։ Մինչ այդ էլ Բաքուն հենց Ստեփանակերտի հետ է վարել հրադադարի մասին բանակցությունները։

Սակայն Հայաստանում այս օրերին կատարվում են իրադարձություններ, որոնք խաթարում են հայկական կողմի միասնականությունը, որովհետև տարբեր ուժեղ գործիչների միջև հակասություններ կան։ Սա Երևանին թույլ չի տալիս ուժեղ դիրքերից հանդես գալ բանակցությունների ընթացքում, և հիմա Բաքուն հայկական կողմին սկսել է մեղադրել բանակցությունները ձգձգելու մեջ։

Կազիմիրովն այս իրավիճակից մեկ ելք է տեսնում՝ Հայաստանի բոլոր ներկա ու նախկին ղեկավարները՝ Լևոն Տեր-Պետրոսյանը, Ռոբերտ Քոչարյանը, Սերժ Սարգսյանը և Նիկոլ Փաշինյանը պետք է նստեն սեղանի շուրջ, մի կողմ դնեն իրենց հաշիվներն ու ապագային միտված որոշումներ ընդունեն՝ Արցախյան հիմնահարցի կարգավորման համար։