Միջին նորոգման աշխատանքներ են հանրապետական նշանակության Գյումրի-Կապս-Ամասիա ավտոճանապարհին

Նորոգվում է հանրապետական նշանակության Գյումրի-Կապս-Ամասիա ավտոճանապարհը։ Մոտ 11 կմ երկարության ճանապարհն անցնում է Մարմաշեն, Վահրամաբերդ և Կապս բնակավայրերով։ «Ճանապարհային դեպարտամենտ հիմնադրամ»-ը ուսումնասիրություններ է կատարել նշված հատվածում և տվել եզրակացություն, որ ճանապարհը ենթակա է միջին նորոգման, ըստ այդմ՝ կատարվում է մասնակի կամ ոչ հիմնային նորոգում, որն համարվում է քիչ ծախսատար և արդյունավետ։ Ծրագիրն իրականացվում է պետական բյուջեի միջոցներով։

Հանրապետական նշանակության ճանապարհին ասֆալտաշերտի ճաքերն ու փոսերը կազմում են ճանապարհի վնասվածության մոտ 60 տոկոսը։ Անցած տարիներին ևս նույն ճանապարհին ընթացիկ նորոգումներ են կատարվել։ Հիմա միջին նորոգում ասվածը ենթադրում է ճանապարհային պատվածքի ծածկի ֆրեզում՝ քերում, հետո նոր ասֆալտաշերտի անցկացում։ Այն հիմնային նորոգումից տարբերվում է, գրունտային մաս չի հասնում, ճանապարհի ներկա վիճակը թույլ է տալիս առանց հիմքի հեռացման ավտոճանապարհը նորմալ երթևեկելի դարձնել։

«Երբ որ հիմնանորոգում ենք անում, ասֆալտի ծածկն ամբողջությամբ քանդում ենք, հետո շերտերով՝ ավազակոպճային շերտ, խիճ, խոշորահատիկ, ապա մանրահատիկ ասֆալտ ենք անում, իսկ էստեղ մենակ ճանապարհի վերին շերտը հանելով՝ ստանում ենք գրեթե նույն էֆեկտը, ավելի քիչ ծախսերով»,- ասում է ՀՀ ՏԿԵՆ «Ճանապարհային դեպարտամենտ հիմնադրամ»-ի շահագործման բաժնի տարածքային համակարգող-ինժեներ Վահրամ Նորեկյանը։

Միջին նորոգման աշխատանքներն, ամեն դեպքում, միայն ասֆալտի ծածկույթի վերին շերտի թարմացում չի նախատեսում։ Որոշ հատվածներում, հիմնայինի գործ էլ է բացվում։ Ոչ մեծ մակերեսով, բայց փոսային նորոգումներ ևս կատարում են, որտեղ ճանապարհի հիմքերը թույլ են, շինարարը ամրացումներ է անում։

«Ճանապարհն ուսումնասիրել ենք ու այն տեղերում, որտեղ զգում ենք խաղացող հատվածներ կան, հիմքերը թույլ են, քանդում ենք, հիմքերը փորում ենք ու ամուր հիմքեր ենք տեղադրում»,- ասում է «Լեոպոլդ եվ ընկերներ» ՍՊԸ աշխղեկ Էդգար Ղազարյանը։

11 կմ երկարության ավտոճանապարհի մոտ 1600 քառակուսի մետր մակերեսով հատվածում հիմքերը ենթակա են ամրացման։ Մյուս տեղերում ճանապարհային պատվածքի ծածկի քերում և ասֆալտապատում է կատարվում։

Հանրապետական նշանակության նորոգվող ճանապարհն անցնում է 3 ՝ Մարմաշեն, Վահրամաբերդ, Կապս գյուղերով։ Այն կմիանա սուբվենցիոն ծրագրով ասֆալտապատվող Ամասիայի ճանապարհահատվածին։

Ավտոմոբիլային ճանապարհի նորոգումից հետո փողոցի լայնությունը նույնն է մնալու, ունենալու է հիմնականում 8, որոշ տեղերում՝ 7 մետր լայնություն։ Կողնակների ավազակոպճային շերտը ևս կթարմացվի։ Նախատեսվում է ազդանշանային սյուների լրացում ևս։

«Երկաթբետոնե այս սյուներն արդեն իրենց դարն ավարտում են, ու տարիներ հետո այլևս նման սյուներ դուք չեք տեսնի ճանապարհներին։ Արդեն 4-րդ տարին է մենք անցել ենք պլաստիկե սյուներին։ Դրանք անվտանգության էլեմենտներ են, որոնց սպասարկումը այնքանով է հեշտ, որ կողնակներին ուղղակի փորում ենք ու տեղադրում, իսկ հները տեղադրելիս բետոնապատում էինք»,- նշում է  «Ճանապարհային դեպարտամենտ հիմնադրամ»-ի շահագործման բաժնի տարածքային համակարգող-ինժեներ Վահրամ Նորեկյանը։

Հանրապետական նշանակության բոլոր ճանապարհների նորոգումների ընթացքում երկաթբետոնյա սյուները հանվում են, փոխարինվում են պլաստիկե լուսարձակող վահանակներով։ Դրանք համարվում են հեշտ սպասարկվող ու վթարների դեպքում արագ վերականգնվող, իսկ վթարներից խուսափելու համար ճանապարհային երթևեկության կարգավորման նշանների տեղադրումը պարտադիր է, արագության գերազանցումներից խուսափելը՝ ևս։ Ճանապարհաշինական ծրագիրն իրականացվում է պետական բյուջեի միջոցներով։