Շիրակի մարզի 176 ուսուցիչներ մասնակցում են ՇՊՀ-ի պարտադիր վերապատրաստումներին 

ԿԳՄՍ նախարարության երաշխավորությամբ Շիրակի պետական համալսարանը հերթական ատեստավորման ենթակա ուսուցիչների վերապատրաստում է անցկացնում։ Նեղ մասնագիտական, առարկայական կրթությունից բացի, վերապատրաստման ընթացքում ուսուցիչները գիտելիքներ են ստանում կամ թարմացնում հանրակրթության պետական չափորոշիչի հիմնական դրույթների, ծրագրերի, դասավանդման մեթոդների ու գնահատման համակարգի մասին:

Սա 5 տարին մեկ մանկավարժների համար պարտադիր գործընթաց է, որին հաջորդում է նաև պարտադիր ատեստավորումը։ Այն ուսուցիչներին թույլ է տալիս որակավորում ստանալ և շարունակել աշխատանքը դպրոցում։ Մինչև նոր ուսումնական տարվա մեկնարկը 12 մասնագիտություններով պարտադիր կվերապատրաստվեն 176 ուսուցիչներ։

Տարիքային հոգեբանություն, ներառական կրթություն, հանրակրթության ոլորտի օրենսդրություն, դիրքորոշում և արժեք, սրանք այն ընդհանրական թեմաներն են, որոնց մասին քննարկումներն ու վերլուծությունները հերթական պարտադիր ատեստավորման մասնակից մանկավարժների համար են։ Երկարամյա մանկավարժական փորձ ունեցողներն այս գործընթացը համարում են կրթության ժամանակակից պահանջներին պատրաստ լինելու հնարավորություն։ Առարկաների դասավանդման մեթոդները փոխվում են արագ, պահանջներն էլ ավելանում են։

Ուսուցիչների պարտադիր վերապատրաստման գործընթացն, ըստ էության, միտված է հանրակրթության ոլորտում ունենալ ժամանակակից մոտեցումներին տիրապետող, որակյալ մանկավարժներ, սակայն դա չի կարող լուծել այն հիմնական ու ցավոտ խնդիրը, որը տարեցտարի ավելի է խորանում։ Խոսքը վերաբերում է դպրոցներում տարբեր մասնագիտությունների գծով ուսուցիչների զգալի պակասին։ Ըստ վիճակագրության, վերջին 1 տարում Հայաստանում ուսուցիչների թիվը նվազել է մոտ 900-ով։ Մանկավարժական  բուհեր ընդունվողների թիվն է կտրուկ նվազել և հետո շատերը չեն ուզում մտնել դպրոց՝ հատկապես երիտասարդները։

«Մանկավարժների նկատմամբ մենք միշտ ունեցել ենք յուրահատուկ ուշադրություն։ Ես շատ հեռու չեն գնում՝ մոտ 20 տարի առաջ, ուսուցչի նկատմամբ հանրության վերաբերմունքը այլ էր, հիմա բոլորովին այլ է, սա շատ ցավով եմ ասում, որ էդ բացառիկ հարգանքը կորցնելուց զատ, նաև ֆինանսական խնդիրներ առաջացան ուսուցիչների համար»,- ասում է ՇՊՀ վերապատրաստումների պատասխանատու Մեսրոպ Ղալաչյանը։

Շիրակի պետական համալսարանը որպես մանկավարժական բուհ այս ուսումնական տարում նոր ուսանողներ չի ունենա «Մաթեմատիկա», «Ֆիզիկա», «Քիմիա» բաժիններում։ Սա վերջին տարիների տխուր վիճակագրությունն է ոչ միայն Գյումրիի, նաև Հանրապետության բուհերի։ Բնագիտամաթեմատիկական մասնագիտությունների գծով ցուցանիշները բուհերում վատագույնն են։

«Ցավում եմ, բայց էդպես է, որ ֆիզիկամաթեմատիկական գիտությունները, մեզ մոտ շատ-շատ կաղում են ոչ միայն  Գյումրիում, այլ նաև ամբողջ Հանրապետությունում։ Սա պետականորեն մտածելու տեղիք է տալիս, որովհետև պետությունը չի կարող հաջողություն ունենալ, եթե դպրոցը թույլ է։ Դպրոցը պետք է ուժեղացնել ու հիմնականում ճշգրիտ գիտությունների հաշվին»,- նշում է ՇՊՀ վերապատրաստումների դասախոս Ազատ Մաթևոսյանը։

Խնդրի կարգավորմանն ուղղված քայլերից մեկը, որն արվեց նախարարության առաջարկությամբ, հետևյալն է՝ բարձրագույն կրթությամբ, բայց մանկավարժի որակավորում չունեցող, 30 կրեդիտ ստացած մասնագետը կարող է մտնել դպրոց ու դասավանդել։ Ներկա իրավիճակում ելք է, բայց ըստ փորձագետների՝ առանցքային ու խորքային լուծում չէ։

Ենթադրելի է, որ տարիներ հետո վերապատրատող մասնագետները այս դեպքում արդեն գործ կունենան մանկավարժի որակավորում չունեցող, բայց ուսուցչի մասնագիտությունն ընտրած մասնագետի հետ։ Իսկ պարտադիր վերապատրաստումները ուսուցիչների համար հերթական ատեստավորման փուլը հաղթահարելու կարևոր գործընթաց են, որտեղ գնահատվում են ուսուցիչների մանկավարժական ու մեթոդական որակները։

Նախորդ տարվանից ներդրված կամավոր ատեստավորման դեպքում, չափվում են ուսուցիչների մասնագիտական գիտելիքները, այսինքն՝ կամավորության սկզբունքով վերապատրաստման է դիմում այն ուսուցիչը, ով վստահ է իր գիտելիքների վրա, որի արդյունքում հնարավորություն է ունենում բարձր աշխատավարձ ստանալ։