Գյումրիի շուկայամերձ տարածքներում բացօթյա առևտուրը կասեցվել է․ առաջարկվող այլ տարածքներ վաճառականների մի մասը հրաժարվում է տեղափոխվել

Գյումրիի շուկայամերձ հատվածներն ու փողոցները, որոնք բացօթյա առևտրի վայրեր էին, արդեն 20 օր է մաքրված են տաղավարներից, գետնին վաճառվող միրգ ու բանջարեղեն, կենդանական ծագման մթերքներ չկան։ Փողոցներն ու Հաղթանակի պողոտային հարող մայթերն անցուդարձի համար ազատ են։ Բացօթյա առևտրով զբաղվողներից շատերն իրենց առևտուրն այլ տեղ են կազմակերպում։

«Մի քանի հոգի արդեն տեղափոխվել է Միկրոյի շուկա, մի քանի հոգի էլ Լաչինի տարածքում են տեղավորվել, մնացել է մի 5-6 հոգի, այն էլ ըմբոստանում են ու պատկերացնում են, որ կարող են մի քիչ բողոքելով իրենց ասածն առաջ տանել»,- այսօր լրագրողների հետ ճեպազրույցում նշել է Գյումրիի քաղաքապետի տեղակալ Դավիթ Առուշանյանը։

Բացօթյա առևտրի արգելքի դեմ ըմբոստացողները թե քանիսն են հստակ չէ , քաղաքապետարանը այլ բան է ասում, առևտրականներն՝ ուրիշ։ Բողոքողները շարունակում են պահանջել իրենց տալ այն պայմաններն ու հնարավորությունը, ինչ որ այժմ ունեն Մայակովսկի փողոցի՝ ավելի հայտնի «Լաչինի միջանցք» կոչվող տարածքի վաճառականները, որոնց թույլ է տրվել առևտուրը կազմակերպել մինչև տարեվերջ։ Շահումյան փողոցի և Հաղթանակի պողոտայի առևտրով զբաղվողներն այս պահին քաղաքապետարանի առաջարկած տարբերակների  համաձայն չեն։

«Պատճառաբանություններ միշտ կարելի է գտնել․ մի տեղ ասում են՝ մեծածախն է խանգարում, մյուս տեղում՝ օրինակ, Լաչինում տեղ չկա, ավտոկայանի մոտ հեռու է, փոշոտ է, առևտուր չի լինի․․․ Լիքը պատճառներ են բերում, բայց իրենց նպատակը նույն տեղերում մնալն է, ինչը հնարավոր չէ։ Որ ասում են Լաչինում տեղ չկա, էդ խանութների սեփականատերերը եղել են ինձ մոտ, մենք խոսել ենք ու պայմանավորվել, որ իրենց խանութների դիմաց տարածք են տալու, որ մարդիկ գնան կանգնեն, իրենք էլ համաձայնվել են, բայց առևտրականները չեն ուզում»,- նշում է քաղաքապետի տեղակալը։

Շուկայամերձ փողոցներին այլընտրանք մանրածախ առևտրով զբաղվողներին առաջարկվել էր տեղափոխվել ավտոկայանի տարածք, որտեղ դեռ նոր էր շուկայի վերածվելու։ Քաղաքապետի տեղակալը նշում է՝ եթե այդ տարածքում առևտուրը տեղափոխելու հարցում համաձայնության գային, ապա տեղում արագ պայմաններ կստեղծեին։ Բայց դրան էլ են դեմ եղել առևտրականները։

Ուրիշ տարածքներ, այլընտրանքային առաջարկներ ևս եղել են․ տեղափոխվել փակ շուկա կամ Միկրոյի շուկա՝ դրանցից էլ են հրաժարվել։ Ըստ առևտրականների, մեծածախ ու մանրածախ առևտուր իրականացնելը համատեղ անհնար է։ Նույնն է արձագանքը նաև «Լաչինի միջանցքի» առևտրային տարածքներ տեղափոխվելու հարցում։

«Ի սկզբանե խնդիր էր դրած Լաչինն էլ մաքրել, բայց քանի որ ավտոկայան չեն ուզում գնալ, Միկրո չեն ուզում, Լաչինն էլ ամբողջությամբ չէր մաքրվելու, դրա համար ռացիոնալ տարբերակ մտածեցինք՝ ուրեմն թող Լաչինում կանգնեն մինչև դեկտեմբերի 31-ը։ Բայց մենք էլ մեր պայմաններն ենք դնում, որ մեջտեղը պետք է ամբողջությամբ մաքուր լինի։ Դրա համար էլ Լաչինը եղավ այլընտրանք, քանի որ ավտոկայանը շատ արագ չէր կարող պատրաստ լինել, այնտեղ պետք է ասֆալտապատվեր, տաղավարներ դրվեին, և հետո մի ինչ-որ կետից մենք հասկացանք, որ իրենք էդտեղ էլ չեն գնալու, դրա համար էդ գործընթացը կանգնեց, բայց ամեն դեպքում, քաղաքապետարանը կգնա այն ճանապարհով, որ ունենա քաղաքապատկան շուկա, թե դա որտեղ կլինի առայժմ հստակ չէ»,- պարզաբանել է Դավիթ Առուշանյանը։

Երբ կենտրոնական փողոցներին հարող տարածքներում բացօթյա առևտրի արգելքն կանոնակագրված է, քաղաքապետարանը չի պատրաստվում զիջումների գնալ։ Միակ հարմար առաջարկը մնում է Մայակովսկի փողոցի «Լաչինի միջանցքի» շուկա տեղափոխումը, ինչը քաղաքապետի տեղակալը պնդում է, որ դարձյալ ժամանակավոր է։ Բայց չի բացառվում, որ մինչև հունվարի 1-ը ժամկետը երկարաձգվի, քանի դեռ քաղաքապետարանը չի հստակեցրել այն համայնքապատկան տարածքը, որտեղ հնարավոր կլինի նոր շուկա կառուցել։