«Բոնվառոն» ՍՊԸ-ին «Մեղրի» ազատ տնտեսական գոտու տարածքում շահագործողի թույլտվություն տրամադրվեց

ՀՀ կառավարության որոշմամբ՝ օգոստոսի 9-ի նիստում «Բոնվառոն» ՍՊԸ-ին «Մեղրի» ազատ տնտեսական գոտու տարածքում շահագործողի թույլտվություն տրամադրվեց: Նախագծի զեկուցող ՀՀ տնտեսական զարգացման և ներդրումների նախարար Արծվիկ Մինասյանը նշեց, որ ՊԵԿ-ի և ԱԱԾ-ի հետ աշխատանքային շրջափուլի մեջ են: Մինասյանը նշեց, որ «Բոնվառոն» ՍՊԸ-ն ցանկանում է ստանալ շահագործողի թույլտվություն՝ մշակող արդյունաբերության,  լոգիստիկ ծառայությունների ոլորտներում գործունեություն ծավալելու նպատակով, ապա մասնավորեցրեց՝ դա վերաբերում է և՜ սննդի արդյունաբերությանը, և՜ առևտրին, նաև սառնարանային ու պահեստային տնտեսությունների ձևավորմանը:

Նախարարի փոխանցմամբ՝ այս կազմակերպությունը ձգտում է 5,1 մլն ԱՄՆ դոլարի արտահանման ծավալների. տարիների ընթացքում փուլային ձևով հասնելու է դրան՝ նախնական 1 մլն ԱՄՆ դոլարից: «Բոնվառոն» ՍՊԸ-ն նախատեսում է իրականացնել շուրջ 195 մլն դոլարի ներդրումներ: Արտահանման ուղղություններն են Վրաստանը, Ռուսաստանը, հետագայում՝ ԵՏՄ-ն, Իրանը և այլ երկրներ: Ծրագրի ընթացքում ստեղծվելու է 102 նոր աշխատատեղ, կազմակերպությունը 500 քմ արտադրական տարածք է ունենալու, «Բոնվառոն» ՍՊԸ-ն արդեն տարածքի վարձակալության նախնական պայմանավորվածություն ունի:

Մինասյանը շեշտեց՝ այս ընկերությունն «առաջին ծիծեռնակն է» այս ոլորտում՝ որպես շահագործող, որը ստանում է Մեղրի ԱՏԳ-ում գործունեություն իրականացնելու թույլտվություն:

ՀՀ վարչապետ Նիկոլ Փաշինյանն արձագանքեց՝ նշելով, որ սա իսկապես առաջին ընկերությունն է, որ ստանում է այսպիսի հնարավորություն, և իրենք ոչ միայն հնարավորությունը պետք է արձանագրեն, այլև պետք է որոշակի մոնիթորինգ իրականացնեն՝ հասկանալու համար, թե ինչ դժվարությունների է բախվում ընկերությունը այս տարածքում գործունեություն ծավալելիս:

«Այս նախագծի ճակատագիրը կարևոր ուղերձ է հղելու այլ գործարարների, ովքեր նախնական հետաքրքրություն ունեն, այսինքն՝ պետք է բոլոր հնարավոր օրինական միջոցները ձեռնարկենք, որպեսզի այս նախագիծը լինի հաջողված, որ լավ ուղերձ լինի պոտենցիալ ներդրողներին: Պետք է նաև անցագրային ռեժիմի հետ կապված խնդիրները լուծվեն, քանի որ կազմակերպությունը անցագրային կետից այն կողմ է, պետք է նոր կարգ սահմանվի. մարդիկ ամեն օր պետք է այնտեղ աշխատանքի գնան և վերադառնան, ամեն օր ընթացակարգերով սահմանն անցնելը կարող է նվազեցնել գրավչությունը»,- ասաց վարչապետը՝ հավաստիացնելով, որ այդ հարցերը կլուծվեն: