Ալիևը բողոքում է ԵԱՀԿ-ից․ ՀՀ-ն դիտորդական առաքելություն ուղարկելիս նրանից թույլտվություն չի հարցրել

Ադրբեջանը ԵԱՀԿ-ին իր բողոքն է հայտնել Հայաստան արևելյան սահմանների դիտարկման համար հատուկ առաքելություն ուղարկելու կապակցությամբ: Ի՞նչն է Բաքուն համարում անընդունելի իր համար, և ինչի՞ հետ է կապված նրա այսպիսի ագրեսիվությունը: Թեմայի շուրջ «Հորիզոնի» տաղավարում մանրամասներ է հայտնել հեռուստամեկնաբան Արտյոմ Երկանյանը:

«ԵԱՀԿ-ի մշտական խորհրդում Ադրբեջանի ներկայացուցչությունը հայտարարություն է տարածել, որով բողոքում է ԵԽԽՎ-ի կայացրած որոշման դեմ՝ հայտարարելով, որ այն միակողմանի է, և անտեսում է Ադրբեջանի շահերը և կարծիքները: Դժգոհ են, որ իրենցից թույլտվություն, համաձայնություն չեն խնդրել, և որպես դրական օրինակ են բերում Եվրամիության առաքելությունը, երբ  Եվրամիությունն ադրբեջանցիների հետ համագործակցելու առաջարկով, խնդրանքով դիմել է Բաքվին, և միայն Բաքվի դրական եզրակացությունը ստանալուց հետո պատրաստվում է դիտորդական առաքելություն ուղարկել Հայաստան:
Բայդ այստեղ կա սկզբունքային տարբերություն. Ժոզեպ Բորելի խոսքերից կարող ենք հասկանալ, որ ի սկզբանե Եվրամիությունը մտադիր էր զինվորականներից բաղկացած դիտորդական առաքելություն ուղարկել, և ոչ թե Հայաստան, այլ հայ-ադրբեջանական սահման: Ալիևը նախապայմաններ է դրել: Կարող ենք կռահել, հասկանալ, որ 4 պայման է դրել պաշտոնական Բաքուն՝ առաքելությունը պետք է բաղկացած լինի քաղաքացիական անձանցից, այն պետք է տեղաբաշխվի ոչ թե հենց սահմանին, այլ Հայաստանի տարածքում, այն պետք է գործի ոչ ավելի երկար, քան մինչև դեկտեմբերի վերջ, և այն պետք է բաղկացած լինի ոչ ավելի, քան 40 մասնագետներից: Եվ միայն այս 4 պայմանները կատարելուց հետո Ալիևը հայտարարել է, որ պատրաստ է համագործակցել առաքելության հետ, բայց փաստաթղթում հստակ գրվում է, որ միայն այն սահմաններում, որոնք ընդունելի և անհրաժեշտ կհամարի ինքը:

Այսինքն՝ եթե իր դուրը ինչ-որ բան չգա, ինքը պարզապես կհայտարարի, որ այլևս ինքը չի համագործակցում: Եվ ահա այս դառը փորձը հաշվի առնելով՝ կարծում եմ, ԵԱՀԿ-ն նպատակահարմար չի համարել ընդհանրապես դիմել Ադրբեջանին, հատկապես նկատի ունենալով այն, որ ի սկզբանե առաքելությունը մտադիր է եղել իրականացնել ոչ թե սահմանին, այլ Հայաստանի տարածքում: Չնայած դրան՝ Ադրբեջանը հայտարարում է, որ ԵԱՀԿ-ն խախտում է իրենց իրավունքները, և մեջբերում եմ. «հեռանում է Պրահայում ձեռք բերված պայմանավորվածություններից»:

Այդ կապակցությամբ ինձ մոտ երեք հարց է առաջանում. 1-ին. ինչո՞ւ մի կազմակերպությունը պետք է կատարի մեկ այլ  կազմակերպության ստանձնած պարտավորությունը՝ Պրահայում Եվրամիությունն է խոստում տվել Ադրբեջանին, 2-րդ՝  ինչո՞ւ պետք է ԵԱՀԿ-ն թույլտվություն հարցնի Ադրբեջանից, եթե դիտորդական առաքելությունը կատարվելու է ՀՀ-ի տարածքում, և 3-րդ՝ Ադրբեջանն ի՞նչ ունի վախենալու, եթե Հայաստանում դիտորդական  առաքելություն իրականացվի, և եթե իսկապես Ադրբեջանը մտադիր չէ գրոհել Հայաստանի սահմանը»,- ասաց Արտյոմ Երկանյանը:

Մանրամասները՝ ամբողջական հարցազրույցում: