Ադրբեջանն ինքը ոչնչացնողն է էթնիկ հիշողության և համաքրիստոնեական մշակութային մի շերտի, և սա գիտի աշխարհը․ Արայիկ Խզմալյան

ԿԳՄՍ նախարարի տեղակալ Արայիկ Խզմալյանը Գյումրիիի դրամատիկական թատրոնում ներկա է գտնվել «Միզերի» ներկայացմանը։ Այն Գյումրիի թատրոնի և Սոս Սարգսյանի անվան համազգային թատրոնի հետ համատեղ թատերական նախագծերից մեկն է, որը կյանքի է կոչվել ԿԳՄՍ նախարարության աջակցությամբ։  Նախարարի տեղակալը ներկայացումից հետո, SHANTNEWS-ի թղթակցի հետ հարցազրույցում, անդրադարձել է նաև  Արցախի մշակութային ժառանգության պահպանության խնդրին։ Նա նշել է , որ Ադրբեջանի վերահսկողության տակ անցած  Արցախի հայկական մշակութային կոթողների և հուշարձանների ոչնչացման հարցը հայկական կողմը միջազգային բոլոր հարթակներում է բարձրաձայնում։

«Բոլոր այն հիմնական սկզբունքները, որով մենք պահանջում ենք, որ այդ  սկզբունքների շրջանակներում պետք է դիտարկել առաքելությունը և հուշարձանների պահպանությունը, ՅՈՒՆԵՍԿՕ-ն ամբողջապես  համակարծիք է, բայց գիտեք Ադրբեջանի ոճը՝ տապալել բոլոր պայմանավորվածությունները, անընդհատ թելադրել օրակարգ, որը դուրս է պայմանավորվածություններից և ամեն կերպ  խոչնդոտել  առաքելության մուտքը։ Որտեղ Ադրբեջանը փորձում է հանդես գալ  որպես էթնիկ հիշողության պահապան, մշակութային արժեքների պահպանության միջավայր, մենք այդտեղ ընդվզում ենք, որովհետև Ադրբեջանն ինքը ոչնչացնողն է էթնիկ հիշողության և համաքրիստոնեական մշակութային մի շերտի, և սա գիտի աշխարհը և սա իրողություն է։ Ես հույս ունեմ, որ ընդհանուր հարաբերությունների կարգավորման համատեքստում հնարավոր կլինի այս հարցը խորապես ներկայացնել։ Լրջագույն աշխատանք են տանում նաև ԱԳՆ մեր գործընկերները։ Նախարարություն մտնող չկա մի դիվանագիտական օղակի ներկայացուցիչ կամ դեսպան, որ այս հարցը առաջնակարգ չդրվի և չներկայացվի նրանց»,- ասել է Արայիկ Խզմալյանը։

ԿԳՄՍ նախարարի տեղակալը խոսել է նաև Գյումրիի դրամատիկական թատրոնի ճեմասրահի պատուհանները նորով փոխարինելու անհրաժեշտության մասին։ Բայց մինչ այդ նախատեսվում է թատրոնի ճեմասրահից  տեղափոխել Հակոբ Հակոբյանի «Սարերում» որմնանկարը, որի  պահպանությունը վտանգված է։ Որմնանկարը  շենք է բերվել պատուհաններով, այդ ժամանակ էլ, առանց այդ էլ թատրոնի վթարային պատուհաններն ավելի  են խարխլվել: Ըստ Արայիկ Խզմալյանի, դեռ օրակարգում է նոր տարածքի փնտրտուքը, որը պետք է լինի հանրային միջավայր։

«Իր ծավալներից ելնելով՝ այդ աշխատանքը տեղափոխելու  համար շատ դժվար  է գտնել համապատասխան վայր, բայց ես վստահեցնում եմ, որ երբ պատուհանների փոխարինման աշխատանքները սկսվեն, բնականաբար, տեղ կգտնվի, և իր հանգրվանը  որմնանկարը կգտնի հարմար վայրում գուցե ժամանակավոր կամ մշտական, այս պահին հստակ ասել դեռ չեմ կարող, բայց պարզ է, որ ամենայն պատասխանատվությամբ պետք է մոտենալ այս հարցին»․- նշել է Արայիկ Խզմալյանը։

Որմնանկարը Գյումրիի «Քարհատ մեքենա» գործարանի նախկին ճաշարանից դրամատիկական թատրոնի շենք է տեղափոխվել 5 տարի առաջ: Այդ ժամանակ թատրոնի միջանցքը միակ հարմար տարածքն էր  քաղաքում, որտեղ կարող էր տեղակայվել որմնանկարը:Պահպանության հարցն էլ դրվել է թատրոնի ղեկավարության վրա: Սակայն  թատրոնը այս տարիների ընթացքում շատ դիմում-նամակներ է ուղղել վերադասին, որ չի կարող որմնանկարի պահպանության հարցերը լուծել: