Գյումրիի թատրոնը հայ- ֆրանսիական մշակութային համագործակցության հարթակ․ կայացավ «Սպասում» ներկայացման առաջնախաղը

Նոյեմբերի 12-ին և 13-ին Գյումրիի դրամատիկական թատրոնում հերթական պրեմիերան կայացավ։ Թատրոնի մեծ բեմում «Սպասում»  ներկայացումն էր՝ ֆրանսիացի ժամանակակից դրամատուրգ Ժոել Պոմրայի «Երկու Կորեաների վերամիավորումը» պիեսի  հիման վրա: Բեմադրությունը  ֆրանսաբնակ ռեժիսոր Սաթէ Խաչատրյանինն է, իսկ նախաձեռնությունը՝ հայ-ֆրանսիական «Սաթե-աթղը» թատերական միությանը։ Թատերական համագործակցության նպատակը ֆրանսիայում՝ հայկական, իսկ Հայաստանում ֆրանսիական մշակույթի տարածումն է:

ֆրանսիացի ժամանակակից դրամատուրգ Ժոել Պոմրայի ստեղծագործություններն աշխարհում համարվում են ամենաշատ բեմադրվածները: Պիեսի հիմքում սերն է՝ իր հակասական դրսևորումներով․  անհավատարմություն, բաժանում, որն ի հայտ է գալիս անգամ տարիների համատեղ կյանքի ընթացքում:

Ներկայացումն ամբողջանում է 12 պատմություններով, որոնք առաջին հայացքից տարբեր են թվում, բայց ռեժիսորը դրանք միահյուսել է նուրբ հոգեբանական  տեսարաններով: Բեմում կյանքն է իր բոլոր մութ ու ակնհայտ կողմերով։

«Շատ հետաքրքիր պատմությունների խճանկար է, որտեղ մենք կարող ենք տեսնել երեք տարբեր սերունդների դերասանների և կարծում եմ, որ ներկայացման հարստությունը հենց այդ երեք սերունդների մեկտեղման մեջ է, որովհետև տեսնում ենք երեք տարբեր հայացքներ, երեք տարբեր թատերական դպրոցներ և երեք տարբեր մոտեցումներ»,- նշում է ներկայացման ռեժիսոր Սաթէ  Խաչատրյանը։

12 pատմությունների մեջ դերասաններից յուրաքանչյուրը կերտում է 4-5 կերպար, մեկ հայտնվում է սիրեկանի, մեկ՝ սիրո կարիք ունեցող կնոջ կամ ամուսնու, մեկ էլ`  անպատասխան սիրուց հոգեգարության հասածի դերում: Փոքրիկ սենյակ ու  շարժական  դեկորներ՝ լուսային էֆեկտներով բեմում ստեղծել են մինիմալիստական ոճ։

«Սպասում»-ը հոգեբանական դրամա է, որոշ էպիզոդներ  համեմված են ֆրանսիական հումորով, ինչը  երբեմն մարդկանց  համար դառնում է խելացնորության չհասնելու համար փրկօղակ: Սիրո թեման բոլոր ժամանակներում եղել ու մնում է ամենաքննարկվողն ու չհնացողը:

«Թեման չի կարող ժամանակակից չլինել, որովհետև հեղինակն ավելի քան ժամանակակից է, ապրում է մեր օրերում ու այսօր էլ գրում է պիեսներ։ Իսկ որքանով  դա հանդիսատեսի սրտին կդիպչի․․․ Ես ինձ համար էդպիսի խնդիր չեմ դրել,ո րովհետև ինձ համար արվեստը ,գրականությունը առաջին հերթին գեղարվեստական եզրույթներ են, հետևաբար, ինձ համար կարևոր է, որ այն  գործը, որը պիտի ընտրեմ և բեմադրեմ, լինի ամուր, լինի լավը»,- ասում է Սաթէ Խաչատրյանը։

Լարված դրամատիկ լուծումներով ներկայացումը նախատեսվում է խաղալ նաև ֆրանսիական բեմերում: Ռեժիսոր ՍաթԷ Խաչատրյանի  և «ՍաթԷ-աթղը» թատերական միության նպատակը  հայ-ֆրանսիական  երկխոսության միջոցով հանրայնացնելն է երկու երկրների մշակութային ժառանգությունը, ստեղծել նոր համատեղ բեմադրություններ ու նախագծեր, որոնք հանդիսատեսին կներկայացնեն ժամանակակից հայ և ֆրանսիացի գրողների լավագույն  ստեղծագործությունները: