Ի՞նչ հարցեր են քննարկվելու ՀԱՊԿ երևանյան գագաթնաժողովում

Վաղը Երևանում կմեկնարկի  ՀԱՊԿ արտաքին գործերի նախարարների խորհրդի, պաշտպանության նախարարների խորհրդի և անվտանգության խորհուրդների քարտուղարների հանձնաժողովի համատեղ նիստը: Կազմակերպության մամուլի քարտուղար Վլադիմիր Զայնետդինովը հայտնել է, որ նիստի ընթացքում նախատեսվում է ընդունել մի քանի կարևոր քաղաքական հայտարարություններ: Բացի դրանից, ըստ Զայնետդինովի, կողմերը հավանություն կտան մի քանի փաստաթղթի, որոնք կդրվեն ՀԱՊԿ Հավաքական անվտանգության խորհրդի հաստատմանը։

Ի՞նչ է հայտնի օրակարգի մասին: Արդյո՞ք անդամ բոլոր պետությունների առաջնորդներն են մասնակցելու. Թեմայի շուրջ, «Հորիզոնի» տաղավարում մանրամասներ է հայտնել Արտյոմ Երկանյանը:

«Վաղն անցկացվելու է կազմակերպության անդամ պետությունների ղեկավարների հանդիպումը Դվին հյուրանոցային համալիրում: Կեսօրին, մոտավորապես 11:30 կսկսվի նիստի բաց մասը, այնուհետև երկրների ղեկավարները փակ ռեժիմով կշարունակեն աշխատանքը նեղ կազմով: Ավելի ուշ՝ արդեն ընդլայնված կազմով, նիստը կշարունակվի արտաքին գործերի նախարարների, պաշտպանության նախարարների, անվտանգության քարտուղարների մասնակցությամբ: Ենթադրվում է, որ վերջում պետք է ընդունվի ավարտական հռչակագիր:

Ռուսաստանի նախագահի մամուլի խոսնակ Պեսկովը հաստատել է, որ Վլադիմիր Պուտինը ժամանելու է Երևան և որ, բացի նիստից, առանձին հանդիպում է ունենալու նաև Հայաստանի վարչապետի հետ: Հաստատված է նաև Բելառուսի նախագահի այցը, Ղրղստանի նախագահը նույնպես հաստատել է…մինչ այս պահը դեռևս հայտնի չէ, թե արդյոք կկարողանա Երևան ժամանել Ղազախստանի նորընտիր նախագահ Տոկաևը: Նա այնտեղ խնդիրներ ունի և միգուցե հնարավորություն չտա իրեն մասնակցելու, բայց այդ մասին որևէ հերքում կամ հաստատում չի եղել:

Նիստում նախագահելու է Հայաստանի վարչապետը, քանի որ այժմ Հայաստանն է նախագահող պետությունը մինչև հունվարի 1-ը և հունվարի 1-ից Բելառուսին է անցնելու այդ լիազորությունը: Դա է պատճառը, որ Բելառուսի նախագահ Լուկաշենկոն իր ելույթում կներկայացնի այն ծրագիրը, թե նախագահող երկիրը ինչ հարցի պետք է ավելի մեծ ուշադրություն դարձնի և ինչպես է վարելու այդ քաղաքականությունը:

Ի դեպ, մինչ նիստը, օրեր առաջ նիստի նախապատրաստման աշխատանքները հեռախոսով քննարկել են Փաշինյանը Պուտինի հետ և Պուտինը Լուկաշենկոյի հետ: Նիկոլ Փաշինյանի և Ալեքսանդր Լուկաշենկոյի միջև հեռախոսազրույց չի եղել»,- ասաց Արտյոմ Երկանյանը:

Հայաստանի համար շատ կարևոր հարց կա՞ օրակարգում և ինչպե՞ս են մեկնաբանում սպասվող նիստը Բաքվում: Այս հարցերի շուրջ ևս Արտյոմ Երկանյանը տվել է մեկնաբանություն:

Մանրամասները՝ ամբողջական հարցազրույցում: