Ո՞վ է Թուրքիայի և ԱՄՆ-ի միջև ճգնաժամի պատճառ դարձած հոգևորականի հայ փաստաբանը

Վերջին օրերին Թուրքիայի և ԱՄՆ-ի միջև դիվանագիտական լարվածության և «առևտրային պատերազմի» պատճառ դարձած ամերիկացի հոգևորական Էնդրյու Բրանսոնի փաստաբանն ազգությամբ հայ Ստեփան (Իսմայիլ) Ջեմ Հալավուրթն է:

Թուրքիայում միսիոներական առաքելություն իրականացնող ամերիկացի հոգևորական Էնդրյու Բրանսոնը 2016 թվականի դեկտեմբերի 9-ին թուրքական դատարանի որոշմամբ լրտեսության մեղադրանքով կալանավորվել էր: Նա մեղադրվում է «Հիզմեթ» կրոնական շարժման առաջնորդ, ամերիկաբնակ Ֆեթուլլա Գյուլենի հետ կապ ունենալու մեջ:

Մի քանի օր առաջ Իսմայիլ Ջեմ Հալավուրթը թուրքական demokrathaber.org կայքի հետ զրույցում մեկնաբանել էր աղմկահարույց դատական գործի շուրջ ստեղծված իրավիճակի մանրամասները և խորհուրդ տվել թուրքական իշխանություններին թուրք-ամերիկյան հարաբերություններն է՛լ ավելի չլարելու համար անհապաղ ազատ արձակել Բրանսոնին, գրում է ermenihaber.am -ը:

«Խնդիրը, ցավոք, հասել է անցանկալի մասշտաբների։ Թուրքիան ամեն անցնող օրվա հետ ավելի մեծ վնասներ է կրում։ Այս իրավիճակում ամենաճիշտ բանը, որ կարող է անել թուրքական կողմը դա Բրանսոնի՝ երկրից դուրս գալն ապահովելն է», – ասել էր Հալավուրթը։

Հայազգի փաստաբանը շեշտել էր, որ դա ճիշտ կլինի թե՛ իրավական, թե՛ բարոյական տեսակետից։

Բանն այն է, որ հոգևորականի ձերբակալությունը լարվածություն է մտցրել թուրք-ամերիկյան հարաբերություններում: Երկու երկրների միջև ծագած դիվանագիտական ճգնաժամն ավելի խորացավ այն բանից հետո, երբ, չնայած ամերիկյան կողմի Բրանսոնին ազատ արձակելու պահանջներին, թուրքական դատարանը փոխել էր նրա խափանման միջոցը` սահմանելով տնային կալանք:

Ստեփան Ջեմ Հալավուրթը Թուրքիայում ճանաչված փաստաբան է, հատկապես հայտնի է հայերին վերաբերող դատական գործերում ներգրավվածությամբ: Նա ժամանակին նույնիսկ եղել է «Դերսիմի հայերի միության» նախագահը: Իր գլխավորած դերսիմահայերի խմբի հետ մասնակցել է 2015թ. տեղի ունեցած «Համահայկական 6-րդ խաղերին»:

Նա 17 տարեկանում է իմացել, որ հայ է: Այնուհետև դերսիմահայերի միությունը հիմնելուց հետո՝ 2013 թ. եկել է Հայաստան և մկրտվել է հայկական եկեղեցում՝ վերցնելով Ստեփան անունը: Հետագայում շուրջ 40 դերսիմահայեր, այդ թվում՝ Հալավուրթի ընտանիքի անդամները եկել են Հայաստան և մկրտվել:

Հալավուրթը Թուրքիայում որպես փաստաբան ներգրավված է մի քանի աղմկահարույց դատական գործերում: Նա Թուրքիայի զինված ուժերի ստորաբաժանումներից մեկում 2011 թ. ապրիլի 24-ին ծառայակցի կողմից սպանված հայ զինվոր Սևակ Բալըքչի ընտանիքի փաստաբանն է, ինչպես նաև 2007թ. հունվարի 19-ին Ստամբուլում սպանված պոլսահայ լրագրող, «Ակոս» հայկական թերթի խմբագրապետ Հրանտ Դինքի ընտանիքի փաստաբաններից մեկն է:

Հալավուրթը հատկապես աչքի է ընկնում իր ընդդիմադիր հայացքներով. ընդգծված հայամետ է: