Նոր Հայաստանում առաջին քաղբանտարկյալն եմ լինելու. Ռոբերտ Քոչարյան

ՀՀ երկրորդ նախագահ Ռոբերտ Քոչարյանի ՝ անազատության մեջ գտնվելու շրջանում իշխանական շրջանակներից ոչ պաշտոնական հանդիպումների փորձեր չեն արվել:

«Չեն եղել, բացի այդ, ես զրկված էի որևէ կապի միջոցից, իմ հարազատների հետ հանդիպումներից: 17 օր եղել եմ մեկուսարանում, հետաքրքիր փորձ եմ ձեռք բերել, իմ կյանքում միայն այդ փորձը չի եղել, ամեն ինչով անցել եմ՝ պատերազմով, ընդհատակյա պայքարով, պաշտոնավարումով, այս փորձը չի եղել իմ կյանքում»,- ասաց նա:

Քոչարյանը նշեց, որ մեկուսարանում այնպես էր իզոլացվել, որ հանկարծ որևէ բառ իրենից դուրս չգա, իրեն էլ որևէ բառ չասեն:

«Մի բան կարող եմ ասել, որ մեկուսարանում «թախտաբիթի» չկա, հաստատ, հիմա էլ առանձնապես հաճելի տեղ չէ: Ոգիս տեղն էր, վախը չունեմ, չեմ ունեցել և չեմ էլ ունենալու, սա` միանշանակ»,- ասաց նա:

Քոչարյանը նշեց, որ այս ընթացքում բազմաթիվ զանգեր է ստացել իր ընտանիքը, ազատ արձակվելուց հետո ևս, շատերի կողմից աննկարագրելի վերաբերմունք է եղել՝ և՛ աջակցություն, և՛ կարծիք, որ չեն ընդունում այն ամենը, ինչ կատարվում է:

«Այս մարդիկ, եթե հեղափոխական էնտուզիազմը պակաս լիներ, կմտածեին՝ այս մարդու անցած ճանապարհը, փորձը այնպիսին է, որ կարող է պետք գալ: Ես առաջին անգամ, որ նստել եմ պաշտոնին՝ համարել եմ, որ ոչ մի բան չգիտեմ, և զրոյից պետք է լիքը բան սովորեմ, ես այսօր անգամ հույս չունեմ, որ իրենք ուզում են ինչ-որ բան սովորել, դրա համար իրենք պիտի ընդունեն, որ գիտելիքների պակաս ունեն. երկիրը «տրինաժոր» են սարքել»,- նշեց նա:

Հետագա քայլերին անդրադառնալով՝ նա ասաց, որ մոդելներ կարող են բազմաթիվ լինել՝ տարբեր մարդկանց հետ շփումներ և այլն: Քոչարյանի կարծիքով՝ վաղը կայանալիք հանրահավաքում իրեն փորձելու են հայտարարել «հակահեղափոխության կենտրոն», ինչը բացարձակապես իրականությանը չի համապատասխանում, բայց սա է լոզունգներով շարժվելու տարբերակը:

«Մարդկանց, վերջը, պետք է զբաղեցնեն, նոր թիրախ տան, նոր մոբիլիզացնող ուժ գտնեն, որովհետև մոբիլիզացնող այլ բան չկա»,- ասաց նա:

Հարցին՝ մտավախություն չունի՞, որ դատախազությունը բողոքարկելու է, ասաց, որ ունի նման մտավախություն, չի բացառում, որ այսպիսի ճնշումների շնորհիվ կրկին կհայտնվի մեկուսարանում, բայց վստահ է, որ այս գործը ՄԻԵԴ-ում զրոյական շանս ունի չբեկանվելու:

«Ասեմ նաև, որ սա լուրջ թեստ է մեր դատական համակարգի համար՝ սկսելու են օրենքո՞վ շարժվել, թե՞ սոցիալական ցանցերի տրամաբանությամբ: Առաջ հեղափոխությունները ոնց էին անում. հեղափոխությունից հետո ամեն ինչ կազմալուծում էին, դնում էին հրապարակում գիլյոտինը՝ գլուխ կտրող մեքենան, ասում՝ սրանք մերոնքական են, ապրե՛ք, սրանք մերոնքական չեն, դնենք, գլուխները կտրենք»,- ասաց նա՝ իբրև օրինակ բերելով ֆրանսիական հեղափոխությունը:

Այժմ, ըստ Քոչարյանի, աշխարհը մի քիչ փոխվել է, անդամակցել են ԵԽ-ին, որոշ պարտավորություններ ունենք նրանց առջև, և այս տրամադրությունները կարող է կանխել միայն դատական համակարգը, դրա համար է ճնշում գործադրվում փաստաբանների և դատարանների վրա:

«Ճնշումը ոչ միայն հեռախոսային զանգն է, այլև այն տրամադրությունը, որ ձևավորվում է հասարակության մեջ: Անպայման բողոքարկելու են, փորձելու են ինձ կրկին բանտ տանել, ստանալու են քաղբանտարկյալ, այն իշխանությունը, որ պնդում է՝ Հայաստանում քաղբանտարկյալներ պետք է չլինեն, ուրեմն՝ առաջինն եմ լինելու, պատրաստ եմ պայքարել՝ և՛ բանտում, և՛ ազատության մեջ»,- նշեց երկրորդ նախագահը: