ԱԱԾ պետի կողքը երբեմն նստում են մարդիկ, ովքեր ժամանակին ինձ ու ընտանիքիս հետապնդում էին. Րաֆֆի Հովհաննիսյան

Այն, որ մեր քաղաքացիների զգալի մասը վերապատկանում է երկրին, հրապարակ է գալիս, ըստ «Ժառանգության» առաջնորդ Րաֆֆի Հովհաննիսյանի, լավ է և ողջունելի, բայց պետք է հասկանալ, որ նույն վարչապետին՝ Նիկոլ Փաշինյանին, լիազորությունը տվել է շատերի կողմից ապօրինի համարվող Ազգային ժողովի կողմից: Օգոստոսի 20-ին լրագրողների հետ հանդիպմանը Հովհաննիսյանը նշեց, որ այդ լեգիտիմությունը, իրավակարգությունը պետք է շուտափույթ արձանագրվի ընտրությունների միջոցով:

Անդրադառնալով մտահոգություններին, թե վարչապետի հայտարարած անցումային արդարադատության մարմինը կարող է վերածվել Լինչի դատաստանի, Հովհաննիսյանը պատասխանեց.

«Նախ՝ պարզ չէ, թե դա ինչ համակարգ է և ինչ մոդելով պետք է լինի: Հարավային Աֆրիկայում եղել են ճշմարտության և հաշտեցման հանձնաժողովներ, որոնք քննության են առել Մարդու իրավունքների բոլոր խախտումները այդ երկրի դժնդակ պատմության ընթացքում, և այդ հանձնաժողովները բարձրացրել են հանրային վստահությունը, լուծում տվել այդ հարցերին: Մեզ մոտ 95 – 96 թթ. այս կողմ բոլորս ապրում ենք փաստացի՝ «դե ֆակտո» վիճակում, չենք ապրում իրավացի՝ «դե յուրե» Հայաստանում: Այդ ֆոնով պետք է ասել, որ ցանկացած արտակարգ, արտահերթ անցումային արդարադատության մեխանիզմ թե փորձ պետք է նկատի առնի այդ ամբողջ պատմության ընթացքում կատարված ՄԻ խախտումները»:

Հովհաննիսյանը նշեց՝ նոր մեխանիզմները պետք է նկատի ունենան Մարտի 1-ը, բայց պետք է չմոռանան՝ եղել է ընտրությունների գողություն, Հոկտեմբերի 27, և եթե այս ճանապարհով պետք է գնալ, ենթադրելի է, որ պետական ողջ մարմինը պետք է լյուստրացիայի ենթարկվի, այսինքն՝ բարձրաստիճան պաշտոնյաները, համապատասխան ղեկավարները, որոնք մասնակցություն, վկայություն ունեն այս կամ այն դեպքի մեջ, պետք է բացահայտվեն և հրավիրվեն քննության: Սա, ըստ Հովհաննիսյանի, քաղաքական կամք պահանջող մոտեցում է, այն պետք է տարածվի բոլոր նրանց վրա, ովքեր մտնում են այդ հովանու ներքո, այդ թվում՝ բոլոր նախագահների, իրավապահ մարմինների ղեկավարների, ԱԱԾ գործակալների և այլոց վրա:

«Սա շատ դժվար հանձնառություն է, այսօր, օրինակ՝ շատ հարգելի ԱԱԾ պետի կողքը մեկ-մեկ նստում են այն պաշտոնյաները, ովքեր պարոն Քոչարյանի օրոք ինձ և իմ ընտանիքին, իմ երեխաներին ոչ միայն հետապնդում էին, այլև օդանավակայանում տետրերը բացում էին գաղտնի ծածկագրեր փնտրելու, այդ նույն մարդիկ հիմա այլ հրահանգի տակ են, պարզ է՝ իրենք տեղեկատվության տեր են: Պիտի ամբողջովին մտնենք այս դաշտը ոչ թե հրապարակի հետ կապելով, որոշելով՝ որոնք են չափանիշները, բողոքարկման եղանակները որոնք են»,- ասաց նա: