Ազգային ժողովրդավարական ինստիտուտի խորհրդարանական պրակտիկայի եւ ֆելլոուշիփի ծրագրի շրջանավարտներին հանձնվել են վկայականներ

Կարծում եմ` այստեղ ձեռք բերած փորձն ու գիտելիքները ճիշտ մեկնարկ կլինեն հետագա կարիերայի ընթացքում եւ մեծ խթան՝ օրենսդիր մարմնի գործունեությունն առարկայական պատկերացնելու հարցում. նշել է Ազգային ժողովի նախագահ Ալեն Սիմոնյանը՝ շնորհավորելով Ազգային ժողովրդավարական ինստիտուտի խորհրդարանական պրակտիկայի եւ ֆելլոուշիփի ծրագրի 2022 թվականի շրջանավարտներին:

Խորհրդարանի նախագահը շնորհակալություն է հայտնել Ազգային ժողովրդավարական ինստիտուտին՝ երիտասարդներին հնարավորություն տալու եւ հետեւողական աշխատանքի համար, ինչպես նաեւ Ազգային ժողովի այն պատգամավորներին ու աշխատակիցներին, որոնց ջանքերով երիտասարդներն իրենց համար բացահայտել են Ազգային ժողովը:

«Մշտապես հաճելի է տեսնել պայծառ երիտասարդների, որոնք հետաքրքրվում են իրենց երկրի ապագայով եւ մյուսներին էլ կարողանում են մոտիվացնել: Համենայնդեպս, այստեղ հավաքվածներին դա հաջողվել է, եւ ես ստացված եմ համարում իրականություն դարձած 4-ամյա գաղափարը»,- ասել է Ալեն Սիմոնյանը:

Ծրագրի շրջանավարտներին շնորհավորել է նաեւ ԱԺ աշխատակազմի ղեկավար-գլխավոր քարտուղար Դավիթ Առաքելյանը՝ վստահություն հայտնելով, որ նրանցից շատերը թեւակոխում են մասնագիտական գործունեության նոր փուլ: ԱԺ աշխատակազմի ղեկավար-գլխավոր քարտուղարը կարեւորել է Միջազգային գործընկերների հետ համագործակցությունը և նշել, որ Ազգային ժողովրդավարական ինստիտուտի հետ ավանդական դարձած համագործակցության արդյունքում ծրագրի շահառուները շուրջ տասն ամիս մասնագիտական փորձնակություն են անցնում խորհրդարանում:

«Այս համագործակցությունը պարարտ հող է ստեղծում երիտասարդ մասնագետների համար՝ Ազգային ժողովի աշխատակազմի աշխատանքների ոչ միայն ծանոթացման եւ ուսուցման, այլեւ աշխատանքներին ներգրավման, նաեւ հետագայում՝ լավագույններին աշխատանքային առաջարկություններ անելու տեսանկյունից»,- նշել է Դավիթ Առաքելյանը:

Նա տեղեկացրել է, որ այս ամիս մեկնարկել է  Ազգային ժողովրդավարական ինստիտուտի նոր փորձնակների եւ ֆելլոուների ուսումնական գործընթացը:

Տասն ամիս տեւողությամբ ծրագիրը ֆինանսավորվում է ԱՄՆ միջազգային զարգացման գործակալության (USAID) կողմից եւ իրականացվում է Ազգային ժողովրդավարության ինստիտուտի (NDI) ու Ազգային ժողովի համագործակցության արդյունքում:

Վերջին 4 տարիներին ծրագրի մասնակիցներին հնարավորություն է ընձեռվել ծանոթանալու եւ ներգրավվելու խորհրդարանական աշխատանքներին: Նրանք աջակցել են խմբակցություններին եւ մշտական հանձնաժողովներին, պատգամավորներին ու ԱԺ աշխատակազմին՝ իրականացնելով հետազոտություններ, օրենսդրական վերլուծություններ, մամուլի մշտադիտարկում: Փորձնակները պատրաստել են նաեւ մամուլի հաղորդագրություններ, օգնել կառավարել սոցիալական հարթակները, ինչպես նաեւ մասնակցել հանձնաժողովների եւ ԱԺ լիագումար նիստերին: Նրանք աջակցել են նաեւ համայնքային հանդիպումների կազմակերպչական աշխատանքներին:

Ծրագիրն օգնել է երիտասարդներին բարելավել իրենց մասնագիտական հմտությունները: Նրանցից շատերն ընդունել են Ազգային ժողովում աշխատելու առաջարկները:

«Կյանքի այս կարեւոր փուլը ձեզ մի շարք հնարավորություններ է ընձեռել կարիերայում մրցունակ եւ հաջողակ լինելու համար: Սիրելի՛ երիտասարդներ, եղեք համարձակ, ստեղծագործ, մասնագիտական դաշտում մշատապես կատարելագործվեք: Այս տասն ամիսներին ստացած ձեր աշխատանքային փորձը թող առաջնորդի ձեզ առավել մեծ բարձունքներ նվաճելու»,- ասել է ԱՄՆ միջազգային զարգացման գործակալության հայաստանյան առաքելության փոխտնօրեն Ռեբեկա Ուայթը:

Միջոցառման ավարտին ԱԺ աշխատակազմի ղեկավար-գլխավոր քարտուղար Դավիթ Առաքելյանը եւ ԱՄՆ միջազգային զարգացման գործակալության հայաստանյան առաքելության փոխտնօրեն Ռեբեկա Ուայթը ծրագրի շրջանավարտներին հանձնել են վկայականներ: