Գյումրիի կանաչապատման ծրագրի մրցույթ է հայտարարվել․ նոր ծառատեսակների համար նախատեսված է մոտ 2․5 մլն դրամ հատկացնել

Չնայած մի քանի օրվա անձրևներին, Գյումրիի կոմունալ ծառայության բրիգադները շարունակում են կանաչապատման աշխատանքները։ Դրանք հիմնականում Գյումրիի կենտրոնական հատվածներում են, սիզամարգերում, որոնք արտաքին գրավիչ տեսքն են ապահովում։ Քաղաքի մյուս հատվածներում մաքրման, ծառատնկման աշխատանքներին զուգահեռ սանիտարական էտ են կատարում։

«Գյումրիի ամբողջ տարածքում կատարվում են և՛ ծառերի էտման աշխատանքներ,  և՛ սանիտարական հատումներ, և՛ կանաչ տնկիների վերաձևավորումներ, այդ բոլոր աշխատանքները Գյումրի համայնքի ամբողջ տարածքում կատարվում են »,- SHANTNEWS-ի հետ զրույցում նշեց Գյումրիի քաղաքապետարանի կոմունալ ծառայության տնօրեն Արտավազդ Ոսկանյանը։

Էտման ենթակա են այն ծառատեսակները, որոնք վտանգավոր են, կա՛մ թեքված են, կա՛մ էլ՝ արմատից փտած։ Կոմունալ ծառայության ղեկավարը վստահեցնում է, որ քաղաքի որևէ տարածքում ծառեր չեն կտրում, եթե դրանք վտանգավոր չեն։ Հերթը ծառ հատելուն հասնում է նաև այն ժամանակ, երբ բնակիչներից են բողոք -ահազանգ ստանում։

«Օրինակ էս  տարվա ընթացքում 165 դիմումներ ենք ունեցել, որոնց տրվել է համապատասխան լուծում, բնակիչների խնդրանքը բավարարվել է, ծառերի էտը կատարվել է․․․ Դժգոհություն լինում է, որովհետև լուսավորությունն է փակում, էդ բոլոր խնդիրները աշխատում ենք արագ լուծել»,-  նշեց Արտավազդ Ոսկանյանը։

Սանիտարական և թե խորը էտը գարնան այս ժամանակահատվածում կոմունալ ծառայության աշխատակիցները վստահեցնում են, որ վնաս չեն, էտված ծառերի վեգետացիային չեն խանգարում և քաղաքացիների մտահոգությունները, թե այդ ծառերը չեն ծաղկելու, տեղին չեն։ Կանաչապատման աշխատանքներին զուգահեռ ծառատունկ է կատարվել քաղաքի ծայրամասային թաղամասերում։

«Ծառերի տնկիներ ունենք, որոնք տնկվում են տարբեր տարածքներում։ Մենք բուլվարային թաղամասում ունենք Կուրսկի այգի։ Անտառային շերտ ենք ստացել նաև աղբադաշտի հարակից տարածքում, մոտ 1000 ծառ է տնկվել ու  ամեն տարի ավելանում է»,- ասում է Գյումրիի քաղաքապետարանի կոմունալ ծառայության տնօրենը։

Կանաչապատման այս տարվա աշխատանքները կենտրոնական հատվածներով չեն սահմանափակվելու։ Կանաչապատման ծրագրի համար մրցույթ է հայտարարվելու, որի համար նախատեսված է հատկացնել մոտ 2․5 մլն դրամ։ Ձեռք բերվող ծառատեսակները տեղի կլիմային հարմարվող են լինելու։

«Մրցույթը հայտարարվել է, մրցույթում կան տարբեր ծառեր, որոնք քաղաքին համապատասխան են, քաղաքին վայել են, ոչ միայն կլիմային այլ նաև քաղաքի պայմաններին համապատասխան են, որպեսզի շատ բարձր չլինեն»,- նշում է Գյումրիի կոմունալ ծառայության տնօրեն Արտավազդ Ոսկանյանը։

Գյումրիի կանաչ գոտիների վերականգնումն արդեն 30 տարի էական փոփոխություն չի կրել, և բազմիցս է նշվել, որ կանաչ գոտիները գրեթե 5 անգամ պակաս են սահմանված նորմերից։ Կատարվող ծառատունկերի արդյունքն աննշան է, պատճառը նաև ոռոգման ցանցի բացակայությունն է, սիզամարգերն ու ծառերը ջրվում են ջրցան մեքենաներով։

Անցած տարի քննարկման ներկայացվեց Գյումրիի 4 հատվածներում  կանաչապատման պիլոտային ծրագիրը, որով նախատեսվում էր դիզայներական նոր լուծումներով կանաչ միջավայր ստեղծել քաղաքում։ Փորձնական ծրագրի առաջին փուլը վերաբերեց կենտրոնական հրապարակին, որի աշխատանքները դեռ անավարտ են։