«Ելք»-ը ֆինանսական հաշվետվություն ներկայացնելու խիստ կանոններ է առաջարկում

ԱԺ «Ելք» խմբակցության անդամ Մանե Թանդիլյանն այսօր՝ մարտի 13-ին, խորհրդարանի Ֆինանսավարկային և բյուջետային հարցերի հանձնաժողովի քննարկմանն է ներկայացնելու իր հեղինակած «Հաշվապահական հաշվառման մասին» օրենքում լրացում կատարելու վերաբերյալ օրենսդրական փաթեթը:

Պատգամավորն առաջարկում է օրենքը լրացնել ևս մեկ դրույթով և պարտադրել խոշոր կազմակերպություններին, որպեսզի վերջիններս 5 օրյա ժամկետում քաղաքացու դիմումի հիման վրա էլեկտրոնային կամ տպագիր տարբերակով տրամադրեն իրենց կազմակերպության ֆինանսական հաշվետվությունը: 

Խնդիրն այն է, որ այսօր գործող «Հաշվապահական հաշվառման մասին» օրենքի պահանջի համաձայն խոշոր կազմակերպությունները, այդ թվում բանկերն ու բաժնետիրական ընկերությունները պարտավոր են հրապարակել իրենց ֆինանսական հաշվետվությունները մամուլում, ինտերնետով կամ տարածել գրքույկների ձևով: Սույն պարտավորությունը չկատարելը «Վարչական իրավախախտումների մասին» օրենքով առաջացնում է տուգանքի նշանակում նվազագույն աշխատավարձի հիսնապատիկի չափով, ապա տուգանքի նշանակումից հետո երեսուն օրվա ընթացքում: Ֆինանսական հաշվետվությունները պետական մարմիններ չներկայացնելը կամ դրանք օրենքով սահմանված կարգով չհրապարակելն առաջացնում է տուգանքի նշանակում` սահմանված նվազագույն աշխատավարձի հինգհարյուրապատիկի չափով: Արդյունքում՝ խոշոր կազմակերպությունները հնարավորություն են ստանում հինգ հարյուր հիսուն հազար դրամ վճարելով անտեսել օրենքի պահանջը՝ չհրապարակելով ֆինանսական հաշվետվությունները:

Պատգամավոր Մանե Թանդիլյանը առաջարկը նպատակ ունի նախ քաղաքացու համար օրենքով երաշխավորել, որ խոշոր կազմակերպությունները չեն կարող խուսափել ու պարտավոր են քաղաքացուն տրամադրել տեղեկատվություն և երկրորդ՝ պատգամավորն առաջարկում է խստացնել պատիժը պետական մարմիններ ֆինանսական հաշվետվությունները չներկայացնելու կամ դրանք չհրապարակելու համար, ինչպես նաև սահմանել խիստ պատիժ շահագրգիռ կողմերին հաշվետվությունները օրենքով սահմանված կարգով չտրամադրելու համար:

Օրենսդրական փաթեթով առաջարկվում է 500-ապատիկի փոխարեն կիրառել 1000-ապատիկ տուգանքը՝ պետական մարմիններին հաշվետվություն չներկայացնելու համար, իսկ քաղաքացու դիմումի հիման վրա տեղեկատվություն չտրամադրելը պատժել նվազագույն աշխատավարձի 2000-ապատիկի չափով: Այսինքն կիրառել մեկ և երկու միլիոն դրամի տուգանք: 

Կառավարությունը, սակայն, առաջարկել է օրինագծի հեղինակին վերանայել ու հստակեցումներ մտցնել նախագծում՝

1. հստակեցնել այն կազմակեր­պու­թյուն­նե­րի շրջանակը, որոնց ֆինան­սա­կան հաշվետվությունները ենթակա են տրամադրման դիմումի հի­ման վրա.

2. իրավաբանական անձանց համար նույնպես սահմանել առաջարկվող ընթացակարգով ֆինանսական հաշվետվություններ ստանալու հնարավորություն:

3. կազմակերպության պաշտոնական կայքում տեղադրված հաշվետվությունը համարել հրապարակված, իսկ եթե որևէ քաղաքացի դիմում է ներկայացրել, ապա կազմակերպությունը կարող է նրան տրամադրել իր պաշտոնական կայքի հղումը, որտեղից վերջինս կարող է ծանոթանալ իրեն հետաքրքրող հաշվետվությանը:

Բացի այդ կառավարությունն առաջարկել է վարչական պատժաչափերը թողնել նույնը, քանի որ գործադիրի հիմնավորմամբ նախագծով նախա­տես­ված տու­գանքների չա­փերը բավականին խիստ են սահմանված, ըստ էության, պատժիչ բնույթ են կրում, և տանում են դեպի քրեական պա­տասխանատ­վու­թյուն: