Հայկական դիրքերին հարվածելը թանկ նստեց իսրայելական ընկերության վրա. Կարեն Վրթանեսյան

Ժամանակակից աշխարհում զենքը վաճառվում է սպասարկման և այդ զենքը կիրառող կադրերի պատրաստման հետ միասին, սակայն ռազմական գործողություններին մասնակցությունը չի մտնում սպասարկման մեջ։ Եվ նման վարքը վատ հետևանքներ ունեցավ Ադրբեջանին ԱԹՍ-ներ վաճառող իսրայելական ընկերության վրա։ Այս մասին նշել է Razm.info մասնագիտացած կայքի համակարգող Կարեն Վրթանեսյանը «Շանթ» հեռուստաընկերության «Հեռանկար» հաղորդման եթերում։

«Սպասարկում են, գուցե վերանորոգում են, ինչ-որ տեխնոլոգիաներ են փոխանցել, որովհետև Ադրբեջանը հայտարում է, որ իրենք են նաև արտադրում (չնայած այստեղ էլ որոշ կասկածելի պահեր կան) … Ցանկացած դեպքում այդ ընկերության վրա, որի ներկայացուցիչները մասնակցել են հայկական դիրքերին հարվածելուն, իրենց համար շատ թանկ նստեց։ Այսինքն իրենք խնդիրներ ունեցան Իսրայելի պաշտպանության նախարարության հետ, խնդիրներ ունեցան իրավապահների հետ, ինչը հաջորդաբար բերեց խնդիրների նաև ներդրողների հետ, և նաև պրոբլեմներ ունեցան Միացյալ Նահանգներում։ Մոտ 100 միլիոն դոլարի վնասներ կրեցին», – նշել է Վրթանեսյանը։

Փորձագետի խոսքով, սակայն, այդ զենքի գնումներն ու փորձարկումները փորձում է կիրառել քարոզչական ճնշում գործադրելու նպատակով։ Այդ շարքից են Ադրբեջանի կողմից զրահափոխադրիչների գնումները։ Ադրբեջանական կողմը ներկայացնում է մեծ աղմուկով, սակայն այդ զինտեխնիկան չի փոխում ուժերի բալանսը։

«Ցավոք սրտի, հայկական որոշ լրատվամիջոցներ այդ խայծը կուլ են տալիս, քոփի-փեյսթ են անում և ռետրանսլյացիա են անում, ուժեղացնում են այդ ուղերձը և ինչ-որ մտահոգություններ ստեղծում ոմանց մոտ», – ասել է  Վրթանեսյանը։

Խոսքը մասնավորապես նաև վերը նշված զրահափոխադրիչների մասին է, որոնք ստանալուց հետո Ադրբեջանի ՊՆ կայքը հաղորդագրություն տարածեց, թե իբր դրանք հաջողությամբ կիրառվել են Ապրիլյան պատերազմում։ Սակայն դրանց կիրառման մասին ոչ միայն հիշատակումներ չկային մինչ այդ, այլև դրանց թույլ պաշտպանվածությունը անտրամաբանական էր դարձնում դրանց ներգրավումը ռազմական գործողություններին. դրանք ուղղակի հրանոթի «միս» կդառնային։

«Հեռանկարի» ամբողջական տեսագրությունը կարող եք դիտել ստորև։

Ինչ վերաբերում է Ադրբեջանին Orbiter-1K մահապարտ անօդաչու թռչող սարքեր վաճառող իսրայելական Aeronautics ընկերությանը, ապա այն վատ վիճակում է դեռ 2017 թվականի ամռանից։ Հուլիսին հայտնի էր դարձել, որ իսրայելցի մասնագետները սեփական արտադրության անօդաչու թռչող սարքերի հնարավորությունները ցուցադրելու համար ադրբեջանցիների հրահանգով մասնակցել են Արցախի պաշտպանության բանակի դիրքերի դեմ գրոհներին։

Օգոստոսին Իսրայելի պաշտպանության նախարարության համապատասխան գործակալությունն ընկերությանն արգելեց անօդաչու թռչող սարքերի հետագա վաճառքը «նշանակալի գնորդին»։ Նույն հարցի վերաբերյալ անօդաչուներն արտադրող ընկերությունը հայտնել էր, որ «նշանակալի գնորդի» հետ ունի 20 միլիոն դոլարի պայմանագիր։ Ապա դեպքի վերաբերյալ հետաքննություն էին սկսել Իսրայելի իրավապահները։

Արդյունքում ընկերության բաժնետոմսերի գներն այնքան էին նվազել, որ բաժնետերերը դատի էին տվել ընկերության ղեկավարությանը։