Ի՞նչ է նշանակում Արցախի շրջափակման հարցին Զախարովայի անդրադարձը. նոր զարգացումներ են հասունանում

Ռուսաստանի արտգործնախարարության պաշտոնական ներկայացուցիչը այսօրվա ճեպազրույցում անդրադարձել է Ադրբեջանի կողմից Արցախի շրջափակման թեմային:  Մարիա Զախարովան հերթական անգամ կոչ է արել Բաքվի իշխանություններին անհապաղ բացել Լաչինի միջանցքը:

Ինչ-որ նոր բան ասե՞լ է Զախարովան, թե՞ սա ընդամենը նրա հերթական կոչն է եղել: Թեմային՝ «Հորիզոնի» տաղավարում անդրադարձել է Արտյոմ Երկանյանը:

«Այստեղ արժե նկատել, թե ինչ ֆոնի վրա է տեղի ունենում այս հայտարարությունը: Մի քանի օր առաջ Ստեփանակերտը պաշտոնապես հաստատեց տեղեկությունն այն մասին, որ Վաշինգտոնից առաջարկ էր ստացվել Բաքվի հետ ամերիկյան միջոնորդությամբ բանակցելու վերաբերյալ, և որ ղարաբաղյան կողմը մերժել է այս առաջարկը՝ հաշվի առնելով այն, որ օրակարգում Ադրբեջանի թելադրած հարցերն էին, այն է՝ Ադրբեջանի կազմում ինտեգրվելու գաղափարը: Հավանաբար Մոսկվայում գնահատել էին այն փաստը, որ Արցախը մերժել էր ամերիկացիների այս առաջարկը:

Դրան հետևել էր տեղեկությունն այն մասին, որ Արցախի նախագահ Արայիկ Հարությունյանը նամակով դիմել էր ՌԴ նախագահ Վլադիմիր Պուտինին: Դրան հետևեց Նիկոլ Փաշինյան-Վլադիմիր Պուտին հեռախոսազրույցը, որը, ինչպես հաստատվեց, տեղի էր ունեցել Արայիկ Հարությունյանի խնդրանքով, և, ըստ էության, հաստատվում են նաև տեղեկություններն այն մասին, որ Պուտինն ու Փաշինյանը քննարկում էին հենց Արայիկ Հարությունյանի դիմումը՝ Վլադիմիր Պուտինին: Այնուհետև դրան հետևեց տեղեկությունն այն մասին, որ շատ շուտով տարածաշրջան կայցելի ՌԴ նախագահի լիազոր ներկայացուցիչ Իգոր Խավաևը՝ արցախյան խնդրի բանակցություններով և որ սկզբից կայցելի Բաքու, հետո՝ Երևան: Այս փաստերի շարքը վկայում է այն մասին, որ ինչ-որ նոր զարգացումներ են հասունանում:

Եվ ահա այս քաղաքական ֆոնի վրա է հնչել Մարիա Զախարովայի այսօրվա հայտարարությունը, որը, փաստորեն, կարևոր է հենց այդ ֆոնին, քան ինքը՝ հայտարարությունը: Նա որևէ նոր բան չի ասել, նախ ասել է, որ Ռուսաստանը մտահոգություն է հայտնում հաճախակի դարձած հրադադարի խախտման կապակցությամբ, Լաչինի միջանցքի փակ լինելու հանգամանգով, ինչը հարուցել է հումանիտար ծանր  իրավիճակ, երբ արդեն ռեալ վտանգ կա, որ մարդիկ մնան առանց սննդամթերքի և դեղորայքի և ի վերջո կոչ է արել Ադրբեջանի իշխանություններին անհապաղ բացել Լաչինի միջանցքը: Հետաքրքիր է նաև, երբ հարց էին տվել, թե ինչպիսին կլինի ռուս խաղաղապահների գործողությունները, եթե Արցախի նկատմամբ Ադրբեջանն իրեն թույլ տա ռազմական ագրեսիա, Զախարովան ասել է հետևյալը. «կախված կլինի հողի վրա իրական իրավիճակից և կբխի ձեռք բերված համաձայնություններից»:

Իսկ ամենահետաքրքիրը, կարծում եմ, այն է, թե Զախարովայի խոսքերն ինչպես են մեկնաբանել ադրբեջանական՝ հատկապես Ալիևի վարչակազմի կողմից վերահսկվող լրատվամիջոցները: «Հաքին Ազ»-ն այս թեմային վերաբերող իր հոդվածը վերնագրել է հետևյալ կերպ. «Մոսկվան վերջնագիր է ներկայացնում Բաքվին՝ պահանջելով ապաշրջափակել Լաչինի միջանցքը»: Կարծում եմ՝ այս վերնագիրն ինքնին խոսում է և մեզ շատ բան է թույլ տալիս կռահել» ,-ասել է Արտյոմ Երկանյանը:

Արցախում իշխանությունները ինչ-որ սպասելիքներ ունեն Արայիկ Հարությունյանի՝ Պուտիին ուղված նամակից: Մանրամասները՝ ամբողջական հարցազրույցում: