Աղթամար կղզում գտնվող ս. Խաչի պատարագը մասնակիցների մեծ թվի պատճառով եկեղեցուց տեղափոխվել է բակ

Վանա լճի Աղթամար կղզում գտնվող ս. Խաչ եկեղեցում կայացել է հերթական պատարագը, որն, ի տարբերություն նախորդ տարվա, իր վրա է սևեռել ավելի մեծ ուշադրություն:

Եկեղեցու վերանորոգումից հետո Թուրքիայի կառավարությունը տևական ժամանակ հրաժարվում էր խաչ տեղադրել եկեղեցու գմբեթի վրա, բայց ի վերջո տեղի տվեց, քանի որ ամբողջ աշխարհի հայությունը բողոքի ցույց էր կազմակերպել, ու թեև ս. Խաչ եկեղեցին սկսել է գործել որպես թանգարան, այդուհանդերձ թուրքական իշխանությունները թույլատրում են տարին մեկ անգամ այնտեղ անցկացնել պատարագ:

«Արմենպրես»-ի հաղորդմամբ՝ այս տարվա պատարագի կապակցությամբ անվտանգության միջոցառումներն աննախադեպ են եղել: Թուրքական հատուկ ծառայությունների ներկայացուցիչները Հայաստանից ժամանածներին ուղեկցել են դեռ հյուրանոցներից, իսկ կղզում ուժեղացված պարեկություն են իրականացրել տասնյակ ոստիկաններ, որպեսզի կանխարգելեին հնարավոր անախորժությունները տեղաբնակ ծայրահեղական թուրքերի կամ ադրբեջանցիների կողմից: Կղզու վերևում ողջ պատարագի ընթացքում պտտվել է ոստիկանության ուղղաթիռը:

Բարեբախտաբար, միջադեպեր չեն գրանցվել և արարողությունն անցել է բնականոն հունով, որին, ի դեպ, մասնակցել են ոչ միայն հայեր, այլև բազմաթիվ զբոսաշրջիկներ տարբեր երկրներից, ինչպես նաև տեղաբնակ քրդեր և թուրքեր: Հավաքվածներն այնքան շատ են եղել, որ պատարագը նախ մեկնարկել է ներսում, այնուհետև շարունակվել եկեղեցու բակում՝ նույն ծիսակարգով, ինչից ներկաները ստացել են մեծ բավականություն:

Պատարագից հետո «Արմենպրես»-ին տված բացառիկ հարցազրույցում Կոստանդնուպոլսի հայոց պատրիարք, գերաշնորհ Տ. Սահակ արքեպիսկոպոս Մաշալյանն ասել է.

«Մեզ համար մեծ առավելություն և մենաշնորհ է ս.Խաչ եկեղեցու մեջ պատարագ մատուցելը: Սա հազար հարյուր տարվա պատմություն ունեցող հոգևոր և մշակութային արժեք է, ու թեև այժմ կարգավիճակով թանգարան է, սակայն հատուկ արտոնության շնորհիվ տարին մեկ անգամ այստեղ մատուցվում է սուրբ պատարագ: Փառք Աստծո, որ ունենք նման հնարավորություն: Ս. Խաչն ամբողջ Արևելյան Անատոլիայի մեջ միակ եկեղեցին է, որի գմբեթի վրա խաչ կա, հետևաբար դա ինքնին մեծ վկայություն է»:

Սրբազանը նշել է, որ մարդիկ տարբեր զգացումներ ունեն՝ լինեն պաշտոնյաներ, թե ուխտավորներ, իսկ հոգևորականների համար օրն իսկապես փառավոր էր: Նա տեղեկացրել է, որ յուրաքանչյուր տարվա ընթացքում Աղթամար կղզի է այցելում մոտ մեկ միլիոն մարդ:

«Երբ մարդիկ լռում են, խոսում են քարերը: Կղզու վրա գտնվելու հանգամանքը չի խանգարել, որպեսզի եկեղեցին լավ պահպանված մնա, որտեղ հանուն ողջ հայության մատուցեցինք երկար սպասված պատարագը՝ հոգևոր կապ ստեղծելով ներկաների ու մեր նախնիների միջև: Նրանց օրհնությունը մեր վրա է, ում մշտապես հիշում ենք մեր աղոթքներում, իսկ պատարագն իր հերթին մեծ շնորհ է բերում համայն հայությանը»,- ասել է արքեպիսկոպոս Մաշալյանը:

Խոսելով Թուրքիայի տարածքում գտնվող բազմաթիվ լքված ու կիսաքանդ հայկական եկեղեցիների մասին՝ արքեպիսկոպոս Մաշալյանն ընդգծել է, որ Պոլսո պատրիարքարանն այդ շինություններն իր հովանու տակ վերցնելու իրավունք չունի, իսկ կառավարությունը, եթե միջոցներ ունի, որոշակի վերականգնողական գործողություններ է իրականացնում: Նրա պնդմամբ՝ հին եկեղեցիների վերանորոգումն ավելի թանկ է, քան նոր վանքերի կառուցումը, ուստի այդ հարցում անհրաժեշտ են Թուրքիայի և Հայաստանի համատեղ ջանքերը: