Դավիթ Սանասարյանը` պետբյուջե վերադարձվող գումարների մասին

Պետական վերահսկողական ծառայության պետ Դավիթ Սանասարյանը սեպտեմբերի 5-ին, ամփոփելով պաշտոնավարման 100 օրը, հայտնեց, որ ուսումնասիրություններ են կատարել «Բարձրավոլտ էլեկտրական ցանցեր»-ում, ոստիկանության ենթակայության տակ գտնվող «Լուսանշան» ՊՈԱԿ-ում, որը ոստիկանության ենթակայության տակ էր և լուծարման պրոցեսի մեջ, դրա համար շտապեցին, որ հետքերը չվերացնեն: Սանասարյանը տեղեկացրեց, որ իրենք ուսումնասիրություններ են իրականացրել նաև «Ուկրինվեստ»-ում, «Հայրենիք-Սփյուռք» ՊՈԱԿ-ում, որի վերաբերյալ քրգործ է հարուցվել, իսկ այս պահին ուսումնասիրություններ են Հայաստանի ագրարային համալսարանում, ընդ որում` բավական խորացված:

«Ունենք որոշակի արդյունքներ, որոնց մասին չեմ շտապի մանրամասներ ասել, ուսումնասիրությունների ավարտին կտեղեկացնենք: Իմ խոստացած ԵՊՀ-ում սկսեցինք, բայց քանի որ արձակուրդ էր, թողեցինք հանգստանան, հիմա վերադարձել են, շարունակելու ենք ուսումնասիրել, նաև ամփոփում ենք Էջմիածին քաղաքի ուսումնասիրությունները»,- ասաց նա:

Սանասարյանը ներկայացրեց, թե իր ղեկավարած կառույցի գործունեության արդյունքում որքան գումար է վերականգնվել պետբյուջե: Նա շեշտեց` իրենք իրավական գնահատական չեն տալու, դա կանեն քննչական կառույցները: Ծառայության ղեկավարը նշեց, որ հանցակազմ պարունակող իրավիճակներ ունեն բոլոր ոլորտներում, և դրա մասին նույնպես կասեն քննչական կառույցները: Սանասարյանի խոսքով` վերահսկողական ծառայության աշխատանքի գրանցած առաջին արդյունքը, որ եղել է, այն է, որ 40 մլն դրամով նվազեցրել են «Բարձրավոլտ էլեկտրական ցանցեր»-ի հետ աշխատող մի կազմակերպության ծառայությունների նախահաշվային արժեքը, վերջիններս շարունակելու են բարձրավոլտին ծառայություն մատուցել, բայց այդքանով նվազեցրել են գումարը:

«Սա մի կազմակերպության մասին է: Առաջիկայում պետբյուջե կվերադարձնեն 140 մլն դրամ, երբ կտանք այդ հաշիվը: Տարբեր տարիներ կան, տարբեր տնօրենների արած գործերն ամփոփում ենք: Այն թվերը, որ ասում եմ, հստակ ասում եմ նաև՝ իրենք ընդունել են, որ պատրաստ են գումար վերադարձնել պետբյուջե, եկել են, ինքնակամ ասել, որևէ մեկին չենք խնդրել: Մեր գործը հետևյալն է` մենք ներկայացնում ենք վարչապետին, դրանից հետո իրավապահներին, իրենք լսում են, գալիս, ասում, որ պատրաստ են վերադարձնել»,- ասաց նա:

Սանասարյանը նաև տեղեկացրեց, որ միջազգային կապալառուներից մեկի գործունեությունն են ուսումնասիրել, երեք ամսվա ընթացքում 1,5 մլն դոլարով կիջեցնեն պայմանագրային արժեքը: «Լուսանշան» ՊՈԱԿ-ին անդրադառնալով` ծառայության պետը նշեց, որ ՊՈԱԿ-ը երկու տնօրեն է ունեցել` 2014-2015 թթ. և 2016-2018 թթ., 2016-2018 թթ. արած բոլոր խախտումների համար, նախնական տվյալներով, նրանք պետբյուջե են վերադարձնելու 210 մլն դրամ, այդպիսի պատրաստակամություն հայտնել են հենց ՊՈԱԿ-ում: