Ռուսաստանը կարծես զգացել է ՀՀ իշխանությունների թույլ կողմը. Արմեն Բադալյան

Հայ-ռուսական հարաբերություններում խնդիրներ են առաջացել, ու դա թաքցնել հնարավոր չէ, որովհետև դառնում են ակնառու: SHANTNEWS.am-ի հետ զրույցում նման տեսակետ հայտնեց քաղտեխնոլոգ Արմեն Բադալյանը: Նա մասնավորեցրեց` 100 օրվա ընթացքում տեսնում ենք, որ ՌԴ ԱԳ նախարարը երկու անգամ հայտարարություն է անում, որը ոչ այնքան ցանկալի է ՀՀ իշխանությունների համար:

«Կարելի է ասել, եթե նայենք զուտ էթիկայի տեսակետից … Քաղաքական տեսակետից ոչ մի տարօրինակ բան չկա, երբ 10 տարվա ընդմիջումից հետո հանկարծ ՌԴ նախագահը շնորհավորում է երկրորդ նախագահի ծննդյան օրը, այն դեպքում, երբ երրորդ նախագահի ծննդյան օրը չշնորհավորեց: Սա ևս կարող ենք դիտարկել որպես անհամաձայնություն ներկա իշխանությունների կողմից իրականացվող այդ գործընթացին, դրան եթե գումարենք այն, որ Ռուսաստանը ինքն իր տարածքում վերացրել է հետախուզումը պաշտպանության նախկին նախարար Միքայել Հարությունյանի նկատմամբ, ապա դա ցույց է տալիս, որ խնդիրներ կան:

Ի դեպ, Ռուսաստանում նշել են նաև, որ Հայաստանը պետք է համոզի, որ ՀԱՊԿ-ի և ԵԱՀԿ-ի շրջանակներում ինքը իր կուրսը չի փոխում, այսինքն` ցույց են տալիս, որ կա անվստահության որոշակի մակարդակ: Նաև երկրորդ տեսակետը կա, որ հանդիպումից առաջ դու բարձրացնում ես խաղադրույքները, որպեսզի հետո ավելի շատ ստանաս: Դա տարածված ձև է, խստացնում ես մթնոլորտը, որպեսզի դիմացինից ի օգուտ քեզ շատ արդյունքներ կարողանաս ստանալ»,- ասաց նա:

Բադալյանն ընդգծեց, որ Հայաստանի ղեկավարությունն այս 100 օրվա մեջ արդեն երրորդ անգամ է պատրաստվում գնալ-հանդիպել ՌԴ նախագահի հետ, իսկ Ռուսաստանը կարծես թե զգացել է Հայաստանի իշխանությունների թույլ կողմը, այն է` Հայաստանի իշխանությունները չեն զարգացնում հարաբերությունները ԵՄ-ի հետ:

Քաղտեխնոլոգը նշեց, որ 2017-ի նոյեմբերին ԵՄ հետ կնքված պայմանագրի իրականացման համար ինչ-որ երկրորդական մակարդակի է իջել դրա իրականացումը, իսկ Հայաստան-ԱՄՆ հարաբերությունների քաղաքական օրակարգ չկա, չկան նաև Հայաստան-Իրան հնարավոր զարգացումներ, Հայաստան-Չինաստան քաղաքական օրակարգ չկա, այսինքն` այլ երկրների հետ Հայաստանի իշխանությունները քաղաքական ակտիվ գործընթաց չեն իրականացնում, և իրենց առաջ նպատակ են դրել անընդհատ լավացնել հայ-ռուսական հարաբերությունները:

«Բնականաբար, Ռուսաստանը զգում է, որ Հայաստանն անընդհատ ուզում է լավացնել հարաբերությունները, դրա համար խնդիրներ է ստեղծում այդ հարաբերություններում, որպեսզի ավելի շատ ստանա Հայաստանի իշխանություններից, և քանի դեռ Հայաստանի իշխանությունները չեն վերականգնել բազմավեկտոր արտաքին քաղաքականությունը, այս խնդիրները հայ-ռուսական հարաբերություններում լինելու են, ծագելու են: Բացի այդ, Հայաստանի ղեկավարությունը չունի այն քաղաքական կշիռը, որպեսզի կարողանա ՀԱՊԿ-ում իրավիճակը բարելավել, որովհետև այնտեղ կան նաև Նազարբաևը, Լուկաշենկոն, որոնք իրենց քաղաքական կշռով հաստատ ավելի բարձր են, քան Հայաստանի վարչապետը»,- նշեց քաղտեխնոլոգը:

Հարցին` Ռուսաստանը Հայաստանից նվազագույնը և առավելագույնը ինչ է ակնկալում ստանալ, քաղտեխնոլոգը նշեց, որ Ռուսաստանն իր փորձագետների միջոցով, որոնք Կրեմլի տեսակետն են արտահայտում, ակնարկել է, որ այստեղ որոշակի պաշտոնյաներ կան, որոնք ձեռնտու չեն Ռուսաստանին և գուցե Ռուսաստանը փորձի այդ պաշտոնյաներին փոխել, դադարեցնել «Մարտի 1-ի» հետաքննությունը նախկին իշխանություններին ձերբակալելու գնով:

«Շարքայինները գուցե ձերբակալվեն, բարձրաստիճանները` չէ: Ռուսաստանը միանշանակ ցանկանում է, որ Հայաստանը վերադառնա քաղաքական այն մակարդակին, ինչ կար մինչև մայիսյան իշխանափոխությունը, այսինքն` Ռուսաստանից ինչ ասեն, Հայաստանը միանգամից կրկնի: Չնայած մեծ մասամբ Հայաստանն այս պահի դրությամբ դեռ այդպես էլ շարունակում է, բայց որոշակի վայրիվերումներով, հիմա Ռուսաստանն ուզում է, որ վայրիվերումներ չլինեն: ԵՄ-ում էլ շատ մեծ ոգևորությամբ ընդունեցին Հայաստանի այս իշխանափոխությունը, ու Ռուսաստանը կցանկանար, որ Հայաստանը սառը ջուր լցներ ԵՄ-ի վրա, ինչը, իհարկե, արդեն արվեց Բրյուսելում, բայց նա կցանկանար, որ Հայաստանը միանշանակ և աներկբայորեն Ռուսաստանի կողքին լիներ, շարունակեր այդ վասալային քաղաքականությունը»,- ասաց Բադալյանը:

Հետաքրքրվեցինք` իսկ Ռուսաստանն ի՞նչ է պատրաստ զիջել այդ հարաբերությունների վերականգնման համար, ինչին նա պատասխանեց, որ Ռուսաստանը ոչինչ չի պատրաստվում զիջել, նա փորձելու է ստանալ առավելագույնը` ոչինչ չզիջելով, որովհետև Հայաստանն այնպիսի արտաքին քաղաքականություն է վարում, որ Ռուսաստանը տեսնում է` այստեղ զիջելու խնդիր չունի: