Ես կարդարացվեմ, իմ պատիվը կվերականգնեմ. Ալիկ Սարգսյան

 «Տվյալ անձնավորությանը ո՛չ տեսել եմ, ո՛չ ճանաչում եմ, ո՛չ հեռախոսով եմ  խոսել հետը իմ կյանքի ընթացքում գոնե մի անգամ, գոնե ձայնը լսած լինեի: Իր մասին լսել եմ էդ «Ավազահատիկի»-ի հետ կապված գործի շրջանակում, որի համար խիստ զարմացել  եմ: Ընդհանրապես տեղեկություն չունեմ, թե ինչի մասին է խոսքը: Բայց քանի որ իմ անունը շրջանառվել է էս գործով, չի բացառվում, որ իմ վրա էլ գործ հարուցվի»,- ասել է Ալիկ Սարգսյանը՝ խոսելով Քննչական կոմիտեի այն հաղորդման մասին, որի համաձայն՝ «քննվող քրեական գործով փաստական տվյալներ են ձեռք բերվել Հայաստանի նախկին վարչապետ Հովիկ Աբրահամյանի, ինչպես նաև նախկին ոստիկանապետ, Արարատի նախկին մարզպետ Ալիկ Սարգսյանի կողմից լիազորություններն անցնելու, խարդախություն կատարելու առերևույթ դեպքերի վերաբերյալ և որոշում է կայացվել գործն ուղարկել Հատուկ քննչական ծառայություն»։

Հիշեցնենք՝  քրեական գործը հարուցվել է «Ավազահատիկ» ՍՊԸ ընկերության տնօրենի հաղորդման հիման վրա՝ առ այն, որ 2000 թվականին հիմնադրված ընկերությունն Արարատի մարզում զբաղվել է հանքարդյունաբերությամբ՝ ներգրավելով վարկային միջոցներ, կատարել է շուրջ 80 հազար ԱՄՆ դոլարի ներդրում, ձեռք է բերել ավազի լվացման և մաղման հոսքագծեր։ Սակայն 2008 թվականին բարձրաստիճան պաշտոնատար անձինք ստեղծել են արհեստական խոչընդոտներ՝ պահանջելով ընկերության բաժնեմասերի 60 տոկոսը՝ նշելով, որ հակառակ պարագայում հանքերը չեն շահագործվի, ընդ որում, բաժնեմասերի 60 տոկոսը պահանջել են ձևակերպել երկու տարբեր անձանց անունով՝ յուրաքանչյուրին 30 տոկոս։

Քննչական կոմիտեի հաղորդման համաձայն՝  պարզվել է նաև, որ Նորամարգ համայնքի ղեկավարը հայցադիմում է ներկայացրել դատարան՝ հողատարածքի վարձակալության վերաբերյալ, որտեղ ընկերությունը զբաղվում էր ավազի հանույթով, և պահանջել լուծարել «Ավազահատիկ»-ի տնօրենի հետ ավելի վաղ ստորագրված պայմանագիրը։ Դատարանը բավարարել է հայցը, որից հետո նոր պայմանագիր է ստորագրվել տվյալ հողատարածքի վարձակալության վերաբերյալ այլ սեփականատերերի հետ։

Ընկերության հիմնադիրը և այլ վկաներ իրենց ցուցմունքներում առերևույթ չարաշահումներին առնչություն ունեցած անձանց թվում մատնանշել են Հովիկ և Ջոնիկ Աբրահամյաններին, Ալիկ Սարգսյանին:

«Ես չեմ կարծում՝ էսքան թեթևամիտ լինեի՝ մի բանի հետ առնչություն չունենայի ու հիմա ըտենց հայտարարությամբ հանդես գայի: Ինչ վերաբերում է  հեռուստատեսությամբ հայտնելուն՝ չեմ բացառում, որ քրեական գործ կհարուցվի: Ցավում եմ ուղղակի, որ առանց համապատասխան նյութեր հավաքելու, առանց  նյութերը ստուգելու ՝ քրեական գործ են  հարուցում, որից  հետո սկսում են ստուգումները: Բնականաբար, էդ գործը կարճվելու է, որովհետև ես ընդհանրապես կապ չունեմ էդ գործի հետ, որովհետև անմեղ մարդուն չեն կարող մեղադրել: Սկսում են հետևի կողմից: Հարուցում են, մարդուն վարկաբեկում են, հեռուստատեսությամբ ասվում է, շատերը հանիրավի ուրախանում են, որովհետև էսօր էդ մոլուցքը կա՝ մեկի անհաջողությամբ ուրախանալ, հետո պարզվում է, որ դա չկա»:

Ալիկ Սարգսյանն ասել է նաև, որ հայց է ներկայացրել դատարան՝ իր պատիվն ու արժանապատվությունը վիրավորելու դիմաց բարոյական փոխհատուցում ստանալու պահանջով: