Շտաբային ուսումնավարժություն «Ուժեղ երկրաշարժի դեպքում Շիրակի մարզում բնակչության պաշտպանության միջոցառումների կազմակերպումը» թեմայով

Սույն թվականի հունիսի 25-ին ՀՀ ՆԳՆ փրկարար ծառայությունը ՄԱԿ-ի Մանկական հիմնադրամի և ԱՄՆ Միջազգային զարգացման գործակալության հայաստանյան գրասենյակի աջակցությամբ Շիրակի մարզում անցկացրեց «Ուժեղ երկրաշարժի դեպքում Շիրակի մարզում բնակչության պաշտպանության միջոցառումների կազմակերպումը» թեմայով շտաբային ուսումնավարժություն։

Ուսումնավարժության նպատակներն էին՝

կատարելագործել ուսումնավարժության մասնակիցների տեսական հմտություններն ու ունակություններն ուժեղ երկրաշարժի դեպքում բնակչության պաշտպանության միջոցառումների վերաբերյալ որոշումների ընդունման, ինչպես նաև աղետի գոտում փրկարարական և անհետաձգելի վթարավերականգնողական աշխատանքների իրականացման գործում,

ստուգել «Ուժեղ երկրաշարժի դեպքում Շիրակի մարզի բնակչության պաշտպանության» պլանի իրատեսությունը,

ստուգել և կատարելագործել փոխհամագործակցությունը պետական կառավարման համակարգի մարմինների, մարզպետարանի, համայնքապետարանների, արձագանքող ստորաբաժանումների և շահագրգիռ բոլոր կողմերի միջև։
Ուսումնավարժությանը մասնակցում էին ներկայացուցիչներ՝

Աշխատանքի և սոցիալական հարցերի, Առողջապահության, Բարձր տեխնոլոգիական արդյունաբերության, Էկոնոմիկայի, Տարածքային կառավարման և ենթակառուցվածքների, Պաշտպանության նախարարություններից, Առողջապահական և աշխատանքի, Սննդամթերքի անվտանգության, Քաղաքաշինության, տեխնիկական և հրդեհային անվտանգության տեսչական մարմիններից, Քաղաքաշինության, Քաղաքացիական ավիացիայի կոմիտեներից, Շիրակի մարզպետարանից և համայնքապետարաններից, ՀՀ ՆԳՆ փրկարար ծառայության կենտրոնական ապարատի և Շիրակի մարզային փրկարարական վարչությունից, ՀՀ ՆԳՆ ոստիկանության կենտրոնական ապարատի և Շիրակի մարզային վարչությունից, «Հիվանդությունների վերահսկման և կանխարգելման ազգային կենտրոն» ՊՈԱԿ-ից, «Վեոլիա Ջուր», «Հայաստանի էլեկտրական ցանցեր», «Գազպրոմ Արմենիա» ՓԲԸ-ներից, «Տելեկոմ Արմենիա» ԲԲԸ-ից, «Արմենիա միջազգային օդանավակայան» ՓԲԸ «Շիրակ» օդանավակայանից, ՄԱԿ-ի հայաստանյան գրասենյակից, Կարմիր խաչի միջազգային կոմիտեի հայաստանյան պատվիրակությունից, Հայկական կարմիր խաչի ընկերությունից։

Բացման խոսքով հանդես եկան Շիրակի մարզպետ Մուշեղ Մուրադյանը և ՀՀ ՆԳՆ փրկարար ծառայության Բնակչության պաշտպանության և աղետների ռիսկի նվազեցման վարչության պետ, փ/ծ գնդապետ Գուրգեն Մարտիրոսյանը։
Ողջունելով ներկաներին՝ Շիրակի մարզպետ Մ. Մուրադյանը կարևորեց ուժեղ երկրաշարժի թեմայով շտաբային ուսումնավարժության անցկացումը հատկապես Շիրակի մարզում, շնորհակալություն հայտնելով ուսումնավարժության կազմակերպիչներին, աջակիցներին, մասնավորապես ՀՀ ՆԳՆ փրկարար ծառայությանն ու ՄԱԿ-ի Մանկական հիմնադրամին, ՄԱԿ-ի Պարենի համաշխարհային ծրագրի հայաստանյան գրասենյակին, ԱՄՆ Միջազգային զարգացման գործակալության հայաստանյան գրասենյակին, Կարմիր խաչի միջազգային կոմիտեի հայաստանյան պատվիրակությանը, Հայկական կարմիր խաչի ընկերության ներկայացուցիչներին և բոլոր մասնակիցներին։ Եզրափակելով իր խոսքը, Շիրակի մարզպետը համոզմունք հայտնեց, որ ուսումնավարժությունը ծառայելու է նպատակին, և մասնակիցները ձեռք են բերելու նոր գիտելիքներ ու հմտություններ:

Փ/ծ գնդապետ Գ. Մարտիրոսյանը ողջունելով մասնակիցներին նշեց, որ ուսումնավարժությունն ունի հանրապետական նշանակություն, որն իր ծավալով և ձևաչափով խաղարկվում է առաջին անգամ, և որը որոշում կայացնող ղեկավար կազմի շրջանում նոր գիտելիքների, հմտությունների և կարողությունների ձեռքբերման, ամրապնդման և զարգացման լավ հնարավորություն է: Փ/ծ գնդապետ Գ.Մարտիրոսյանը հավելեց, որ ՀՀ ՆԳՆ փրկարար ծառայությունը կարևորում է արտակարգ իրավիճակներում բնակչության պաշտպանությանն ուղղված տարաբնույթ ուսումնավարժությունների անցկացումը:

Ուսումնավարժությունն անցկացվեց 2 փուլով, մասնակիցներին առաջադրվեց խնդրադրում՝ 56 միջանկյալների միջոցով։
Ուսումնավարժության խաղարկման համար ձևավորվել էին 14 օպերատիվ աշխատանքային խմբեր՝ տարբեր ուղղություններով, որոնք հանդես եկան զեկույցներով և ներկայացրեցին իրավիճակին համապատասխան լուծումներ։
Ուսումնավարժության շրջանակներում, աշխատանքային խմբերը՝ ըստ ուղղությունների, հանդիպումներ ունեցան միջազգային գործընկերների ներկայացուցիչների հետ. քննարկվեցին հավանական աղետի գոտում միջազգային կառույցների կողմից տրամադրվող աջակցության ուղղությունների ու ծավալների, աջակցության մեխանիզմների և գործիքների, ինչպես նաև հումանիտար առաքելության օպերատիվ իրականացման հարցեր։

ՄԱԿ-ի Մանկական հիմնադրամի Կլիմայի փոփոխության և ԱՌՆ բաժնի ղեկավար Վիգեն Շիրվանյանն իր ամփոփիչ խոսքում նշեց, որ արդեն 10 տարի ՄԱԿ-ի Մանկական հիմնադրամը համագործակցում է Փրկարար ծառայության հետ՝ նպաստելով աղետների ռիսկի կառավարման և արտակարգ իրավիճակներին պատրաստվածության հզորացմանը ինչպես ազգային, այնպես էլ մարզային մակարդակներում։

Վ. Շիրվանյանը նաև նշեց, որ վարժանքներից հետո գնահատականներն ու վերլուծությունները կարևոր դեր կունենան բացերը հասկանալու և բարելավման ենթակա քայլերը բացահայտելու համար՝ հատուկ ուշադրություն դարձնելով հատկապես խոցելի խմբերի կարիքների վրա։ Այդ նպատակով ՄԱԿ-ի Մանկական հիմնադրամն աշխատում է ազգային և տեղական իշխանությունների հետ՝ վերանայելու և ամրապնդելու աղետների ռիսկի կառավարման տեղական պլանները երեխաների կարիքների տեսանկյունից, ինչպես նաև ստեղծելու աշխատանքային մեխանիզմներ և ձևաչափեր՝ ընտանիքների և երեխաների հետ աշխատող համապատասխան դերակատարների տեխնիկական կարողությունները զարգացնելու համար:

Ամփոփման ժամանակ ղեկավար կազմի, կազմակերպիչների, մասնակիցների, այդ թվում՝ միջազգային կազմակերպությունների հայաստանյան գրասենյակների կողմից բարձր գնահատվեց ուսումնավարժության այս ձևաչափով և ծավալով անցկացումը, որը լավ հնարավորություն ստեղծեց նոր գիտելիքների, հմտությունների և կարողությունների ձեռքբերման, ամրապնդման և զարգացման համար։