Ի՞նչ սպասումներ կան Վճռաբեկ դատարանի նորընտիր նախագահի աշխատանքից

Խորհրդարանում այսօր ձայների ճնշող մեծամասնությամբ Վճռաբեկ դատարանի նախագահ ընտրվեց Երվանդ Խունդկարյանը: Փաստաբան Երվանդ Վարոսյանի գնահատմամբ` այս ընտրությունը ցույց է տալիս, որ համակարգային փոփոխություն չի եղել: SHANTNEWS.am-ի հետ զրույցում Վարոսյանը նշեց, որ Խունդկարյանի ընտրությանը բացասական է վերաբերվում:

«Առաջին հերթին, վճռաբեկ դատարանի նախագահն այսօր պետք է էտալոն լինի մյուս դատավորների համար, թե ինչպիսին պիտի լինի դատավորն, ի վերջո, և ընտրությունը կանգնել է մի մարդու վրա, ով մեկ տասնամյակ է արդեն` Վճռաբեկ դատարանում է, ղեկավարում է քաղաքացիական պալատը, և եթե լավ ղեկավարած լիներ, իհարկե, Հայաստանի Հանրապետությունն այն ցնցումային վիճակում չէր հայտնվի, որում հայտնվեց: Բացի այդ, նա ունի Արման Մկրտումյանի աջ ձեռքը լինելու համբավ: Այս տրամաբանությամբ մոտենալով` հարց է ծագում` ի՞նչ տարբերություն, ի՞նչն է փոխվել: Իրականում ոչինչ չի փոխվել, ամեն ինչ ընթանում է այնպես, ինչպես ընթանում էր տասնամյակներ շարունակ»,- ասաց նա:

Վարոսյանի կարծիքով` սա անթույլատրելի ընտրություն էր և ոչ մի լավ բանի չի հանգեցնի: Նա նշեց, որ բոլորը, հիմա արդեն նաև քաղաքական գործիչները, հստակ գնահատական են տալիս դատական համակարգի աշխատանքին, գրեթե բոլորը համակարծիք են, որ դատական համակարգը լուրջ, արմատական փոփոխությունների կարիք ունի, բայց խոսքերը գործ չեն դառնում, տեսնում են, որ իրավիճակը նույնն է, և ոչ մի տարբերություն չկա:

Հարցին` ի՞նչ ազդեցություն կարող է ունենալ այս ընտրությունը ՀՀ երկրորդ նախագահի նկատմամբ հարուցված քրգործով որոշում կայացնելու առումով, փաստաբանը դժվարացավ նշել, ասաց, որ ժամանակը ցույց կտա:

«Ինքը վճիռ չի կայացնելու, իհարկե, քրեական պալատն է վճիռ կայացնելու, բայց ես կարծում եմ, որ մեսիջի առումով ինքը լավ մեսիջ չէ ամբողջ դատական համակարգին և դատաիրավական ամբողջ համակարգում աշխատող անձանց»,- ասաց Վարոսյանը:

Խոնդկարյանի ` իբրև Վճռաբեկ դատարանի նախագահի աշխատանքից փաստաբանը լավատեսական սպասումներ չունի, նա նշեց, որ չի հավատում այն գաղափարին, թե տասնամյակներ շարունակ մի աշխատելաոճ որդեգրած անձինք կարող են փոխվել և սկսել այլ կերպ աշխատել:

«Ես այդ աստիճանի միամտություն չունեմ, որ նման բաների հավատամ»,- նշեց նա:

Նախկին դատավոր Պարգև Օհանյանը կարծում է, որ Վճռաբեկ դատարանի նախագահի պաշտոնում Երվանդ Խունդկարյանի ընտրությունը լավ փորձադաշտ, ապացույց կլինի` հասկանալու համար, թե որքանով էր ճիշտ այդ ընտրությունը:

«Ես կոնկրետ նրա անձի մասին բան ասել չեմ կարող, որովհետև չեմ առնչվել, ինքը եղել է քաղաքացիական գործերի պալատի նախագահը, ես` քրեական, այսինքն` գործնականում, չենք առնչվել, բայց տպավորությունս միշտ եղել է, որ պարկեշտ անձնավորություն է, համեստ, հիմա տեսնենք, կյանքը ցույց կտա: Ես, ճիշտն ասած, համոզված եմ, որ ԲԴԽ-ն արել է առավելագույնը, որովհետև ավելին անելու համար նախ կաշկանդված է եղել ընտրության հնարավորությամբ, ընտրել է հնարավոր լավագույնը»,- ասաց նա:

Անդրադառնալով մտահոգություններին, թե այս ընտրությամբ փաստորեն համակարգային փոփոխություն չի լինում, Օհանյանն ասաց, որ այդ մտահոգությունը` ոչ քիչ չափով, ինքն էլ է կիսում, թեև լավատեսությունը իրեն միշտ չի լքում:

«Ուզում եմ հավատալ, որ թեկուզ հին համակարգի իներցիայով որոշ չափով շարունակվի, բայց նաև հետևություններ կանեն ու կփոխվեն: Վերջին հաշվով, մարդիկ չեն ծնվում ո՛չ հանցագործ, ո՛չ կաշառակեր, ո՛չ էլ սուրբ, կյանքի ընթացքում դառնում են` իրենց վրա աշխատելով, իրենց «ես»-ը մերժելով և այլն: Ես կարծում եմ, որ առնվազն պետք է անմիտ, ինչու չէ` հիմար լինեն, որ հետևություններ չանեն, չփոխվեն ու չփոխեն արդարադատության որակը, չհրաժարվեն կոռուպցիոն դրսևորումներից»,- նշեց Օհանյանը:

Նախկին դատավորն ասաց` որքան լավատես է, այդքան էլ կասկածներ ունի` կապված այս դատարանի հետագա աշխատանքի անկախության հետ, նշեց` կասկածում է, որովհետև շատ խոչընդոտներ կան` և՛ սուբյեկտիվ, և՛ օբյեկտիվ: Նրա խոսքով` իզուր չէ, որ անընդհատ խոսում են անցումային արդարադատության մասին, որը շատերը մինչև վերջ չգիտեն` ինչ է ու ինչպես պիտի լինի, որովհետև դրա հստակ ձևակերպումն էլ չկա, և ամեն երկրում մի տեսակ է եղել: Օհանյանի խոսքով` փաստը մնում է փաստ, որ եթե մի բան անցումային է, ուրեմն թելադրված է բավական լուրջ օբյեկտիվ ու սուբյեկտիվ հիմքերով:

«Ասենք, թե անցումային կառավարություն ինչու է ստեղծվում. այն դեպքում, երբ գործող Կառավարությունը չի կարողանում իր առջև դրված խնդիրները լուծել, պիտի ստեղծվի անցումայինը, մինչև հետո ձևավորվի հիմնականը: Հիմա չգիտեմ` ինչպես են մեր քաղաքական ղեկավարները մտածում, պատկերացնում, ինչպես կիրագործեն, բայց անելիքներ կան, շատ կան»,- ասաց նա: