«ՍԱՍ»-ի Արտակի գործից մինչև «Զիբիլիքս»

ԿԸՀ նախագահ Տիգրան Մուկուչյանն այսօր ԱԺ պետաիրավական և ՄԻՊ հարցերի հանձնաժողովում ներկայացրեց ԿԸՀ-ի 2016-2017-ի գործունեության մասին հաղորդումը: Այն լսելուց հետո «Ելք» խմբակցության պատգմավոր Էդմոն Մարուքյանը բողոքեց՝ անդրադարձ չկա «ՍԱՍ»-ի դեպքին, դպրոցների տնօրենների դեպքին:

«Պրոբլեմների մասին, մեծ հաշվով, խոսակցություն չկա, այս դեպքերի վերաբերյալ դատապարտում, ապագայում դրանց կանխարգելմանը միտված գործողություններ ինչո՞ւ չկան»,- Մարուքյանը հարցով դիմեց Մուկուչյանին: Վերջինս էլ պարզաբանեց, որ կոնկրետ գործերով դիմումները քննարկվել են ԿԸՀ-ում և կայացվել որոշումներ:

«Թե՛ քննարկումներն են եղել հրապարակային, թե՛ բողոքարկման գործընթացը. որևէ միտում դա ցույց չտալու, թաքցնելու չկա: Ինչ վերաբերում է այդ դիմումների վերաբերյալ հանձնաժողովի իրավական մոտեցումներին, մենք մեր որոշումներում դրանց անդրադարձել ենք»,- նշեց Մուկուչյանը: 

Մարուքյանն իր հերթին Մուկուչյանին հիշեցրեց «Զիբիլիքսի» հայտնի գործը, պնդելով, որ առաջին անգամն է, որ ընդդիմությանը հաջողվել է ընտրական գործընթացում այդպիսի անհերքելի ապացույցներ ձեռք բերել:

«Անհերքելի այնպիսի ապացույցներ ենք ձեռք բերել, որոնցում ապացուցվում է՝ ով ա փող բաժանողը, ինչ տեքստ պետք ա ասի դուռը թակելուց հետո, շտաբի անուն ազգանունը, թե որ շտաբներից են բաժանվել, ՊՊԾ գնդից ուղարկված ֆաքս Տարոն Մարգարյանի շտաբ: Դրանց մասին հաղորդում ենք ներկայացրել, թերի, ձևական բնույթ կրող որոշում կայացվեց, մերժվեց, որը բողոքարկում ենք դատարանում: Կարծում եմ՝ ԿԸՀ-ն պետք է սրա վերաբերյալ որոշակի դիրքորոշում ունենար, արտահայտեր, գոնե ասեիք՝ մենք դատապարտում ենք նման դեպքերը»,- ընդգծեց իր խոսքում Մարուքյանը:

Մուկուչյանը, սակայն, չհամաձայնեց, հակադարձելով.

«Դուք հիմա ներկայացնում եք փաստեր, որոնք եղել են բացահայտված, եկեք հանձնաժողովի գործառույթները նայենք, ժամկետների հետ կապված… Որևէ ստորագիր էջ, ինձնից լավ գիտեք, որ չկա, չէ որ հանձնաժողովը պետք է փաստեր ընդունի, անգամ այդ պայմաններում իրավապահ մարմիններին է որոշումն ուղարկվել: Ընտրական վեճի քննության կարճ ժամկետներով պայմանավորված, հրապարակային քննություն եղել է, կողմերին ծանուցում եղել է: Հանձնաժողովն ինքն է դրանք ուղարկել դատախազություն, չի անտեսել, չի դրել կողք»:

Արտակ Զեյնալյանն էլ իր հերթին հարցրեց, թե ընտրական ինստիտուտների նկատմամբ ժողովուրդը վստահություն ունի, թե չունի: Մուկուչյանն էլ թե՝ որևէ այլ երկրում նման հրապարակայնություն չկա, որ ընտրողների ցուցակ հրապարակեն, տվյալները տեղադրեն համացանցում, տեղամաս առ տեղամաս հրապարակեն արդյունքները ու դա տարածեն նաև համացանցով: Ու քանի որ Զեյնալյանն էլ իր հերթին անդրադարձավ «Զիբիլիքսի» հարցին, գործին խառնվեց հանձնաժողովի նախագահ Գևորգ Կոստանյանը: Վերջինս հիշեցրեց Զեյնալյանին, որ որպես իրավաբան, նա քաջ գիտի, որ այդ հարցերին ոչ թե Մուկուչյանը, այլ Գլխավոր դատախազը պետք է պատասխանի:

Քննակրումների վերջում կողմերը համաձայնության եկան, ընտրությունների ու ընտրական գործընթացների մասով կկազմակերպվեն խորհրդարանական լսումներ, ու այդ խնդիրները մանրակրկիտ կքննարկվեն: