Քննարկվել են երկրորդ ընթերցման ներկայացված մի շարք նախագծեր

Ազգային ժողովը դեկտեմբերի 4-ի նիստում երկրորդ ընթերցմամբ քննարկել է մի շարք նախագծեր:

«ՀՀ քաղաքացիական դատավարության օրենսգրքում փոփոխություններ եւ լրացումներ կատարելու մասին» եւ կից օրինագծերի փաթեթը ներկայացրել է ՀՀ արդարադատության նախարարի տեղակալ Տիգրան Դադունցը:

Զեկուցողի խոսքով նախագծերի ընդունման արդյունքում լուծում կտրվի քաղաքացիական եւ վարչական դատավարություններում գործնականում առաջացող մի շարք խնդիրների` մի կողմից նվազեցնելով դատավարական գործընթացներում իրավունքների չարաշահման դեպքերը, մյուս կողմից` ապահովելով ողջամիտ ժամկետներում գործերի քննությունը:

Բարձրաձայնելով առաջին ընթերցումից հետո փաթեթում կատարված փոփոխությունները` փոխնախարարը նշել է. «Մասնավորապես, որպես իրավաբանական օգնություն ստանալու իրավունքի ապահովման երաշխիք` առաջարկվում է սահմանել, որ փաստաբանի նկատմամբ մեկ դատական գործի շրջանակում դատական ատյանում դատական տուգանք կարող է կիրառվել, եթե նրա նկատմամբ երկու այլ սանկցիա նախկինում կիրառվել է: Ընդ որում, մեկ գործի շրջանակում յուրաքանչյուր դատական ատյանում փաստաբանի նկատմամբ դատական տուգանքը կարող է կիրառվել ոչ ավելի, քան մեկ անգամ»:

Առաջարկվել է նաեւ փաթեթը լրացնել նոր նախագծով, որով լուծում կտրվի նաեւ մինչեւ 2025 թվականի հունվարի 1-ը ներկայացված հանրային կամ այլընտրանքային ծառայության եւ նոտարի գործողությունների իրավաչափությունը վիճարկելու հետ կապված վեճերով իրավասու դատարանին առնչվող հարցերին:

Հանրային խորհրդի կազմում փաստահավաք գործունեություն իրականացնող հանձնաժողով ձեւավորելու նպատակով Կառավարությունը լրացումներ եւ փոփոխություն է կատարում «Հանրային խորհրդի մասին» օրենքում:

Ըստ ՀՀ արդարադատության նախարարի տեղակալ Տիգրան Դադունցի` առաջինից երկրորդ ընթերցում նախաձեռնությունը լրամշակվել է: Մասնավորապես, հստակեցվել է փաստահավաք հանձնաժողովի անդամի լիազորությունների վաղաժամկետ դադարման կամ դադարեցման դեպքում նոր անդամի ընտրության գործընթացը կազմակերպելու ժամկետը: Առաջարկվել է սահմանել, որ նման իրավիճակում փաստահավաք հանձնաժողովի նախագահը հնգօրյա ժամկետում պետք է դիմի Հանրային խորհրդի նախագահին` օրենքով սահմանած կարգով հանձնաժողովի նոր անդամի ընտրությունը կազմակերպելու համար:

Նշվել է, որ իրականացվել են նաեւ խմբագրական փոփոխություններ:

ՀՀ ԱԺ պատգամավորներ Սիսակ Գաբրիելյանի, Արսեն Թորոսյանի, Ալեն Սիմոնյանի, Արուսյակ Ջուլհակյանի հեղինակած «Ազգային ժողովի կանոնակարգ» սահմանադրական օրենքում եւ կից օրենքներում լրացումներ նախատեսող օրենսդրական փաթեթով առաջարկվում է մի շարք մարմինների համար եւս ամրագրել տարեկան մեկ անգամ Ազգային ժողովին հաշվետվություն ներկայացնելու պահանջ:

Նախաձեռնության համահեղինակ, պատգամավոր Սիսակ Գաբրիելյանի խոսքով առաջինից երկրորդ ընթերցում ընկած ժամանակահատվածում փաթեթում փոփոխություններ չեն իրականացվել:

ՀՀ պետական եկամուտների կոմիտեի նախագահի տեղակալ Արթուր Մանուկյանի ներկայացմամբ քննարկվել է «Հայաստանի Հանրապետության հարկային օրենսգրքում լրացումներ եւ փոփոխություններ կատարելու մասին» օրինագիծը: Առաջարկվում է կարգավորել ՀՀ ներմուծվող նավթամթերքի, քսայուղերի, բենզինի, դիզելային վառելիքի եւ հավելանյութերի ակցիզային հարկով հարկման հարաբերությունները:

Զեկուցողի տեղեկացմամբ առաջին ընթերցումից հետո գրավոր առաջարկներ չեն ներկայացվել, Կառավարությունը կատարել է տեխնիկական փոփոխություններ:

Պատգամավորները քվեարկություններով ընդունել են հերթական նիստերում քննարկված օրենսդրական նախաձեռնությունները:

Խորհրդարանը նաեւ հաստատել է «Հայաստանի Հանրապետության 2025 թվականի պետական բյուջեի մասին» ՀՀ օրենքի լրամշակված նախագիծը: