«Կրթության առաքելությունը երկրի մրցունակության ապահովումն է անհատական և հանրային մակարդակներում». Ժաննա Անդրեասյան

ՀՀ կրթության, գիտության, մշակույթի և սպորտի նախարար Ժաննա Անդրեասյանը մասնակցել է «Պետության և հասարակության ակնկալիքները համալսարանից այսօր և վաղը» խորագրով պանելային քննարկմանը, որն անցկացվել է Երևանի պետական համալսարանի շրջանավարտների ֆորումի շրջանակում:

ԿԳՄՍ նախարար Ժաննա Անդրեասյանն իրազեկել է, որ Կառավարության այսօրվա նիստում հաստատվել և Ազգային ժողով է ուղարկվել «Բարձրագույն կրթության և գիտության մասին» օրենքի նախագիծը, որում հստակ ձևակերպված է բարձրագույն կրթության և գիտության ակնկալիքը:

«Անկախ ժամանակաշրջանից՝ բարձրագույն կրթությունից և գիտությունից հանրային ակնկալիքը մեկն է՝ լինել այն օղակը, որի միջոցով պետության և հանրության զարգացումը կդառնա հնարավոր: Բարձրագույն կրթության և գիտության առաքելությունը երկրի մրցունակության ապահովումն է՝ անհատական և հանրային մակարդակներում»,- ասել է ԿԳՄՍ նախարար Ժաննա Անդրեասյանը:

Ըստ նախարարի՝ բարձրագույն կրթության և գիտության ոլորտը հնարավորություն է տալիս յուրաքանչյուր անհատի բացահայտել իր կարողություններն ու զարգացնել դրանք հետագա կյանքում՝ նպաստելով անհատի ինքնիրացմանը:

«Անհատը սոցիալական էակ է, և նրա շահերն ու նպատակները, արժեքները, դիրքորոշումները համադրվում են հանրային վարքականոնի մեջ: Եվ եթե մենք ունենք հանրօգուտ կրթություն ու գիտություն, դրանք պետք է միաժամանակ շահավետ լինեն թե՛ անհատի, թե՛ հանրության համար»,- նշել է Ժաննա Անդրեասյանը:

Նախարարի ձևակերպմամբ՝ համակարգը, որտեղ անհատը մրցունակ է և կարողանում է իրեն գնահատված ու երջանիկ զգալ, չի հակասում լավ պետություն և զարգացած հանրություն ունենալու նպատակին:

«Հնարավոր չէ ունենալ լավ պետություն, որտեղ մարդիկ տառապում են: Եթե մենք մեզ լավ չենք զգում և մեր կյանքը մեր երկրում՝ որպես ինքնիրացված անձինք, չենք պատկերացնում, ուրեմն երկրի օրակարգը ճիշտ կազմված չէ»,- ասել է նա:

Ժաննա Անդրեասյանի խոսքով՝ կրթությունը հանրային բարիք է, ու թեև աղքատության վերացումը կրթական համակարգի ուղիղ նպատակը չէ, սակայն դրա ճիշտ գործառնության դեպքում կարող է լինել որպես արդյունք:

Պանելային քննարկման ընթացքում ԿԳՄՍ նախարար Ժաննա Անդրեասյանն անդրադարձել է նաև տեղեկատվական տեխնոլոգիաների դարաշրջանում ֆորմալ և ոչ ֆորմալ կրթական ձևերի համադրելիությանը:

Ըստ նրա՝ մեզ հասանելի տեղեկատվական աղբյուրների բազմազանությունը ենթադրում է դրանցից օգտվելու հմտությունների ամբողջություն: Միկրոորակավորումները, ոչ ֆորմալ կրթության ճանաչման գործիքակազմերը կոչված են մեղմելու ֆորմալ և ոչ ֆորմալ կրթության անջրպետը և ոչ ֆորմալ կրթությունը ինտեգրելու ֆորմալ կրթական համակարգին՝ առանց դրանք հակադրելու պարտադրանքի:

«Անջրպետը խախտում է կրթական երկու ձևերի արդյունավետ երկխոսության հնարավորությունը: Անհրաժեշտ են ճիշտ հմտություններ, որոնք պետք է ձևավորվեն գիտելիքի արդյունքում, այսինքն՝ կարևոր է, որ անհրաժեշտ հմտությունների ձևավորումն անցնի գիտելիքի յուրացման գործընթացով: Դասախոսական աշխատանքը պետք է ընթանա տեխնոլոգիական առաջընթացի, ուսանողների ժամանակակից պահանջմունքներին համահունչ՝ զատելով դասախոսության իրական էությունը դպրոցական դասավանդման ձևաչափից»,- ասել է նախարարը:

Պանելային քննարկմանը որպես բանախոսներ հանդես են եկել նաև ՀՀ բարձր տեխնոլոգիական արդյունաբերության նախարար Մխիթար Հայրապետյանը և ՀՀ գլխավոր դատախազ Աննա Վարդապետյանը։

Քննարկման ընթացքում բանախոսները պատասխանել են նաև ներկաների հարցերին: