Պաշտոնատար անձինք ԱԺ քննիչ հանձնաժողովից հրավեր ստանալու դեպքում պարտավոր են ներկայանալ. Կոստանյան

«Գաղտնալսումների հարցով» ԱԺ քննիչ հանձնաժողովի երկրորդ` սեպտեմբերի 26-ի նիստում քննարկման էին դրված հանձնաժողովի աշխատանքի կարևոր մի շարք կետեր: Հանձնաժողովի նախագահ Գևորգ Կոստանյանը նշեց, որ մի բան հստակ է` նիստում պետք է քննարկեն այն անձանց շրջանակը, որոնց պետք է կանչեն, նաև այն փաստաթղթերը, որ պետք է պահանջեն և ուսումնասիրեն, ինչի արդյունքում էլ կկարողանան հստակեցնել գործողությունների հաջորդականությունը և տրամաբանությունը:

Նիստի ընթացքում առաջարկ հնչեց, որ շատ հարցեր նախապես` աշխատանքային կարգով քննարկվեն, ապա անցնեն առաջ: Առաջարկն արժանացավ Կոստանյանի հավանությանը: Նա տեղեկացրեց, որ իրենք միայն ԱԱԾ տնօրենի և ՀՔԾ պետի` հայտնի ձայնագրության մեջ նշված անձանց հրավիրելով չեն սահմանափակվում, այլ հրավիրելու են պաշտոնատար և ոչ պաշտոնատար անձանց, տարբերությունն այն է, որ պաշտոնատար անձինք պարտավոր են ներկայանալ, իսկ ոչ պաշտոնատար անձինք` ոչ:

ՀՅԴ խմբակցության անդամ Սպարտակ Սեյրանյանը առաջարկեց նախ ուսումնասիրել, ճշտումներ անել` ինչպես է եղել գաղտնալսումը, բացի դրանից՝ ճշտել` որքանով է գաղտնալսումից երաշխավորված այս հանձնաժողովի աշխատանքը, հետո նոր անցնել առաջ:

«Ելք» դաշինքի ներկայացուցիչ Հովիկ Աղազարյանը տեսակետ հայտնեց, որ եթե ԱԱԾ տնօրեն Արթուր Վանեցյանին հրավիրելը տրամաբանական է, բխում է հանձնաժողովի նպատակից, ապա ՀՔԾ պետ Սասուն Խաչատրյանին հրավիրելը հասկանալի չէ: Նա նշեց` «արդարադատության իրականացմանը խոչընդոտելու» ձևակերպումով թվում է` իրենք գնահատական են տալիս:

«Գուցե հանձնաժողովը մանրամասն նորից լսի ձայնագրությունը, գնահատական տանք, թե` արդյո՞ք այդտեղ կա այդ փաստը, որ արդար դատաքննությունը խոչընդոտվել է, հետո նոր հրավիրենք Խաչատրյանին»,- ասաց նա:

ՀՀԿ խմբակցության անդամ Կորյուն Նահապետյանն առաջարկեց, որ նախատեսվի դրույթ, թե հանձնաժողովը ձայների ինչ հարաբերակցությամբ պետք է որոշում ընդունի անձին հրավիրել-չհրավիրելու վերաբերյալ: Նա ասաց, որ հանձնաժողովի յուրաքանչյուր անդամ կարող է ներկայացնել առաջարկներ, թե ում հրավիրել, ում՝ ոչ:

«Այս հանձնաժողովը ստեղծված է քննելու նպատակով, քանի քննություն չենք կատարել, ինչպե՞ս կարող ենք գնահատական տալ: Արդյունավետ, լիարժեք քննություն պետք է կատարենք, կան բավարար գործիքները: Ես հանձնաժողովի բոլոր անդամներին կառաջարկեի ձեռնպահ մնալ գնահատականներ տալուց»,- նշեց պատգամավորը:

ՀՀԿ խմբակցության մեկ այլ ներկայացուցիչ` Արփինե Հովհաննիսյանն արձագանքեց, որ իրենք գնահատական չեն հնչեցնում` արդարադատության իրականացմանը խոչընդոտվե՞լ է, ո՞վ է խոչընդոտել, ընդհանրապես նման փաստ տեղի՞ է ունեցել, թե՞ ոչ:

«Կքննենք, որոշում կկայացնենք, թե ինչպիսի պաշտպանվածության մակարդակ կա, նախաքննության նկատմամբ վերահսկողությունը պատշա՞ճ է, թե՞ ոչ և այլն: Յուրաքանչյուրը լսել է ձայնագրությունը, իր մեջ ունի եզրակացություններ, բայց այս հանձնաժողովը փաստերը քննարկելու համար է»,- նշեց նա: