Հիշեք Լևոն Տեր-Պետրոսյանի ընտրությունները, հետ գնացեք 1995-1996 թվականներ. Ալիկ Սարգսյան

ՀՀ նախկին ոստիկանապետ, ՀՀԿ խմբակցության անդամ Ալիկ Սարգսյանը կարծում է, որ Facebook-ում ՀՀԿ-ի դեմ գրող ֆեյք էջերը վարձատրվում են:

«Այսքան խաժամուժ մեր երկրում չի կարող լինել: Ես երբևէ նախկին իշխանություններին գովաբանելու, պաշտպանելու առիթ չեմ ունեցել, ամեն անգամ պատեհ-անպատեհ, տեղին-անտեղի, երբ դիմել եք, ասել եմ` նախկին իշխանության սխալները, չարաշահումները շատ են եղել, ամեն ինչ եղել է, որի պտուղները տեսնում ենք: Նենց չի, որ սերն ու չգիտեմ ինչն է նոր իշխանությունների նկատմամբ, սա նախկին իշխանությունների նկատմամբ ատելությունն է, որ դուրս է տալիս էս եղանակով: Ես ամեն ինչ հասկանում եմ, ցավում եմ, որ թացն ու չորը խառնվել է իրար, «ՀՀԿ» բառն են լսում, միանգամից հարձակվում են, կապ չունի` ով է, ինչ է ներկայացնում, ոնց է ապրել»,- նշեց նա:

Սարգսյանի կարծիքով` ՀՀԿ-ի դեմ գրող ֆեյք էջերը վարձատրվող մարդիկ են, որոնք առաջին իսկ հրամանի դեպքում, ՀՀԿ-ի անունը կարդալով, հարձակվում են, ու չեն մտածում, որ հասարակությունը կարդում է, կարդում են նաև այդ մարդկանց հարազատները:

Նախկին ոստիկանապետը նշեց, որ հասարակության վերաբերմունքը նոր իշխանություններին կարող է գնահատել Երևանի ավագանու ընտրությունների արդյունքներով, նրանով, որ հաղթող ուժը 80 տոկոս ձայն հավաքեց: Դա, Սարգսյանի խոսքերով, գնահատված է, պատճառաբանված, ինքը դա համարում է ժողովրդի վերաբերմունքն այս հեղափոխությունից ու ամեն ինչից հետո:

«Դա հասկանալի է, բայց այս մթնոլորտը, որ հայհոյանք պիտի լինի միայն այն բանի համար, որ ես ՀՀԿ-ական եմ, բարոյական չէ և սխալ է, թող ոչ ոք չուրախանա»,- ասաց նա:

Լրագրողների հարցին` իրեն ճնշել են այդ մեկնաբանությունները, Սարգսյանը պատասխանեց, որ իրեն ընդհանրապես ճնշել հնարավոր չէ, սակայն ինքը զայրացել է դիմացինի անհաջողությամբ ուրախացողների վրա:

«Թող ոչ ոք չողջունի այս ամենը: Հետ գնացեք 1991 թ., հիշեք Լևոն Տեր-Պետրոսյանի ընտրությունները, հետ գնացեք 1994 թ., 1995 թ., 1996 թ, այս ամենն ինչ-որ տեղ սպասելի է, պետք չէ ոգևորվել, մարդկանց անձնական վիրավորանք հասցնել: Ես դիմում եմ բոլորին` մասնավորապես նոր իշխանություններին` բացահայտե’ք բոլոր կոռուպցիոն դրսևորումները: Էս 10 տարի, 20 տարի սպասում եմ, ինքս սպասողներից մեկն եմ, սպասում եմ` բացահայտումներ լինեն, նոր այդ մասին խոսեմ, շնորհակալություն հայտնեմ»,- նշեց Սարգսյանը:

ՀՀԿ խմբակցության անդամը նշեց, որ ՀՀԿ-ն վերջին տարիներին իր կուրսից շեղվել է, նաև ընդգծեց` ՀՀԿ-ում լինելով` որևէ մեկին վնաս չի տալիս, իսկ իր մասին գրում են` միացել է ինչ-որ մարդկանց, ինչ-որ հանդիպումներ է ունեցել, գրում են «անհեթեթություններ, որոնք իրականության հետ կապ չունեն»: