Եթե նկարագրել եք մի բան, մտքում ունեցել մեկ այլ բան, հավանաբար, դա չեք կարողանալու ձեռք բերել. Ջանջուղազյանը` Հովհաննիսյանին

ՀՀ կառավարությունը սեպտեմբերի 27-ի նիստում միաձայն հաստատեց «Հայաստանի Հանրապետության 2018 թվականի պետական բյուջեում վերաբաշխում և Հայաստանի Հանրապետության կառավարության 2017 թվականի դեկտեմբերի 28-ի N 1717-Ն որոշման մեջ փոփոխություններ և լրացումներ կատարելու մասին» նախագիծը, սակայն՝ վերապահումով: Նախագիծը ներկայացնող Արդարադատության նախարարությանը և ֆինանսների նախարարությանը մեկ օր ժամանակ տրվեց` որոշ մտահոգիչ հարցերի շուրջ ընդհանուր հայտարարի գալու համար:

ՀՀ արդարադատության նախարարի տեղակալ Արթուր Հովհաննիսյանը հայտնեց, որ նախագծով նախատեսում են բյուջեի վերաբաշխում, 32 մլն 146 հազար դրամի տրամադրում` քրեակատարողական համակարգում որոշակի գնումներ կատարելու համար: Հովհաննիսյանն ասաց, որ նախատեսվում է այդ գումարից 18 մլն դրամ հատկացնել համակարգչային տեխնիկայի ձեռքբերմանը, գնելու են 40 համակարգիչ, 20 տպիչ UPS համակարգեր:

«Մոտ 10 տարի է` քրեակատարողական համակարգում օգտագործվում են հին համակարգիչներ` Pentium 3, Pentium 4, որոնք դանդաղագործ են, որոնց նույնիսկ պահեստամասերը արդեն շահագործումից դուրս են եկել, համակարգչային ծրագիրը արդեն չի համալրվում և չի սպասարկվում, ինչը բարդացնում է համակարգում աշխատանքները, հետևաբար առաջարկում ենք նոր համակարգիչներ ձեռք բերել»,- ասաց նա:

Բացի այդ, փոխնախարարը հայտնեց, որ որոշ ՔԿՀ-ներում`«Դատապարտյալների հիվանդանոց», «Աբովյան», «Հրազդան», «Կոշ», շատ վատ վիճակում են ջրահեռացման և ջրամատակարարման համակարգերը և անհրաժեշտ է վերակառուցման աշխատանքներ կատարել: Հովհաննիսյանն ասաց, որ իրենք նախատեսում են 14 մլն 146 հազար դրամ նախատեսել շինարարական աշխատանքների նախագծանախահաշվարկային փաստաթղթերի կազմման համար, իսկ հետագայում` մյուս տարվա բյուջեով, փորձել միջոցներ հայթհայթել բուն շինարարական աշխատանքները կատարելու համար: Փոխնախարարը նշեց, որ անհրաժեշտ է «Դատապարտյալների հիվանդանոց» ՔԿՀ-ում 400 մետր, «Աբովյան» ՔԿՀ-ում 850 մետր խողովակներ փոխել:

Նիստը վարող, ՀՀ առաջին փոխվարչապետ Արարատ Միրզոյանը նշեց, որ կարևոր նախագիծ է:

«Գաղտնիք չէ, որ ՔԿՀ-ներում սանիտարահիգիենիկ, կենցաղային առումով կատաստրոֆիկ իրավիճակ է, պետք է քայլ-քայլ գնալ այդ ամենը կարգավորելու ուղղությամբ, հատկապես ջրահեռացման համակարգերից սկսելով: Խոսքը կարող է միայն հարցի ֆինանսական և տեխնիկական կողմի հետ կապ ունենալ»,- ասաց նա:

ՀՀ ֆինանսների նախարար Ատոմ Ջանջուղազյանը արձագանքեց` նշելով, որ իր առաջարկը նախագծի բովանդակությանը և նպատակներին չի վերաբերում, կարող է գնահատվել որպես տեխնիկական առաջարկ, նա ներկայացրեց իր մտահոգություններն այս նախագծի վերաբերյալ:

«Գնման առարկաներ կան, նույն համակարգիչները, որոնք մեր գործընկեր այլ պետական մարմիններում, մասնավորապես ոստիկանությունում` նույն տեսակի համակարգիչը և տպիչը այլ նախահաշվային գին են ունեցել: Բացի դրանից, որ նախահաշվային գինը զգալիորեն ավելի ցածր է եղել` 290 հազարի փոխարեն 234 հազար, պայմանագիրն էլ կնքվել է 225 000 դրամով` համակարգչի դեպքում, իսկ տպիչը 75 հազար դրամ է եղել: Ըստ էության` նույն տեխնիկական բնութագրերով նկարագրված տպիչը պայմանագրով այդքան էլ եղել է: Մեր առաջարկն է եղել վերանայել այս նախագիծը` համանման գնման առարկաների մոտավորապես միասնական նախահաշվային գներին դուրս գալու տրամաբանությամբ»,- ասաց նա:

Երկրորդ խնդիրն, ըստ Ջանջուղազյանի, վերաբերում է հետևյալ հարցին. ինչո՞ւ է կոնկրետ այդքան գումար նախատեսվում` 14 միլիոն 146 հազար 600 դրամ, որովհետև դրա համար կան քաղաքաշինական կանոններ, որոնցով գնահատվում է` որքան կկազմի նախագծանախահաշվարկային փաստաթղթերի ձեռքբերման արժեքը այս կամ այն գնման առարկայի համար:

«Մեր մտահոգությունները կապված են միայն կանոնները պահպանելու հետ»,- ասաց նա:

Արթուր Հովհաննիսյանը նշեց, որ իրենք նախարարական կոմիտեում են խոսել այդ հարցի շուրջ, ունեցել կոնկրետ եզրահանգում:

«Հարցը լուծվեց, համաձայնություն ձեռք բերվեց, որ մնան այդ գները: ԿԳՆ-ն ևս ներկայացնում էր գնում, այնտեղ 10 հազար դրամի տարբերություն էր, ոչ թե` քսանքանի: Այս տպիչներն ավելի թարմ են, որոնց սպասարկումը հետագայում ավելի էժան է լինելու, ավտոմատ տպում են ոչ թե մեկ, այլ երկու էջ, այսինքն` թղթի տնտեսում էլ ենք ունենալու: Գինը որոշվել է կառավարության համապատասխան որոշման հիման վրա, հիմնավորումներն ուղարկել ենք: 79 հազար տպիչ` այն ֆունկցիոնալ հզորությամբ, որ մենք ենք նշել, չկա»,- ասաց նա:

Ջանջուղազյանը հակադարձեց.

«Լազերային տպիչներ` 33 էջ/րոպե արագությամբ. այն, ինչ գրված է գնման առարկայի բնութագրերում` Ձեր և ոստիկանության դեպքում: Ոստիկանության դեպքում 74 889 դրամով, այս դեպքում` 280 000 դրամ: Եթե դեմ չեք, ես առաջարկում եմ մեկ օրվա ընթացքում համալրել առաջարկը: Եթե Դուք նկարագրել եք մի բան, բայց Ձեր մտքին ունեցել եք մեկ այլ բան, հավանաբար, դա չեք կարողանալու ձեռք բերել. առաջնորդվելու են նկարագրությամբ, և դրա տակ Դուք կարող է 280 հազար դրամին համարժեք որակ ակնկալել, բայց Ձեզ մատուցվի 75 հազար դրամանոց»:

Արդարադատության փոխնախարարը համաձայնեց քննարկել այս հարցը, և համակարգչային տեխնիկա ձեռք բերել իրենց նախատեսած պարամետրերին համարժեք ամենացածր գնով: