Արմեն Փամբուխչյանը մեկնել է Թուրքիա՝ մասնակցելու ՏՐԱՍԵԿԱ-ի նիստին

ՀՀ տրանսպորտի, կապի և տեղեկատվական տեխնոլոգիաների նախարարի տեղակալ Արմեն Փամբուխչյանը մեկնել էր Թուրքիա՝ մասնակցելու Եվրոպա-Կովկաս-Ասիա Միջազգային տրանսպորտային միջանցքի միջկառավարական հանձնաժողովի մշտական քարտուղարության նիստին, տեղեկացնում են նախարարության հասարակայնության հետ կապերի և լրատվության վարչությունից:

ՏՐԱՍԵԿԱ-ն միջազգային տրանսպորտային ծրագիր է, որն ընդգրկում է Եվրոպական միությունը և Արևելյան Եվրոպայի, Կովկասի ու Կենտրոնական Ասիայի տարածաշրջանների 13 անդամ-պետություններ: Ծրագրի նպատակն է ամրապնդել տնտեսական և տրանսպորտային կապերը Սևծովյան ավազանի, Կովկասի և Կենտրոնական Ասիայի տարածաշրջաններում: Հայաստանի Հանրապետությունը ՏՐԱՍԵԿԱ ծրագրին անդամակցում է 1993-ից:

ՏՐԱՍԵԿԱ նիստի օրակարգում ընդգրկված էին մի շարք ՄՔ գործունեության և անդամ-պետությունների հետ ու դրանց միջև համագործակցության առնչվող հարցեր:

Հանդիպման սկզբում իրենց ելույթներով ներկաներին ողջունեցին ՏՐԱՍԵԿԱ ՄԿՀ ՄՔ գլխավոր քարտուղար Միրչեա Չոպրագան, ինչպես նաև ՏՐԱՍԵԿԱ ՄԿՀ նախագահող երկիր հանդիսացող Հայաստանի Ազգային հանձնաժողովի նախագահի անունից խոսել է ՀՀ տրանսպորտի, կապի և տեղեկատվական տեխնոլոգիաների նախարարի տեղակալ Արմեն Փամբուխչյանը:

Արմեն Փամբուխչյանը հայտնել է իր վստահությունը հանդիպման արդյունավետության վերաբերյալ, ինչպես նաև ՏՐԱՍԵԿԱ-ի շրջանակներում սահուն և զարգացող համագործակցությունն ապահովելու նպատակով բոլոր հնարավոր ջանքերը գործադրելու իր պատրաստակամությունը՝ որպես ազգային քարտուղար ու տրանսպորտի, կապի և տեղեկատվական տեխնոլոգիաների նախարարության ներկայացուցիչ:

Ներկայացվել է ՏՐԱՍԵԿԱ հիմնական իրավական փաստաթղթերին անդամ-պետությունների կողմից միանալու և դրանց իրականացման առաջընթացը: Երկրների մեծամասնությունը՝ ներառյալ Հայաստանը, արդեն ստորագրել են փաստաթղթերի մեծ մասը, սակայն դրանցից որոշները դեռ վավերացված չեն, ուստի և չեն համարվում ուժի մեջ: Առաջարկվեց հնարավորինս արագ ապահովել բոլոր ներքին ընթացակարգերը փաստաթղթերի վավերացման համար:

Հանդիպման օրակարգում ավելացվեց 2018 և 2019 թվականների համար ՏՐԱՍԵԿԱ ՄԿՀ ՄՔ բյուջեի նախագծերի քննարկումը:

Առաջարկվել է ՏՐԱՍԵԿԱ ներդրումային ֆորումում ներկայացվելիք բոլոր նախագծերում շեշտը դնել դրանց նշանակության վրա տարածաշրջանային մակարդակով տրանսպորտի և տնտեսության զարգացման համար:

Քննարկումների արդյունքում որոշվել է ՏՐԱՍԵԿԱ ամենամյա հանդիպումներից յուրաքանչյուրի ընթացքում որոշակի ժամանակ հատկացնել տրանսպորտային, նավահանգստային և մաքսային մարմինների ներկայացուցիչներին՝ ոլորտում առկա խնդիրների վերաբերյալ առավել լավ պատկերացում կազմելու և դրանց համար լավագույն լուծումներ գտնելու նպատակով: