Ուր կարող են հասնել Հյուսիսային Կորեայի հրթիռները

Հայաստանը բավական հեռու է Հյուսիսային Կորեայից, նույնիսկ չի սպառնում նրա անվտանգությանը, բայց տեսականորեն կարո՞ղ են հյուսիսկորական հրթիռները հասնել Հայաստանին:

1. Հյուսիսային Կորեան ունի կարճ հեռահարության բազմաթիվ բալիստիկ հրթիռներ: Ներկա ղեկավար Կիմ Չեն Ինի օրոք դրանք փորձարկվել են մոտ 50 անգամ: Արձակումների արդյունքում պարզ է դարձել, որ դրանք մարտունակ են և կարող են խոցել իրենց թիրախները: Այս դասի ամենահեռահար հրթիռը կարող է թռչել մինչև 1000 կմ: Այս պարագայում դրա թիրախում կարող են հայտնվել Հյուսիսային Կորեայի հակառակորդները՝ Հարավային Կորեան (ամբողջ տարածքը) և Ճապոնիան (մի մասը, այդ թվում՝ երկրորդ խոշորագույն քաղաքը՝ Օսական):

2. Հյուսիսային Կորեայի միջին հեռահարության հրթիռներն ունեն մինչև 2000 կիլոմետր թռիչքի հեռավորություն: Սրանք նույնպես հուսալի են, քանի որ ներկա առաջնորդի օրոք կատարված 9 արձակումներից 7-ը հասել են իրենց թիրախներին: Այս հեռահարության հրթիռը կարող է հասնել Ճապոնիայի ցանկացած կետ, այդ թվում և մայրաքաղաք Տոկիո:

3. «Միջանկյալ» հեռահարությամբ հյուսիսկորեական հրթիռները կարող են թիրախները խոցել մինչև 4500 կմ հեռավորության վրա: Այս շառավղով տարածքի մեջ մտնում է ամբողջ Արևելյան Ասիան: Կիմ Չեն Ինի օրոք այս դասի հրթիռների 14 փորձարկումներից միայն 3-ն է հաջող եղել: Բայց այդ երեքից երկուսը եղել են ամենաթարմ 3 փորձարկումների ընթացքում: Այս դասին են պատկանում նաև հայտնի Hwasong-12 հրթիռները: Հայաստանն այս հրթիռների հեռահարության գոտուց դուրս է:

4. Հյուսիսային Կորեան փորձարկել է նաև Hwasong-14 տիպի միջմայրցամաքային հրթիռներ: Այս հրթիռներից առաջինի փորձարկումը արձանագրել է 8500 կմ հեռահարություն, բայց մասնագետները կարծում են, որ այն մինչև 10.000 կմ հեռավորությամբ թիրախներ կարող է խոցել: Հայաստանը, ինչպես և ամբողջ Ասիան ու Արևելյան Եվրոպան ընկնում են այս հրթիռի խոցման շառավղում: Սրա խոցման տիրույթում են նաև ԱՄՆ տարածքի գրեթե կեսը, Երկրագնդի պտտվելու արդյունքում սրա խոցման տիրույթում են հայտնվում նաև Նյու Յորքն ու Վաշինգտոնը:

5. Հյուսիսային Կորեան ունի նաև տիեզերական հրթիռներ, որոնք նախատեսված են արհեստական արբանյակների համար: Ստուգված չէ, թե արդյոք կարող են այս հրթիռները ծանր մարտագլխիկներ կրել: Բայց դրանց հեռահարությունը գնահատվում է մինչև 15 հազար կմ: Սրանց խոցման տիրույթից դուրս են ընկնում միայն Արգենտինան, Բրազիլիայի և Հարավային Ամերիկայի պետությունների որոշ հատվածներ:

Եթե մտադիր եք տեղափոխվել անվտանգ տարածքներ, ապա միանգամից մեկնեք արգենտինական Մար դել Պլատա քաղաք. Այն աշխարհի ամենահեռվոր կետն է հյուսիսկորեական հրթիռների համար: