Ադրբեջանամետ գործիչների նկատմամբ ԵԽԽՎ սանկցիաներն աննախադեպ էին. Սամվել Ֆարմանյան

Տարիներ շարունակ ԵԽԽՎ-ում գործել է կոռուպցիոն մեխանիզմ, և տարբեր պատգամավորներ, օգտագործելով իրենց դիրքրը, ձեռնարկել են քայլեր, անցկացրել են բանաձևեր, որոնք պայմանավորված են եղել կոռուպցիոն կախվածությամբ։ Եվ ԵԽԽՎ անկախ հետաքննող հանձնաժողովի ուսումնասիրությունների և համակողմանի վերլուծության զեկույցում տեղ գտան բոլոր այդ մանրամասները։ Այս մասին ShantNews.am-ին հայտնեց ԵԽԽՎ հայկական պատվիրակության անդամ Սամվել Ֆարմանյանը՝ մեկնաբանելով կառույցի կողմից 4 պատգամավորների նկատմամբ կիրառած սանկցիան՝ 2-10 տարի ժամկետով ձայնի իրավունքից զրկելը։

Այսօր հրապարակվեց ԵԽԽՎ կանոնակարգային հանձնաժողովի որոշումը, որով ԵԽԽՎ 4 անդամների, այդ թվում՝ ադրբեջանական պատվիրակության ղեկավարի նկատմամբ կիրառվել են աննախադեպ սահմանափակումներ՝ հիմնավորմամբ, որ նրանք իրենց գործողություններով խախտել են ԵԽԽՎ անդամի վարքագծի նորմերը և ներգրավված են եղել այդ կոռուպցիոն գործողություններին։

«Եվ նույնիսկ կույրին տեսանելի է, որ խոսքը գնում է ադրբեջանամետ գործողություններ ձեռնարկելու հարցերում կոռուպցիոն համագործակցության մասին։ Սա կարևոր է Հայաստանի համար այն առումով, որ նախկինում ընդունված բանաձևը (Միլիցա Մարկովիչի կողմից նախաձեռնված բանաձևը, որ վերաբերում էր Սարսանգի ջրամբարին), ըստ էության իր քաղաքական նշանակությամբ դառնում է առ ոչինչ, որովհետև ակնհայտ փաստվում է, որ այդ ամենի թիկունքում եղել են կոռուպցիոն համագործակցության և շահերի անօրինական առաջմղման մեխանիզմներ»,- նշեց Ֆարմանյանը։

ԵԽԽՎ-ում Հայաստանը ներկայացնող պատգամավորի խոսքերով՝ այս որոշումը մի կողմից վեհաժողովին թույլ է տալիս վերականգնել իր հեղինակությունը, քանի որ փաստորեն այն ունակ է բացահայտել իր անդամների անպատշաճ վարքը։ Մյուս կողմից էլ որոշումը հեղինակազրկում է կոնկրետ այդ պատգամավորներին, քանի որ ըստ Ֆարմանյանի՝ նրանք գործել են սեփական նախաձեռնությամբ, ոչ թե իրենց մայրաքաղաքների գիտությամբ։

«Խոսքը գնում է անհատ պատգամավորների՝ գնալով իրեն շատ ուժեղ զգացած ցանցի մասին, որը ինչ-որ պահի ԵԽԽՎ-ում այսպես ասած, կարողացել է ցանկացած հարց առաջ մղել իր ուզած սցենարով»,- նշեց Ֆարմանյանը։

Հիշեցնենք, որ ԵԽԽՎ հանձնաժողովի զեկույցը հրապարակվել է այսօր։ Ըստ դրա՝ ԵԽԽՎ ադրբեջանական պատվիրակության ղեկավար Սամեդ Սեյիդովի, ԵԽԽՎ նախկին նախագահ Պեդրո Ագրամունտի (Իսպանիա), Ուկրաինայի հարցով նախկին զեկուցող Ժորդի Շուկլայի (Իսպանիա) և պատգամավոր Սեզար Պրեդայի (Ռումինիա) նկատմամբ կիրառվել են սանկցիաներ։ Նշված պատգամավորները կորցրել են ԵԽԽՎ անդամի գրեթե բոլոր իրավունքները՝ բացառությամբ քվեարկելուց և բանաձևեր ներկայացնելուց: Ագրամունտի դեմ պատժամիջոցները սահմանվում են 10 տարով, իսկ մյուս երեք պատգամավորների դեմ՝ 2-ական տարով: