Ստիպված դիմեցինք ՏՄՊՊՀ, որպեսզի հարցին լուծում տրվի. Արա Սանթրոսյանը՝ «Վեոլիա Ջրի» մասին

SHANTNEWS.am-ն արդեն հայտնել  է, որ մենաշնորհային դիրքի չարաշահման համար «Վեոլիա Ջուր»-ը տուգանվել է 20 մլն դրամով: Որոշ ժամանակ առաջ հանձնաժողով դիմած ջրաչափեր արտադրող «Արազեն» հայ-գերմանական համատեղ ձեռնարկությունը տեղեկացրել էր, որ «Վեոլիա Ջուր» ընկերության անօրինական գործողությունների հետևանքով դուրս է մղվել շուկայից և դադարեցրել արտադրությունը:

Ըստ «Արազեն»-ի դիմում-բողոքի՝ «Վեոլիա Ջուր»-ը միայն մեկ տարվա ընթացքում ներկրել է ավելի քան 30 հազար ջրաչափ, որոնք որոշ դեպքերում նույնիսկ եռակի գերազանցում են տեղական շուկայի նույն արտադրանքի գինը: «Արազեն» ընկերության տնօրենն այսօր լրագրողներին տեղեկացրել է, որ իրենք դիմել են «Վեոլիա Ջուր» ընկերությանը, որտեղից էլ պատասխանել են, թե ջրաչափեր տեղադրելու որոշումը կայացրել են ոչ թե Հայաստանում, այլ Ֆրանսիայում: «Արազեն» ընկերության տնօրենը վստահեցրել է, որ  խնդիրն ամենևին էլ իրենց արտադրած ջրաչափերին որակը չէ.

«Ուղղակի իրենք մեզ հետևյալն են ներկայացրել՝ մենք ենթարկվում ենք Փարիզին, Փարիզում են որոշում, թե ինչ ջրաչափ պետք է տեղադրվի: Փարիզում որոշել են, որ ջրաչափեր պետք է ներմուծվեն»,- ասել է «Արազեն» ընկերության տնօրեն Արա Սանթրոսյանը՝ հավելելով, որ ներկրվող ջրաչափերը, ըստ պնդումների, պետք է լինեին գերմանական, բայց բերվում են Իսպանիայից:

Ըստ Արա Սանթրոսյանի, երբ իրենք խոսել են խնդիրների մասին, «Վեոլիա Ջուր»-ի տեղական գրասենյակից իրենց ասել են, որ պետք է Փարիզի գրասենյակ դիմեն:

«Ես նամակ գրեցի իրենց տարածաշրջանի ղեկավարին: Պատասխան ստացանք, մի քիչ կոպիտ, որ ես Հայաստանում  նշանակել եմ մարդ, որը իրավասու է ձեր բոլոր հարցերին պատասխանելու: Պատասխան գրեցինք, որ հանդիպել ենք ձեր նշանակած մարդու հետ, իսկ նա պատճառաբանել է, որ հիմնական որոշողը դուք եք, ինքը կատարող է»,- հավելել է Սանթրոսյանը:

«Արազեն» ընկերության տնօրենի խոսքերով՝ այդ ամենից հետո էլ, երբ «Վեոլիա Ջուր»-ը իր խմբի համար մրցույթ է հայտարարել, ընդառաջելով, «Արազեն» ընկերությանը հրավիրել են մրցույթի մասնակցել:

«Մրցույթի փաթեթը ստացել են 2018 թվականի հունվար ամսին: Մրցույթը մի քանի փուլով էր, ինչ պահանջվել է, ներկայացրել ենք: Գնային առաջարկների փուլը վերջում էր՝ ապրիլ ամսին: Գնային առաջարկը ներկայացրել ենք, 3 օր հետո իրենք կապի են դուրս եկել մեր հետ Փարիզից, տեսակապ է հաստատվել, մինչև հունիսի 18-ը պայմանագրերի ստորագրում պետք է լիներ: Դիմեցինք, ասացին՝ սպասեք մի քանի օր, ստիպված դիմեցինք ՏՄՊՊՀ, որպեսզի հարցին ի վերջո լուծում տրվի»,- ասել է Սանթրոսյանը:

SHANTNEWS.am-ը հետաքրքրվել է «Արազեն» ընկերության տնօրենից, թե ինչպե՞ս են պատճառաբանել պայմանագիր չստորագրելը «Վեոլիա Ջուր» ընկերությունում:

«Հոկտեմբերի առաջին շաբաթվա ընթացքում մենք Փարիզից ստացանք ևս մեկ նամակ՝ նորից մեզանից գին էին ուզում, ներողություն էին խնդրում, որ այս պրոցեսը դադարեցված է եղել մի քանի ամիս: Հիմա այս վիճակն է՝ այստեղ ասում են՝ այնտեղ են լուծում հարցը, այնտեղից էլ ոչ մի բան չկա»,- հավելել է «Արազեն» ընկերության տնօրենը:

Մանրամասները՝ տեսանյութում: