Տնաշեննե՛ր, պետք չէ ձեզ 85 տոկոս, դուք հո Նիկոլ բաշի չե՞ք սարքում. Արմեն Աշոտյան

ՀՀԿ նախընտրական շտաբի քարոզչության ղեկավար Արմեն Աշոտյանը խորհրդարանում լրագրողների հետ զրույցում նշեց` իրեն վախեցնում է այն, որ ժողովուրդը կարող է կրկին հիասթափվել: Խոսելով վարչապետի պաշտոնակատար Նիկոլ Փաշինյանի մասին` Աշոտյանն ասաց.

«Ապրի ինքը, որ կարողացել է մարդկանց մեջ հույսեր արթնացնել, բայց ինքը նզովքի կենթարկվի, եթե այդ հույզերը գահավիժեն: Ես մեծապես շահագրգռված եմ, որ իմ ժողովուրդը հերթական անգամ չապրի հիասթափություն, չբախվի իրականությանը, որը շատ հեռու է իր հեքիաթային պատկերացումներից: Այստեղ` այս դահլիճում, կառավարությանն աշխատեցնող մարդիկ են պետք, որևէ մեկը կասկածո՞ւմ է, որ ես, Էդիկը, Վիգենը, Դավիթը, Արփինեն, Վահրամը այդ մարդկանց աշխատեցնելու ենք մեր քննադատությամբ, գիտելիքով, իմացությամբ»:

Աշոտյանն ընդգծեց` իրենք մրցակցային առավելություններ ունեն, որոնք տուն չեն ուզում տանել: Նա ասաց, որ կոնկրետ իր կենսամակարդակը քիչ է փոխվելու, նա այսօրվա իր աշխատավարձով աշխատանքի առաջարկ ներկայում էլ ունի, ընդ որում` ոչ միայն Հայաստանում: Կայանալիք ընտրություններից առաջ, ըստ Աշոտյանի, պետք է հավասար հնարավորություններով ընտրարշավ լինի բոլոր ուժերի համար, և դա պետք է հենց իշխող ուժին:

«Բնակիչների մեծ մասը վարչապետի պաշտոնակատարի պսիխո-հոգեբանական ազդեցության տակ է: Դուք լավ գիտեք, որ Նիկոլ Փաշինյանը կարողանում է մի լայվով Ազգային ժողով փակել, մի լայվով Ազգային ժողով բացել: Այսօր նա այդ մոգականությունն ունի, հետևաբար քաղաքական մեսիջն է` քաղաքակիրթ պայքարի պետք է գնալ»,- ասաց նա:

Աշոտյանը կարծիք հայտնեց, որ իշխող ուժը պետք է դադարի պետական ռեսուրսներն օգտագործել իր ուզած արդյունքը ստանալու համար:

«Տնաշեննե՛ր, պետք չէ ձեզ 85 տոկոս, ի՞նչ եք անում: Դուք հո Նիկոլ բաշի չե՞ք սարքում: Իմաստը ո՞րն է, եթե մեկ է, ըստ Սահմանադրության, ունենալու եք 2/3-ը, ի՞նչ եք անում, ո՛չ կրեդիտ քարտի վրա եք գցելու, ո՛չ կտակելու եք: Իրենք այդպիսի ցուցանիշների ակնկալիք ունեն»,- ասաց ՀՀԿ անդամը:

Լրագրողները հիշեցրին` նույնպիսի ակնկալիքներ ժամանակին ուներ նաև Հանրապետականը, ինչին Աշոտյանն արձագանքեց.

«Մենք մեր սխալների բեռը մեր ուսերի վրա տարել ենք, այդ ծանրությունը մինչև հիմա տանում ենք, մենք մեր սխալների կամ սխալ ընկալվածության պատճառով տուժել ենք, այսօր էլ իշխանություն չենք, պըրծ, քըխ Հանրապետականը գնաց, եկել է նոր իշխանություն, որ ասում է` ես ավելի լավն եմ, մազեր ունեմ, կապուտաչյա եմ, ուժեղ եմ ավելի»:

Աշոտյանի համոզմամբ` ուժեղ ընդդիմությունը պետք է հենց իրեն` իշխանությանը, օրինակ՝ ԼՂ հարցում: Նա նշեց, թե տպավորություն է ստեղծվել, որ ժողովուրդն այժմ առավոտյան ելնում է Նիկոլ Փաշինյանի անունը շուրթերին, գիշերը «Հայր մեր»-ի փոխարեն «Նիկոլ մեր» է ասում: Խորհրդարանում հայտնվելու դեպքում ՀՀԿ-ն մտադիր է հանդես գալ սեփական նախաձեռնություններով, օրինակ` առաջարկել ստվերային կառավարության սխեմա, այլընտրանքային քաղաքական նախագծեր ներկայացնել: