Մերկելի քաղաքական և անձնական ռազմավարական պլանը

Սեպտեմբերի 24-ին կայացան Բունդեսթագի ընտրությունները, և Անգելա Մերկելի կուսակցությունը տարավ հարաբերական հաղթանակ, իսկ Մերկելը 4-րդ անգամ վերընտրվեց Գերմանիայի կանցլեր: Այժմ Բունդեսթագում եկել է ժամանակը միջկուսակցական բանակցությունների և կոալիցիաների կազմման փուլը, որը կանցլերը շատ է կարևորում, քանի որ վերջին ընտրությունների ժամանակ կորցրել է 60 պատգամավորական մանդատներ, որոնք առաջիկայում կարող են ներքաղաքական կյանքում որոշիչ դեր ունենալ:

ShantNews-ն ավելի վաղ անդրադարձել էր կանցլերի ոճին, իսկ այսօր որոշել ենք վերլուծել նրա վարած արտաքին և ներքին  քաղաքականությունը, նաև մի փոքր խոսել անձնական կյանքից:

Առհասարակ Անգելա Մերկելի վարած քաղաքականությունը շատ հակասական է: Արևմուտքի քաղաքագետները նշում են, որ անպայման չէ համաձայնել Մերկելի որոշումների հետ, բայց անհնար է ժխտել այն փաստը, որ նա իր քաղաքական սուր որոշումներով կարողանում է պահել Եվրոպայի սրտում գտնվող ուժեղ տնտեսություն ունեցող պետության կայունությունը: 

Ընտրություններից հետո Մերկելի անձի շուրջ քննարկումների ալիքը նոր թափ առավ՝ նորից սկսեցին քննադատել և զանազան պիտակներ կպցնել: Բայց քաղաքական այս երերուն իրավիճակում, երբ դիմում-բողոք-պահանջներ են հնչում տարբեր կողմերից, Մերկելը կարողանում է տիրապետել իրեն և մնալ թելադրողի դիրքերում: Նա կարծես հայտնի «Գահերի խաղը» սերիալի Դեյներիս Թարգարիենը լինի, որը չի նախընտրում ոչնչացումների գնով վաստակած արագ հաղթանակները, այլ ունի ուժ և դրա հիման վրա ձեռնարկում է ռազմավարական կարևորություն ունեցող քայլեր, որոնք կպահեն ԵՄ արժեքները:

Շատ քաղաքագետներ կարծում են, որ 60 մանդատների կորուստը նույնպես Մերկելի ռազմավարական պլանի մեջ է մտնում, որպեսզի նրանց միջոցով բարձրաձայնի այն խնդիրները, որոնք չի կարող ասել իր անունից՝ սահմանների բացում, միգրացիոն ճգնաժամ, Եվրոպայի անվտանգություն և այլ խնդիրներ:

Ինչպես հաղորդում է գերմանական Spiegel պարբերականը, Մերկելը տեղեկատվություն չի ստանում մամուլից և առհասարակ չի սիրում երկար խոսել լրատվամիջոցների հետ: Նա հիմնականում նախընտրում է իր պատվերով հարցումներ անցկացնել հասարակության շրջանում այս կամ այն քաղաքական հարցի վերաբերյալ: Այս կերպ նա ցույց է տալիս, որ կարևորում է իր երկրի քաղաքացիների կարծիքը և կայացնում է որոշումներ՝ հօգուտ նրանց:

Անգելա Մերկելն իր ողջ կյանքը նվիրել է աշխատանքին, սակայն դա նրան չի խանգարել կառուցել նաև անձական կյանքը: Նա երկու անգամ ամուսնացել է: Իր առաջին ամուսնությունը Ուլրիխ Մերկելի հետ Անգելան մեկնաբանել է որպես չմտածված քայլ: Հատկանշական է այն, որ  դեռ շարունակում է կրել առաջին ամուսնու ազգանունը: Կանցլերն այս իրողությունը մեկնաբանել է՝ ասելով, որ բաժանման շրջանում իր կարիերան ծաղկում էր ապրում և ազգանունը փոխելու ժամանակ պարզապես չի գտել: 

Բաժանումից հետո նա հանդիպել և ավելի ուշ ամուսնացել է ֆիզիկոս Իոահիմ Զաուերի հետ, որի հետ էլ ապրում է մինչ օրս: Երեխաներ չունեն, և իր հարցազրույցներից մեկում Մերկելն ասել է.

«Ես դեմ չէի երեխաներ ունենալուն, բայց չստացվեց: Ես քաղաքականության մեջ եմ եղել վաղ հասակից և 35 տարեկանում արդեն լուրջ պաշտոններ էի զբաղեցում: Այդ շրջանում էր, որ ինքս ինքս ինձ հարց տվեցի, թե կարո՞ղ եմ հոգալ երեխաների մասին: Այդ հարցի պատասխանը մեկն էր՝ ես պարզապես ժամանակ չունեմ այդ երեխաներին մայրական ջերմություն տալու»:

Երիտասարդ տարիքում Անգելա Մերկելը նուդդիստ է եղել, պապարացիները նաև հրապարակել էին կանցլերի՝ նուդդիստական լողափում 60-ականներին արված մերկ լուսանկարները: Մերկելի մամլո խոսնակը այդ լուսանկարները մեկնաբանել է՝ ասելով, որ այդ շրջանում Գերմանիայի բնակիչների համար լողափերում նմանատիպ հանգիստը շատ տարածված է եղել: Այժմ ֆրաու Մերկելը նախընտրում է ամուսնու հետ հանգստանալ Իտալիայում կամ շվեյցարական Ալպերում:

Անգելա Մերկելը ամուսնու հետ Իտալիայում