ԵՄ-ի հետ համապարփակ և ընդլայնված համագործակցության պայմանագիրը Եվրոպայի հետ հարաբերություններում խոշորագույն պարտություն է.Դավիթ Շահնազարյան

«Իշխանության գալուց շատ կարճ ժամանակ հետո մեղադրանք ներկայացվեց ՀԱՊԿ գլխավոր քարտուղար Յուրի Խաչատուրովին, շատ-շատերին թվում էր, որ դա ուղղակի անփորձությունից է, բայց իմ համար այն ժամանակ էլ ակնհայտ էր, որ սա քաղաքականության առաջին քայլերից է: Արդյունքում Հայաստանը կորցրեց կարևորագույն այդ պաշտոնն այն իրավիճակում, երբ Ադրբեջանը պատրաստվում է պատերազմի, ինչն ավելի քան հանցագործություն էր, դա սխալ էր»,- դեկտեմբերի 4-ին կայացած ասուլիսի ժամանակ ասաց ՀՀԿ համամասնական ցուցակով առաջադրված Դավիթ Շահնազարյանը:

Նրա խոսքերով՝ բոլոր հավաստիացումները, որ Հայաստանը կպահպանի այդ պաշտոնը, ուղղակի իշխանությունների կողմից տարածվող սուտ էր, և իրենք էլ դեռևս օգոստոսից գիտեին, որ դա բացառված է: Իսկ նիստը հետաձգվել էր, քանի որ դեռևս համաձայնության չէին եկել, թե Հայաստանի ներկայացուցչին փոխարինելու է Բելառուսի ներկայացուցի՞չը, թե՞ ՌԴ ներկայացուցչի տեղակալը շարունակելու է պաշտոնավարել:

Դավիթ Շահնազարյանը նաև  հիշեցրեց, որ նախկին իշխանությունների օրոք ստորագրվեց ԵՄ-ի հետ համապարփակ և ընդլայնված համագործակցության պայմանագիրը, որտեղ ամրագրված էին միջազգային իրավունքի և Հելսինկյան եզրափակիչ ակտի սկզբունքներից երեքը՝ տարածքային ամբողջականություն, ժողովուրդների իրավահավասարություն և ինքնորոշման իրավունք, ինչպես նաև ուժի և սպառնալիքի չկիրառում: Այս փաստաթուղթը ստորագրվել է ԵՄ անդամ բոլոր 28 երկրների կողմից:

«ԵՄ-ի դիրքորոշումը հետևյալն էր, որ Ադրբեջանի հետ նմանատիպ փաստաթուղթ ստորագրելու դեպքում անվերապահորեն այդ երեք սկզբունքները պետք է ամրագրված լինեն: Այդ մասին դեռ այս տարվա ձմռան վերջին, վաղ գարնանը ԵՄ բարձրաստիճան պաշտոնյաներն ինձ և շատ ուրիշներին ասել էին, որ ՀՀ իշխանությունների հետ կա այդ պայմանավորվածությունը: Ադրբեջանը վարում էր այս տարի ԵՄ-ի հետ բանակցություններ նմանատիպ փաստաթուղթ ստորագրելու վերաբերյալ: Բանակցություններն արդեն շատ մոտ էին ավարտվելուն, և այն նույն մարդիկ՝ ԵՄ բարձրաստիճան պաշտոնյաները, որոնք պնդում էին, որ այս երեք կետերը պետք է մտնեն, հիմա ուղղակիորեն ասում են, որ այլ ձևակերպումներ են լինելու»,- պարզաբանեց Դավիթ Շահնազարյանը:

Դավիթ Շահնազարյանը սա կառավարության մեծ կորուստ որակեց և խոշորագույն պարտություն Եվրոպայի հետ հարաբերություններում: Դավիթ Շահնազարյանը կոչ արեց փորձել ինչ-որ բան անել, քանի դեռ փաստաթուղթը չի ստորագրվել, և ժամանակ կա:

«Դեռ ժամանակ կա, փորձե՛ք: Հետո չբողոքե՛ք, որ ԵՄ-ն կրկնակի ստանդարտներով է առաջ շարժվում, չմեղադրե՛ք ԵՄ-ին, ինչպես այսօր ամբողջ աշխարհին եք մեղադրում: Վստահ եմ, որ չեն էլ փորձելու, որովհետեւ սա մտնում է իրենց քաղաքականության մեջ»,- ասաց Դավիթ Շահնազարյանը:

Անդրադառնալով ՄԱԿ-ի գագաթնաժողովի ելույթից հետո երկու օր անց Դուշանբեում տեղի ունեցած «պատմական» հանդիպմանն Ադրբեջանի նախագահ Ալիևի հետ, որից հետո հայտարարվեց, որ պայմանավորվածություններ են ձեռք բերվել, որ պետք է խստորեն պահպանվի հրադադարի ռեժիմը և օպերատիվ կապ հաստատվի, Դավիթ Շահնազարյանն ասաց, որ իրականությունն այլ է: