Չպետք է թույլ տալ միահեծան իշխանություն. Գարեգին Չուգասզյան

Այսօր, երբ «Սասնա ծռեր» համահայկական կուսակցության ներկայացուցիչ Գարեգին Չուգասզյանը խոսել է երիտասարդ, թարմ ուժերով խորհրդարան ունենալու անհրաժեշտության մասին, լրագրողները հարցրել են՝ արդյո՞ք երիտասարդ ուժերն իսկապես, հակակշիռ են, թե՞ իշխանությանը սերտաճած ուժեր են, որոնք իրենց հայացքներով հարում են իշխանություններին:

«Եթե մենք խոսում ենք Հայաստանի նոր ընդդիմության մասին, պետք է հստակ հասկանալ, որ հին ռեժիմը ներկայացնող ուժերն ընդամենը դիմակ են հագնում ընդդիմության, որովհետև ակնհայտ է, որ էս տարիների էն պատասխանատվությունը, որ իրենք կրել են ներկա առաջացած իրավիճակի համար, իսկ ներկա իրավիճակը, իսկապես ծանր է, մենք ծանրագույն ժառանգություն ենք ստացել, իսկ Մարտի 1-ից հետո հստակ կարող ենք ասել, որ բռնակալական ռեժիմ, իշխանությունը զավթած ռեժիմ է եղել, և էն ուժերը, որոնք կոալիցիայի մեջ են եղել, իրենք նույնպես կիսում են էդ պատասխանատվությունը: Հարյուր հազարավոր ճակատագրեր են խեղվել, ընտանիքներ են կոտրվել, արտագաղթ է եղել»,- ասել է Չուգասզյանը՝ հավելելով, որ այդքանից հետո  ինքը ոչ միայն ավելորդ է համարում խոսել այդ կուսակցությունների մասին, այլ կուսակցություն բառն է նրանց դեպքում չակերտների մեջ վերցնում:

Ըստ «Սասնա ծռեր» համահայկական կուսակցության ներկայացուցչի՝ փաստ է, որ քաղաքական դաշտն անցած տարիների ընթացքում անապատացել է, և հիմա կա ծանրագույն խնդիր՝ Հայաստանում ստեղծել  հանրային, քաղաքական դաշտ, որտեղ մարդիկ, առանց թղթերի, իրենց ուղղակի ասելիքն ունեն, կարող են բանավիճել և գալ ճշմարտության։

«Մի օրում չի ստեղծվում էդ դաշտը: Օլիգարխիային և 5-րդ շարասյանը, որն օտարի շահն է ներկայացնում Հայաստանում, քաղաքական լծակներից հեռու պահելով, մենք լուծում ենք առաջին խնդիրը: Էստեղ համընկնում են թե՛ Նիկոլ Փաշինյանի ուժի, թե՛ «Սասնա ծռեր»-ի, թե՛ նոր կուսակցությունների շահերը: Հեռու պահել Մարտի 1-ի կոալիցիայի ուժերին քաղաքական լծակներից և թույլ չտալ, որ իրենք ականապատեն նոր խորհրդարանը: Երկրորդ խնդիրն է էս ընտրությունների ընթացքում ստեղծել նոր քաղաքական դաշտ, որը կունենա առնվազն երկու որակական բևեռ, որը հնարավորություն կտա, որ չկրկնվի էն սխալը, որը եղավ առաջին հեղափոխության ժամանակ: 30 տարի առաջ, երբ որ ՀՀՇ-ն եկավ իշխանության, հներին հանեց, իսկ նոր, ամուր ու որակական բևեռ չստեղծվեց, մենք գլորվեցինք, գլորվեցինք, հասանք օլիգարխիական իշխանության և այն պետությանը, որն այսօր ունենք: Որպեսզի էդ խնդիրը նորից չկրկնվի, դասը պետք է լինի միահեծան էդ իշխանությունը թույլ չտալը»,- հավելել է Չուգասզյանը: