Խորհրդարանական ընտրություններն ըստ ԿԸՀ սահմանած ժամանակացույցի

 Ժամը 20.00-ին քվեարկության ավարտից ու ընտրատեղամասերի փակվելուց հետո տեղամասային ընտրական հանձնաժողովները 12 ժամվա ընթացքում պետք է ավարտեն քվեաթերթիկները հաշվելու գործողությունը, կազմեն քվեարկության արդյունքների վերաբերյալ արձանագրություն և այն հրապարակեն:

Մինչև դեկտեմբերի 10-ը՝ ժամը 20.00-ն, կամ քվեարկության ավարտից ոչ ուշ, քան 24 ժամվա ընթացքում Կենտրոնական ընտրական հանձնաժողովը ներբեռնելու հնարավորությամբ իր կայքում պետք է տեղադրի քվեարկության նախնական արդյունքները, ինչպես նաև պաշտոնապես այն հրապարակի հեռուստատեսությամբ և ռադիոյով: Իսկ ընտրությունների արդյունքները բողոքարկելու ու վիճարկելու համար Կենտրոնական ընտրական հանձնաժողովը սահմանել է հետևյալ ժամանակացույցը.

1. Դեկտեմբերի 10-ին՝ ժամը 12.00-18.00-ն կամ դեկտեմբերի 11-ին՝ առավոտյան ժ. 09.00-ից մինչև 11.00-ն թեկնածուները, վստահված անձինք, ինչպես նաև տեղամասային ընտրական հանձնաժողովի անդամները տարածքային ընտրական հանձնաժողովներին կարող են ներկայացնել տեղամասում քվեարկության արդյունքների վերահաշվարկի, քվեարկության արդյունքներն անվավեր ճանաչելու վերաբերյալ  դիմումները:
   2. Դեկտեմբերի 10-ին՝ ժամը 12.00-ից մինչև դեկտեմբերի 12-ը՝ ժամը 11.00-ն կուսակցությունների և դաշինքների լիազոր ներկայացուցիչները, վստահված անձինք, տեղամասային ընտրական հանձնաժողովի անդամներն ու քվեարկությանը չմասնակցած ընտրողը տարածքային ընտրական հանձնաժողով կարող են ներկայացնել այլ անձի փոխարեն քվեարկելու մասին դիմումները:
   3. Դեկտեմբերի 11-ին՝ մինչև ժամը 12.00-ն Կենտրոնական ընտրական հանձնաժողովը իր պաշտոնական կայքում պետք է հրապարակի ընտրողների սքանավորված ցուցակները՝ ներբեռնելու և որոնման հնարավորությամբ: Նույն օրը, ժամը 14.00-ից սկսած, մինչև դեկտեմբերի 14-ն Տարածքային ընտրական հանձնաժողովները պետք է սկսեն ու ավարտին հասցնեն վերահաշվարկի աշխատանքները:

Ի դեպ, ընտրություններին մասնակցած կուսակցություններն ու դաշինքները մինչև դեկտեմբերի 14-ը՝ ժամը 18.00-ն Կենտրոնական ընտրական հանձնաժողով կարող են ներկայացնել ընտրությունների արդյունքները անվավեր ճանաչելու մասին դիմումներ:

Քվեարկության արդյունքների վերաբերյալ վերջնական արձանագրությունը, արդյունքների ամփոփումը և մանդատների նախնական բաշխման որոշումը ԿԸՀ-ն պետք է կայացնի ու հրապարակի  դեկտեմբերի 16-ին:

Եթե մանդատների նախնական բաշխման որոշում կայացվել է, ապա ընտրական շեմը հաղթահարած կուսակցություններն ու դաշինքները 6 օր, այսինքն՝ մինչև դեկտեմբերի 22-ը՝ ժամը 18.00-ն, ժամանակ ունեն, օրենքով սահմանված կարգով քաղաքական կոալիցիա կազմելու ընտրական արգելապատնեշը հաղթահարած առավելագույնը երկու կուսակցության կամ դաշինքի հետ: Դեկտեմբերի 23-ին Կենտրոնական ընտրական հանձնաժողովը վերջնական որոշում է ընդունելու Ազգային Ժողով ընտրվելու կամ ընտրության երկրորդ փուլ անցկացնելու մասին:

Հիշեցնենք, որ խորհրդարանական այս արտահերթ ընտրություններին մասնակցելու հայտ է ներկայացրել 9 կուսակցություն և 2 դաշինք: Պատգամավորական 101 մանդատի համար պայքարում է համամասնական ու տարածքային ցուցակներով առաջադրված 1451 պատգամավորի թեկնածու: