Փաշինյանն այցելել է Չարենցավան՝ տեղում ծանոթանալու, թե ինչու են դասադուլ հայտարարել թիվ 3 հիմնական դպրոցում

Վարչապետի պաշտոնակատար Նիկոլ Փաշինյանն այսօր՝ դեկտեմբերի 12-ին, այցելել է Չարենցավան, հանդիպելու Չարենցավանի թիվ 3 հիմնական դպրոցի ուսուցչա-մանկավարժական կազմի ու դպրոցականների ծնողների հետ՝ պարզելու և տեղում ծանոթանալու դպրոցում ստեղծված իրավիճակին: Խնդիրն այն է, որ արդեն տասը օր է, ինչ աշակերտները դասադուլ են հայտարարել՝ ի պաշտպանություն դպրոցի տնօրենի պաշտոնակատար Լուսինե Կարապետյանի:

Հանդիպմանը ներկա են եղել  նաև Կոտայքի մարզպետ Ռոմանոս Պետրոսյանը և ԿԳ նախարարի պաշտոնակատար Արայիկ Հարությունյանը։

Դասադուլի պատճառը նոյեմբերի 9-ին կայացած դպրոցի տնօրենի ընտրություններն են, որի արդյունքում նախկին տնօրենը՝ Լուսինե Կարապետյանը, չի վերընտրվել: Դասադուլ հայտարարած աշակերտների ծնողներն ու ուսուցիչները վրդովված պնդել են, որ ընտրությունը խախտումներով է եղել, քանի որ ըստ նրանց խորհրդի մի քանի անդամներ ուղղորդված են եղել մյուս թեկնածուի կողմից:

Լուսինե Կարապետյանը մեկ ձայնով է զիջել ընտրված թեկնածու Աննա Բալյանին։ Մամուլում տարածված տեղեկությունների համաձայն՝ Բալյանն էլ իր հերթին պնդում է, որ թե՛ խախտումները, թե՛ ուղղորդումները եղել են Լուսինե Կարապետյանի կողմից: Կարապետյանը ընտրության արդյունքները բողոքարկել էր նաև ԿԳՆ, ինչի արդյունքում նախարարությունը  հանձնաժողով էր կազմվել ու հարցը ուսումնասիրելուց հետո եզրակացրել, որ տնօրենի ընտրության ընթացակարգի առումով խախտումներ չեն եղել:

Արդյունքում դպրոցի երեխաների ծնողներն ու ուսուցիչները որոշել էին դասադուլ հայտարարել՝ պահանջելով վերականգնել նախկին տնօրենին, իսկ եթե դա չի արվում, ապա ծնողները սպառնում են դպրոցից հանել իրենց երեխաներին: Դասադուլ հայտարարած ուսուցիչներն էլ հայտարարել են, որ ազատման դիմումներ կգրեն:

Նոյեմբերի 30-ին քարոզարշավի շրջանակներում, երբ Նիկոլ Փաշինյանը Չարենցավանում էր, դասադուլի մասնակիցները խնդրել էին հարցին լուծում տալ,  Փաշինյանն էլ խոստացել էր, որ օբյեկտիվ լուծում կտա: Այդ պատճառով էլ այսօր գնացել էր Չարենցավան՝ տեղում լսելու բողոքող կողմին:

Հանդիպման ժամանակ դպրոցի նախկին տնօրեն  Լուսինե Կարապետյանը ներկայացրել է, որ 2005 թվականին դպրոցը ընդունել է շատ վատ վիճակում, այն ունեցել է ընդամենը 285 աշակերտ: 2006-ին, Կարապետյանի պնդմամբ, իր ջանքերի շնորհիվ դպրոցը կապիտալ վերանորոգվել է, սկզբից ևեթ դպրոցում հիմք է դրել կոռուպցիայի դեմ պայքարին, վերացրել դրամահավաքը, ուսուցչին նվեր տալու, սեպտեմբերի մեկ, Նոր տարի, Մարտի ութ ու Վերջին զանգ ասված երևույթները:

Լուսինե Կարապետյանը նաև ընդգծել է, որր երեք անգամ վերընտրվել է, միշտ խնդիրներ է ունեցել մարզպետների հետ, քանի որ չի ընդունել նրանց կողմից պարտադրված ոչ բանիմաց մասնագետներին: Դպրոցն այսօր ունի 825 աշակերտ:

Դպրոցի կառավարման խորհրդի 8 անդամներից 2-ը նոր ներկայացուցիչ է, որոնք նշանակվել են մարզպետի կողմից: Բողոքող կողմը մարզպետի նշանակած ներկայացուցիչների հետ խնդիրներ են ունեցել ու հիմա պնդում են, որ ընտրությունների ժամանակ նրանք ուղղորդել են մյուսներին:

Լսելով նաև մյուս կողմին՝ Փաշինյանը հայտարարել է, որ մրցույթը իրականացվել է օրինական, հետևաբար որևէ հիմքեր չկան մրցույթը անօրինական ճանաչելու հարցում, և ընտրված տնօրենը պետք է պաշտոնավարի: Նա խորհուրդ է տվել բողոքող կողմին դիմել դատարան, ինչպես նաև տեղեկացրել, որ երկու կողմից էլ հնչել են մեղադրանքներ ճնշումների վերաբերյալ: Այդ պատճառով էլ խնդրով կզբաղվեն իրավապահները, ու եթե պարզվի, որ եղել են նման ճնշումներ, ապա նրանք կպատժվեն, իսկ տնօրենի ընտրությունը չեղյալ կհայտարարվի:

Փաշինյանը բարձրախոսով քննարկման արդյունքները ներկայացրել է նաև բակում հավաքված դասադուլավոր դպրոցականների ծնողներին և ուսուցիչներին: Նա պնդել է, որ Հայաստանն օրենքի երկիր է, ու դպրոցի տնօրեն են ընտրում ոչ թե ճաշակով կամ ծանոթով, այլ օրենքով:

Փաշինյանը նաև հայտարարել է, որ այսօր երեկոյան Կոտայքի մարզպետը ընտրված տնօրեն Աննա Բալյանին կնշանակի տնօրեն: Փաշինյանի այդ հայտարարությանը առարկություններով են ընդունել բակում հավաքվածները՝ վանկարկելով «Բալյա՛ն, հեռացի՛ր»:

Փաշինյանը նաև կոչ է արել դպրոցականներին վաղվանից գալ դասի, ինչին ևս աշակերտները առարկել են: Փաշինյանը կրկին հորդորել է դպրոցականներին դադարեցնել դասադուլը, ինչպես նաև զգուշացրել դասադուլ հրահրողներին, որ նրանք անօրինական գործողությունների փորձ չանեն ու աթոռակռվի պատճառով չխաթարեն ուսումնական պրոցեսի բնականոն ընթացքը: