Նմանօրինակ ընտրովի արդարադատությունն առաջինը վնասելու է երկրի անվտանգությանն ու իմիջին. Մանվել Գրիգորյանի փաստաբան

«Մեր պաշտպանյալը, ցավոք, չի ցանկանում դատական ակտերը տեղական ներպետական ատյաններում սպառելուց հետո գնալ Եվրոպական դատարան: Դա իր սահմանադրական իրավունքն է, նա այլ կերպ է մտածում, ասում է պետությանը դատի չեմ տա»,- դեկտեմբերի 18-ին լրագրողների հետ հանդիպման ժամանակ նշեց ԱԺ պատգամավոր Մանվել Գրիգորյանի պաշտպան Լևոն Բաղդասարյանը: Նա նաև տեղեկացրեց, որ պաշտպանական կողմը, այնուամենայնիվ, հորդորելու է դիմել Եվրոպական դատարան, քանի որ այն իրավաչափ ընթացակարգ է, հատկապես, երբ ակնհայտ է ընտրովի արդարադատությունը:

Փաստաբանի խոսքերով՝ բացարձակ դատական ակտում չկա մի դրվագ, որ կալանքի հիմք կտա: Իշխանափոխության օրերի զարթոնքի հետ կապված արվեց հայտարարություն, որ իրավաչափ չէր, աղերս ուներ անմեղության կանխավարկածի հետ, և հասարակությունն այդ հայտարարության հիման վրա Մանվել Գրիգորյանին ընդունեց որպես բացասական կերպարի:

Ներկայացնելով գործի մանրամասները՝ Լևոն Բաղդասարյանը նշեց, որ Մանվել Գրիգորյանին մեղադրանք է առաջադրվել յուրացման համար. որպես վնաս՝ վարույթ իրականացնող մարմինը ֆիքսել է 7 մլն դրամ, որը դեռևս 2018-ի սեպտեմբերին վճարվել է դատախազության դեպոզիտ հաշվին: Այս քրգործի շրջանակներում ստուգումներ են սկսվել Գրիգորյանի և նրա մերձավորների ընկերություններում սկսած 1990-ական թվականներից:

«Մի կողմ թողնելով ստուգումների իրավաչափությունը և հայտնաբերված ենթադրյալ խախտումները՝ վարույթ իրականացնող մարմնին հարցնում ենք՝ որքա՞ն կարող են կազմել ենթադրյալ ֆինանսական խախտումները: Ասում են՝ մաքսիմում 1 մլրդ դրամ: Պետությանն ենք նվիրաբերում 5 անգամ ավելի արժողությամբ գույք: Հարցնում ենք՝ ո՞րն է պատճառը, որ բացակայում են անձին կալանքի տակ պահելու հիմքերը, և նա մինչև հիմա գտնվում է կալանքի տակ: Պատասխան չունենք: Ամեն անգամ դատարանը վերացական դատողություններով հլու-հնազանդ կատարում է ՀՔԾ պատվերը և կալանքի սանկցիան ամեն անգամ երկարացնում է: Դա անթույլատրելի է: Նմանօրինակ ընտրովի արդարադատությունն առաջինը վնասելու է երկրի անվտանգությանն ու նրա իմիջին»,- ասաց փաստաբանը:

Փաստաբանը նաև նշեց, որ Գրիգորյանին հանիրավի պահելով կալանքի տակ՝ տեղի է ունենում խոշտանգում, որի կրողը և պատասխանատուն ՀՔԾ-ն է և Դատախազությունը: Նրա խոսքերով՝ նման անօրինականությունները, երբ իրավապաշտպանը բարձրաձայնում է, և երկրի իշխանությունը քար լռություն է պահպանում, հետևությունը մեկն է՝ «Գրիգորյանի նկատմամբ քաղաքական որոշում է կայացվել նրան պահել պատանդի կարգավիճակում և դանդաղ մահացել»:

«Այն աստիճանի է հասել Մանվել Գրիգորյանին անօրինական կալանքի տակ պահելը, որ պաշտոնապես բարձրաձայնում է Հայաստանի ՄԻՊ-ը՝ փաստելով, որ Գրիգորյանի մոտ բացահայտվել է առողջական և հոգեբանական վիճակի բացասական դինամիկա: Պատկերացրե՛ք, մարդուն կալանավորում են, շաքարը 7 է,  կախվածություն չի ունեցել ինսուլինից, 6 ամիս անց շաքարը 25 է, օրական 2 անգամ ընդունում է ինսուլիսի բարձր դոզա և ունի կախվածություն ինսուլինից»,- նշեց Մանվել Գրիգորյանի պաշտպանը:

Լևոն Բաղդասարյանը ընդգծեց, որ եթե նոր Հայաստանի քաղաքականությունն ընտրովի արդարադատությունն է և  իր քաղաքացուն ընտրովի դանդաղ սպանելը, ապա դրա դեմ պետք է տոտալ պայքարել, իսկ եթե ոչ, պետք է անհապաղ փոխել անձի խափանման միջոց կալանքը:

«Մենք չենք ասում՝ թող Գրիգորյանը պատասխանատվության չենթարկվի, մենք ասում ենք՝ կալանքի հիմքերը բացակայում են: Իսկ եթե հետագայում մեղքը կապացուցվի, թող օրենքի խստությամբ ենթարկվի պատասխանատվության»,- ասաց պաշտպանը: