Այն ամենը, ինչ պետք է իմանալ կառավարության կառուցվածքի փոփոխության մասին

Այսօր ի վերջո հրապարակվեց կառավարության կառուցվածքի փոփոխությունների մասին նոր նախագիծը, որով մի քանի նախարարություններ միավորվելու են, տարբեր ստորաբաժանումներ անցնելու են մի նախարարությունից մյուսին։ Նախագիծն առայժմ վերջնական տեսքի չի բերվել, այլ ուղարկվել է նախարարություններ՝ նրանցից առաջարկություններ հավաքելու համար։

Նախագծի արդեն իսկ ամենաքննարկված թեմաներից մեկը կրթության և գիտության, մշակույթի, սպորտի և երիտասարդության հարցերի նախարարությունների միավորումն է։ Տրամաբանորեն, նոր նախարարությունը կկոչվի կրթության, գիտության, մշակույթի և սպորտի նախարարություն։ Ընդ որում՝ վերջին երկուսը կմտնեն առաջինի մեջ. ԿԳՆ-ն կդառնա ԿԳՄՍՆ։

Մյուս` ամենամեծ միավորումը կդառնա տարածքային կառավարման և ենթակառուցվածքների նախարարությունը։ Սրա մեջ կմտնեն.

1. Տարածքային կառավարման և զարգացման նախարարությունը,
2. Էներգետիկ ենթակառուցվածքների և բնական պաշարների նախարարությունը,
3. Այդ նախարարության մեջ մտնող, բայց առանձին հանդես եկող Ջրային պետական կոմիտեն,
4. Տնտեսական զարգացման և ներդրումների նախարարության մեջ մտնող Պետական գույքի կառավարման կոմիտեն,
5. Տրանսպորտի և կապի նախարարության «տրանսպորտային» բլոկը։

Նոր ստեղծվելիք տնտեսական զարգացման և գյուղատնտեսության նախարարության (ՏԶԳՆ) մեջ կմտնեն տնտեսական զարգացման և ներդրումների նախարարությունը (առանց պետգույքի կառավարման կոմիտեի) ու գյուղատնտեսության նախարարությունը։

Առանց «տրանսպորտային բլոկի» մնացած տրանսպորտի, կապի և ՏՏ նախարարությանը կմիավորվի ՊՆ կազմում գործող ռազմարդյունաբերության կոմիտեն։ ՏԿՏՏ նախարարության իրավահաջորդը կկոչվի բարձր տեխնոլոգիաների և ռազմարդյունաբերության նախարարություն (ԲՏՌՆ)։

Սփյուռքի նախարարությունը որպես այդպիսի կվերացվի, իսկ դրա գործառույթները կկատարի Արտաքին գործերի նախարարությունը։ Ռազմարդյունաբերական կոմիտեի առանձնացումից հետո պաշտպանության նախարարության մյուս ստորաբաժանումները կգործեն նույն կառույցի կազմում։

Մյուս նախարարությունները անվան ու գործառույթների փոփոխություններ այս նախագծով չեն ունենա, թեև սպասվում է, որ բոլոր գերատեսչություններում էլ օպտիմալացումներ կլինեն։ Այսպիսով, գործող 17 նախարարության փոխարեն Հայաստանի կառավարությունը կունենա 12 նախարարություն.

1. Աշխատանքի և սոցիալական հարցերի նախարարություն,
2. Առողջապահության նախարարություն,
3. Արդարադատության նախարարություն,
4. Արտակարգ իրավիճակների նախարարություն (ԱԻՆ),
5. Արտաքին գործերի նախարարություն (ԱԳՆ),
6. Բարձր տեխնոլոգիաների և ռազմարդյունաբերության նախարարություն (ԲՏՌՆ),
7. Բնապահպանության նախարարություն,
8. Կրթության, գիտության, մշակույթի և սպորտի նախարարություն (ԿԳՄՍՆ),
9. Պաշտպանության նախարարություն (ՊՆ),
10. Տարածքային կառավարման և ենթակառուցվածքների նախարարություն,
11. Տնտեսական զարգացման և գյուղատնտեսության նախարարություն (ՏԶԳՆ),
12. Ֆինանսների նախարարություն։

Նախագիծը հրապարակել է ՀՀԿ անդամ, վեցերորդ գումարման Ազգային ժողովի փոխնախագահ Արփինե Հովհաննիսյանը, և ներկա իշխանության աղբյուրները չեն հերքել դրա իսկությունը։

https://www.facebook.com/arpine.hovhannisyan.14/posts/2856929184332934